ରାହୁଲ ଗାନ୍ଧୀଙ୍କ ‘ଜୟ ସିୟାରାମ’ ବୟାନକୁ ନେଇ ବିବାଦ । ବିଜେପି କହିଲା, ବିଜେପିକୁ ଦରକାର ନାହିଁ ରାହୁଲଙ୍କ ସାର୍ଟିଫିକେଟ
କନକ ବ୍ୟୁରୋ : ଭାରତ ଯୋଡ଼ ଯାତ୍ରା ବେଳେ ରାହୁଲ ଗାନ୍ଧୀଙ୍କ ଏକ ବୟାନକୁ ନେଇ ବିବାଦ ଜୋର ଧରିଛି । ଶୁକ୍ରବାର ବିଜେପି ଓ ଆରଏସଏସକୁ ‘ଜୟ ସିୟାରାମ’ କହିବାକୁ ପରାମର୍ଶ ଦେଇଥିଲେ କଂଗ୍ରେସ ନେତା ତଥା ସାଂସଦ ରାହୁଲ ଗାନ୍ଧୀ । ରାହୁଲଙ୍କ ଏହି ବୟାନ ପରେ ବିଜେପି ଆକ୍ରମଣାତ୍ମକ ଆଭିମୁଖ୍ୟ ଆପଣାଇଛି । ରାହୁଲଙ୍କୁ ଟାର୍ଗେଟ୍ କରି ବିଜେପି ନେତା ଶାହନୱାଜ ହୁସେନ୍ କହିଛନ୍ତି ଯେ ବିଜେପିକୁ ରାହୁଲ ଗାନ୍ଧୀଙ୍କ ସାର୍ଟିଫିକେଟର ଆବଶ୍ୟକତା ନାହିଁ । ସେହିପରି ଅନ୍ୟ ବିଜେପି ନେତା ମଧ୍ୟ ରାହୁଲଙ୍କୁ ସମାଲୋଚନା କରିଛନ୍ତି । କହିଛନ୍ତି ଯେ ଭାରତୀୟ ସଂସ୍କୃ୍ତି ବିଷୟରେ ରାହୁଲଙ୍କୁ କିଛି ଜଣାନାହିଁ । ସେହିପରି ଏଆଇଏମଆଇଏମ୍ ମୁଖ୍ୟ ଅସଦୁଦ୍ଦିନ ୱୱେସୀ ରାହୁଲଙ୍କୁ ସମାଲୋଚନା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଧ୍ୟ ପ୍ରଦେଶରେ ଭାରତ ଯୋଡ଼ ଯାତ୍ରା ସମୟରେ ରାହୁଲ ଗାନ୍ଧୀ ଏକ ସଭାକୁ ସମ୍ବୋଧନ କରି ‘ଜୟ ଶ୍ରୀରାମ’, ‘ଜୟ ସିୟାରାମ’ ଏବଂ ‘ହେ ରାମ’ ନାରାକୁ ନିଜ ଢଙ୍ଗରେ ବର୍ଣ୍ଣନା କରିଥିଲେ । ଆଉ ଏହାରି ଭିତରେ ସେ ଆରଏସଏସ ଓ ବିଜେପିକୁ ଟାର୍ଗେଟ କରିଥିଲେ । ଆରଏସଏସ ଓ ବିଜେପି ସଦସ୍ୟମାନେ ବ୍ୟକ୍ତିଗତ ସ୍ତରରେ ଭଗବାନ ରାମଙ୍କ ଜୀବନଶୈଳୀକୁ ଆଦୌ ମାନନ୍ତି ନାହିଁ । ସେମାନେ ‘ସିୟାରାମ’ ଓ ‘ସୀତାରାମ’ କେବେ କୁହନ୍ତି ନାହିଁ । କାରଣ ସେମାନଙ୍କ ସଂଗଠନରେ ଗୋଟିଏ ବି ମହିଳା ନାହାନ୍ତି । ତେଣୁ ସେମାନଙ୍କ ସଂଗଠନରେ ସୀତାଙ୍କୁ କୌଣସି ସ୍ଥାନ ମିଳିନାହିଁ ବୋଲି ରାହୁଲ କହିଥିଲେ ।