କନକ ବ୍ୟୁରୋ: କୋଣାର୍କ ସୂର୍ଯ୍ୟମନ୍ଦିରରୁ ବାଲି କାଢିବା ପାଇଁ ଭାରତୀୟ ପ୍ରତ୍ନତତ୍ତ୍ୱ ବିଭାଗ ନିଷ୍ପତ୍ତି କରିବା ପରେ, ଏହାକୁ ନେଇ ପ୍ରଶ୍ନ ଉଠାଇଛନ୍ତି ସ୍ଥାନୀୟ ଗବେଷକ । କାହା ପରାମର୍ଶରେ ଏଏସଆଇ ଏଭଳି ନିଷ୍ପତ୍ତି କରିଛି ଏବଂ ବାଲି କାଢିବା ହିଁ ଏକମାତ୍ର ବିକଳ୍ପ କି ବୋଲି ସେମାନେ ପ୍ରଶ୍ନ କରିଛନ୍ତି । ବାଲି କାଢିବା ଫଳରେ ଏହା ଅଧିକ ସୁରକ୍ଷିତ ହେବ ନା ବିପଦ ବଢାଇବ, ତାକୁ ନେଇ ସନ୍ଦିହାନ ହୋଇପଡିଛନ୍ତି । ବାଲି କାଢିବା ପାଇଁ ଭୂମି ପୂଜନ କରାଯାଇ ସାରିଲାଣି । ଅର୍ଥାତ ଏଏସଆଇ ପ୍ରକ୍ରିୟା ଆରମ୍ଭ କରିବାକୁ ପ୍ରସ୍ତୁତ ହେଉଥିବାବେଳେ ଏତେବଡ କାମ ପାଇଁ ରାଜ୍ୟ ସରକାରଙ୍କ କୌଣସି ପଦାଧିକାରୀଙ୍କୁ ସାମିଲ କରାନଯିବା ସ୍ଥାନୀୟ ଲୋକଙ୍କ ସନ୍ଦେହକୁ ବଢାଇ ଦେଇଛି । ଉପରକୁ ଥିବା ଜଗମୋହନକୁ ପ୍ରଥମେ ସୁରକ୍ଷା ନଦେଇ, ବାଲି କାଢିବା ପାଇଁ ହୋଇଥିବା ନିଷ୍ପତିକୁ ସେମାନେ ସନ୍ଦେହ ଚକ୍ଷୁରେ ଦେଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଗତ ଦିନରେ ସୂର୍ଯ ମନ୍ଦିର ଜଗମୋହନରୁ ବାରମ୍ବାର ପଥର ଖସିବା ପରେ ୨୦୦୬ ମସିହାରେ ଏକ ୧୫ ଜଣିଆ ବିଶେଷଜ୍ଞ ଦଳ ସ୍ଥିତି ଅନୁଧ୍ୟାନ କରି ଗର୍ଭଗୃହର ବାଲି ୧୬ ଫୁଟ ତଳକୁ ଖାସିଯାଇଥିବା ରିପୋର୍ଟ ଦେଇଥିଲେ । ତେଣୁ ଭିତର କାନ୍ଥରେ ଚାପ ସୃଷ୍ଟି ହୋଇ ବିଭିନ୍ନ ସ୍ଥାନରେ ଫାଟ ଦେଖାଯାଇଥିବା ସୂଚନା ଦେଇଥିଲେ । ଏହାପରେ ବାଲି ନିଷ୍କାସନ ସହ ଭିତରପଟ କାନ୍ଥକୁ ଷ୍ଟେନଲେସ ଷ୍ଟିଲ ସପୋର୍ଟ ଦେବାପାଇଁ ବିଶେଷଜ୍ଞମାନେ ସେତେବେଳେ ପରାମର୍ଶ ଦେଇଥିଲେ । ହେଲେ ଏଏସଆଇ ଏହି ପରାମର୍ଶକୁ ଗୁରୁତ୍ୱ ନଦେବାରୁ ୨୦୦୯ରେ ଜଗମୋହନରୁ ୬ଥର ପଥର ଖସିଥିବା କୁହାଯାଉଛି । ଏବେ ପୁଣି ଏଏସଆଇର ମନମୁଖୀ କାର୍ଯ୍ୟକୁ ନେଇ ପ୍ରଶ୍ନ କରିଛି କୋଣାର୍କ ସୁରକ୍ଷା ସମିତି ।
୧୨୦ ବର୍ଷ ତଳେ ୧୩୦ ଫୁଟ ଉଚ୍ଚର ବାଲି ଭର୍ତ୍ତି କରାଯାଇଥିଲା । ଢାଞ୍ଚାକୁ ସୁରକ୍ଷା ଦେବା ପାଇଁ ବ୍ରିଟିଶ ସରକାର ଏପରି କରିଥିଲେ । ବିଶିଷ୍ଟ ସ୍ଥପତି ବିଶେନ ସ୍ୱରୂପଙ୍କ ନେତୃତ୍ୱରେ ବାଲି ଭର୍ତ୍ତି କରାଯାଇଥିଲା । ୧୨୦ ବର୍ଷ ଭିତରେ ବାଲି ଦବି ଯାଇଥିବାରୁ ବିପଦରେ ଅଛି କୋଣାର୍କ । ବିଶେଷଜ୍ଞ କହିଛନ୍ତି ଯେଉଁ ରାସ୍ତାଦେଇ ବିସେନ ସ୍ୱରୂପ ପଦାକୁ ଆସିଥିଲେ ଏବେ ସେହି ବାଟେ ବାଲି କାଢିବାକୁ ଯୋଜନା କରୁଛି ଏଏସଆଇ ।
କେମିତି ବାଲିମୁକ୍ତ ହେବ ବ୍ଲାକ ପାଗୋଡା ତାକୁ ନେଇ ସମସ୍ତଙ୍କ ମନରେ ସନ୍ଦେହ ରହିଛି । ବିଶେଷଜ୍ଞ ମଧ୍ୟ ଆଶଙ୍କା କରୁଛନ୍ତି ବାଲି ବାହାର କରିବା ପରେ ଜଣାପଡିବ କଣସବୁ ଆହ୍ୱାନ ଆଗକୁ ଆସିବ । ତେଣୁ କୋଣାର୍କକୁ ନେଇ କଣ ଆକଳନ କରିଛି ଭାରତୀୟ ପ୍ରତ୍ନତତ୍ତ୍ୱ ବିଭାଗ ଏବଂ କିଭଳି ଏହି ବାଲିକଢା ପ୍ରକ୍ରିୟାକୁ କାର୍ଯ୍ୟକାରୀ କରିବ ସେନେଇ ବିସ୍ତୃତ ସୂଚନା ସାର୍ବଜନୀନ କରିବାକୁ ଦାବି ଉଠୁଛି ।