ବଡ଼ ଅଭିଯୋଗ ଆଣି ଟ୍ୱିଟର ସିଇଓଙ୍କୁ ଚିଠି ଲେଖିଲେ ରାହୁଲ ଗାନ୍ଧୀ । ଜବାବ ରଖିଲା ଟ୍ୱିଟର
କନକ ବ୍ୟୁରୋ : ସରକାରଙ୍କ ଚାପରେ କାମ କରୁଛି ସୋସିଆଲ ମିଡିଆ ଆପ୍ ଟ୍ୱିଟର । ଏପରି ଅଭିଯୋଗ କରିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ । ସରକାରଙ୍କ ଚାପର ବଶବର୍ତୀ ହୋଇ ଟ୍ୱିଟର ତାଙ୍କ ଫଲୋଅର୍ସଙ୍କ ସଂଖ୍ୟା ସୀମିତ କରୁଛି ବୋଲି ସେ ଅଭିଯୋଗ କରିଛନ୍ତି । ଏନେଇ ରାହୁଲ ଗାନ୍ଧୀ ଟ୍ୱିଟର ସିଇଓ ପରାଗ ଅଗ୍ରୱାଲଙ୍କୁ ଚିଠି ଲେଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାହୁଲ ଗାନ୍ଧୀ କହିଛନ୍ତି, ୨୦୨୧ ଅଗଷ୍ଟରେ ତାଙ୍କର ଆକାଉଣ୍ଟ କିଛି ସମୟ ପାଇଁ ଲକ୍ ହୋଇଯିବା ପରେ ତାଙ୍କ ଫଲୋଅର୍ସଙ୍କ ସଂଖ୍ୟା ବୃଦ୍ଧି ପାଉନାହିଁ । ରାହୁଲ ଦର୍ଶାଇଛନ୍ତି ଯେ, ପ୍ରତି ମାସରେ ସେ ୨ ଲକ୍ଷ ୩୦ ହଜାର ହାରରେ ନୂଆ ଫଲୋଅର୍ସ ପାଉଥିଲେ । କିଛି ମାସରେ ତାଙ୍କ ଫଲୋଅର୍ସଙ୍କ ସଂଖ୍ୟା ୬ ଲକ୍ଷ ୫୦ ହଜାର ପର୍ଯ୍ୟନ୍ତ ଯାଇଥିଲା । କିନ୍ତୁ ୨୦୨୧ ଅଗଷ୍ଟ ମାସରୁ ତାଙ୍କ ଅନୁଗାମୀଙ୍କ ସଂଖ୍ୟା ହ୍ରାସ ପାଇ ମାସକୁ ହାରାହାରି ଅଢେଇ ହଜାର ହୋଇଛି । ଏହି ସମୟ ମଧ୍ୟରେ ତାଙ୍କ ମୋଟ୍ ଫଲୋଅର୍ସଙ୍କ ସଂଖ୍ୟା ୧୯ ଦଶମିକ ୫ ମିଲିୟନରେ ସ୍ଥିର ରହିଛି ।
୨୦୨୧ ଅଗଷ୍ଟରେ ରାହୁଲ ଗାନ୍ଧୀ ଦିଲ୍ଲୀର ଜଣେ ଦୁଷ୍କର୍ମ ପୀଡ଼ିତାଙ୍କ ପରିବାରର ଫଟୋ ଟୁଇଟ୍ କରିବାରୁ ତାଙ୍କ ଆକାଉଣ୍ଟ ବିବାଦୀୟ ହୋଇପଡ଼ିଥିଲା । ବିଜେପିର ଅଭିଯୋଗ ପରେ ତାଙ୍କ ଆକାଉଣ୍ଟକୁ ୮ ଦିନ ପାଇଁ ଲକ୍ କରି ଦିଆଯାଇଥିଲା । ରାହୁଲ ଗାନ୍ଧୀଙ୍କ ଚିଠି ଉପରେ ପ୍ରତିକ୍ରିୟା ରହିଛି ଟ୍ୱିଟର । ଟ୍ୱିଟର କହିଛନ୍ତି, ମନିପ୍ୟୁଲେସନ୍ ଓ ସ୍ପାମ୍ ଉପରେ ଟ୍ୱିଟରର ଜିରୋ ଟଲୋରେନ୍ସ ଆଭିମୁଖ୍ୟ ରହିଛି । ଏହି ନୀତି ଉଲଂଘନ ପାଇଁ ପ୍ରତି ସପ୍ତାହରେ ଲକ୍ଷ ଲକ୍ଷ ଆକାଉଣ୍ଟ ହଟାଯାଉଛି ।