ନିର୍ବାଚନ ଲଢିବାକୁ ତୃତୀୟ ପିଲାକୁ ଲୁଚାଇଥିଲେ , ସତ ଜଣାପଡିବା ପରେ ଗଲା ମେୟର ପଦ

କନକ ବ୍ୟୁରୋ:  ନିର୍ବାଚନ ଲଢିବାକୁ ତୃତୀୟ ପିଲାକୁ ଲୁଚାଇଥିଲେ  । ଜଣାପଡିବା ପରେ ଗଲା ମେୟର ପଦ।   ଆମେ କହୁଛୁ ବିହାର ଛପରା ଜିଲ୍ଲାର ମେୟର ରାକ୍ଷୀ ଗୁପ୍ତାଙ୍କ କଥା । ପିଲାଙ୍କ ପାଇଁ ଗଲା ମେୟର ପଦ । ନିୟମ ଭାଙ୍ଗି ନାମାଙ୍କନ ସମୟରେ ସତ୍ୟପାଠରେ ୩ ଟି ପିଲା ଥିବା କଥା ଲୁଚାଇଥିବା ଯାଞ୍ଚରୁ ଜଣାପଡିବା ପରେ ତାଙ୍କୁ ମେୟର ପଦ ହରାଇବାକୁ ପଡିଛି ।

ସୂଚନା ମୁତାବକ, ନାମାଙ୍କନ ପତ୍ର ଦାଖଲ ସମୟରେ ରାକ୍ଷୀ ଯାହା ପ୍ରମାଣପତ୍ର ଦାଖଲ କରିଥିଲେ ତାକୁ ଚ୍ୟାଲେଞ୍ଜ କରି ପୂର୍ବ ମେୟର ସୁନୀତା ଦେବୀ ନିର୍ବାଚନ ଆୟୋଗରେ ମାମଲା ଦାଏର କରିଥିଲେ ।ଏହାର ଯାଞ୍ଚ ପରେ ପ୍ରକୃତ ସତ୍ୟାସତ୍ୟ ସାମ୍ନାକୁ ଆସିଛି । ରାକ୍ଷୀ ଦାଖଲ କରିଥିବା ସତ୍ୟପାଠ ଭୁଲ ବୋଲି ପ୍ରମାଣିତ ହେବା ପରେ ମେୟର ପଦ ହରାଇଛନ୍ତି ରାକ୍ଷୀ ଗୁପ୍ତା ।

ସତ୍ୟପାଠରେ ତାଙ୍କର ଦୁଇଟି ପିଲା ଅଛନ୍ତି ବୋଲି ଦର୍ଶାଇଥିଲେ ରାକ୍ଷୀ । କାରଣ ରାଜ୍ୟ ନିର୍ବାଚନ ଆୟୋଗଙ୍କ ନିୟମ ଅନୁସାରେ ୨୦୦୮ ଏପ୍ରିଲ ୪ ତାରିଖ ପରେ ଯାହାର ୨ରୁ ଅଧିକ ସନ୍ତାନ ହେବେ ତାଙ୍କୁ ନିର୍ବାଚନ ପାଇଁ ଯୋଗ୍ୟ ବୋଲି କୁହାଯାଇପାରିବ ନାହିଁ । ସେମାନେ ନିର୍ବାଚନ ଲଢିପାରିବେ ନାହିଁ । ସେହି କାରଣରୁ ରାକ୍ଷୀ ତାଙ୍କର ତୃତୀୟ ସନ୍ତାନକୁ ସମ୍ପର୍କୀୟଙ୍କ ଘରେ ଲୁଚାଇ ରଖିଥିବା ଜଣାପଡିଛି । କିନ୍ତୁ ନିଜକୁ ନିର୍ଦ୍ଦୋଷ ପ୍ରମାଣ କରିବାକୁ ଯାଇ ନିଜର ତୃତୀୟ ସନ୍ତାନକୁ ସମ୍ପର୍କୀୟଙ୍କୁ ପୋଷ୍ୟ ସନ୍ତାନ ଭାବେ ଦାନ କରିଥିବା କହିଛନ୍ତି ରାକ୍ଷୀ । ହେଲେ  ନିଜର ବିଚାର ଶୁଣାଇ ପଦକ୍ଷେପ ମଧ୍ୟ ନେଇସାରିଛନ୍ତି ନିର୍ବାଚନ ଆୟୋଗ ।

ଆସନ୍ତୁ ନଜର ପକାଇବା ଚର୍ଚ୍ଚାରେ ଥିବା ରାକ୍ଷୀଙ୍କ ବ୍ୟକ୍ତିଗତ ଓ ରାଜନୈତିକ ଉପରେ । ପାଟଣାର ବଣିଆ ପରିବାରରୁ ଆସିଛନ୍ତି ରାକ୍ଷୀ । ତାଙ୍କ ପରିବାରର ଅଧିକାଂଶ ସଦସ୍ୟ ବ୍ୟବସାୟ ସହ ଜଡିତ । ଲକ୍ଷେ୍ନø ୟୁନିଭର୍ସିଟିରୁ ଏମବିଏ କରିଛନ୍ତି  । ପଢା ପରେ ବାପ ଘରେ ବ୍ୟବସାୟ ସମ୍ଭାଳୁଥିଲେ  ରାକ୍ଷୀ । ବିବାହ ପରେ  ଛପରାରେ ବି ଶାଶୁଘରେ ବି ସୁନା ବ୍ୟବସାୟ ସମ୍ଭଳିବାକୁ ଲାଗିଲେ । ରାଜନୀତିରେ ପରିବାରରେ କାହାରି କୌଣସି ସମ୍ପର୍କ ନଥିଲା । କରୋନା ସମୟରେ ସ୍ୱାମୀ ସମାଜସେବା ଆରମ୍ଭ କରିଥିଲେ । ଏହାପରେ ରାଜନୀତି ପ୍ରତି ତାଙ୍କର ଆଗ୍ରହ ବଢିଥିଲା । ପରେ ପରେ ପତ୍ନୀ ରାକ୍ଷୀ ଗୁପ୍ତାଙ୍କୁ ମେୟର ପଦରେ ନିର୍ବାଚନ ଲଢିବାକୁ ବିଜେପି ପକ୍ଷରୁ ଅଫର ଆସିଥିଲା, ଯେଉଁଥିରେ ସେ ପ୍ରତିଦ୍ୱନ୍ଦ୍ୱି ଠାରୁ ବିପୁଳ ବ୍ୟବଧାନରେ ଜିତିଥିଲେ ।

କେବଳ ଏତିକିରେ ସରୁନି ରାକ୍ଷୀଙ୍କ ପର୍ସନାଲ ପ୍ରୋଫାଇଲ । ମଡେଲିଂ କ୍ଷେତ୍ରରେ ମଧ୍ୟ ତାଙ୍କ ବେଶ୍ ଅଭିଜ୍ଞତା ରହିଛି । ଆଇ ଗ୍ଲାମ୍ ଦ୍ୱାରା  ଆୟୋଜିତ ମିସ୍ ବିହାର ପ୍ରତିଯୋଗିତାରେ ରାକ୍ଷୀ ପ୍ରଥମ ରନର୍ସଅପ୍ ହୋଇଥିଲେ ।

ତେବେ ରାକ୍ଷୀ ଗୁପ୍ତାଙ୍କ ମେୟର ପଦ ଯିବା ପରେ ତାଙ୍କ ସମର୍ଥକଙ୍କ ମଧ୍ୟରେ ଅସନ୍ତୋଷ ଦେଖାଯାଇଥିବାବେଳେ ବିରୋଧୀଙ୍କ ମଧ୍ୟ ଉତ୍ସାହର ମାହୋଲ ଦେଖିବାକୁ ମିଳିଛି । ବିରୋଧୀ ବାଣ ଫୁଟାଇ ଖୁସି ମନାଉଥିବାର ଦେଖିବାକୁ ମିଳିଛି ।