କନକ ବ୍ୟୁରୋ : ନ୍ୟାସନାଲ ହେରାଲ୍ଡ ମନି ଲଣ୍ଡରିଂ ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀ ଆଜି ପ୍ରବର୍ତ୍ତନ ନିର୍ଦ୍ଦେଶାଳୟରେ ହାଜର ହେବେ । ମନି ଲଣ୍ଡରିଂ ମାମଲାରେ ରାହୁଲଙ୍କୁ ଇଡି ଜୁନ୍ ୨ ତାରିଖରେ ହାଜର ହେବାକୁ ଡକାଇଥିଲା । କିନ୍ତୁ ବିଦେଶରେ ଥିବା କହି ରାହୁଲ୍ ହାଜର ହୋଇପାରିନଥିଲେ । ଇଡିର ଦ୍ୱିତୀୟ ନୋଟିସ୍ ପରେ ରାହୁଲ ଗାନ୍ଧୀ ଆଜି ହାଜର ହେବେ । ଇଡିରେ ରାହୁଲ ଗାନ୍ଧୀଙ୍କ ହାଜର ହେବାକୁ ନେଇ କଂଗ୍ରେସ ସତ୍ୟାଗ୍ରହ କରିବାକୁ ଘୋଷଣା କରିଛି ।
Kanak News is now on WhatsApp
Join and get latest news updates delivered to you via WhatsApp
ଇଡିରେ ରାହୁଲ ହାଜର ହେବାକୁ ଥିବା ବେଳେ ସାରା ଦେଶରେ ପ୍ରାୟ ୨୫ଟି ଇଡି ଆଞ୍ଚଳିକ କାର୍ଯ୍ୟାଳୟ ସମ୍ମୁଖରେ କଂଗ୍ରେସ ବିରୋଧ ପ୍ରଦର୍ଶନ କରିବ । ସକାଳ ୯ଟା ବେଳେ କଂଗ୍ରେସ ନେତା ଓ କର୍ମକର୍ତ୍ତା ପାର୍ଟି ମୁଖ୍ୟାଳୟରେ ଏକତ୍ରିତ ହେବେ, ଯାହା ପରେ ଜନପଥ ରୋଡସ୍ଥିତ ଇଡି କାର୍ଯ୍ୟାଳୟ ପର୍ଯ୍ୟନ୍ତ ପଦଯାତ୍ରା କରିବାକୁ ଯୋଜନା କରିଥିଲେ । କିନ୍ତୁ ରାଲିକୁ ଦିଲ୍ଲୀ ପୋଲିସ୍ ଅନୁମତି ଦେଇନାହିଁ । ପୋଲିସର କହିବା ଅନୁସାରେ, କଂଗ୍ରେସ କର୍ମୀମାନେ ଆକବର ରୋଡରେ ଧାରଣା ଦେବା ପାଇଁ ଅନୁମତି ମାଗିଥିଲେ ।
ନ୍ୟାସନାଲ ହେରାଲ୍ଡ ମନିଂ ଲଣ୍ଡରିଂ ମାମଲାରେ ସୋନିଆଙ୍କୁ ଜୁନ ୮ ତାରିଖରେ ଇଡିରେ ହାଜର ହେବାର ଥିଲା । କିନ୍ତୁ ୨ ତାରିଖରେ ସୋନିଆ କୋଭିଡରେ ଆକ୍ରାନ୍ତ ହୋଇଥିଲେ । ଏହାପରେ ସେ ଇଡିରେ ହାଜର ହେବାକୁ ସମୟ ମାଗିଥିଲେ । ଏହାପରେ ଜୁନ ୨୩ ତାରିଖରେ ସୋନିଆଙ୍କୁ ହାଜର ହେବାକୁ ଇଡି କହିଥିଲା । ଏବେ ହସପିଟାଲରେ ଭର୍ତ୍ତି ହେବା ପରେ ସୋନିଆ ଇଡିରେ ହାଜର ହେବେ ନା ନାହିଁ ତାହା ସ୍ପଷ୍ଟ ହୋଇନାହିଁ ।