ପୁରୀ ଜିଲ୍ଲାରେ ଚାରା ଘୋଟାଲା ଅଭିଯୋଗ : ଗଛ ନଲଗାଇ ଅର୍ଥ ହରିଲୁଟ ଅଭିଯୋଗ ପରେ ପ୍ରଶାସନର ତନାଘନା, ୨୧ଟି ଫାଇଲକୁ ସ୍ଥଗିତ ରଖି ତଦନ୍ତ ଜାରି
କନକ ବ୍ୟୁରୋ : ମୃତ୍ତିକା ସଂରକ୍ଷଣ ବିଭାଗ ବିରୋଧରେ ଚାରା ଦୁର୍ନୀତି ଅଭିଯୋଗ । ବିଭାଗ ଚାରା ରୋପଣ ନକରି ଅର୍ଥ ହରିଲୁଟ କରିଥିବା ଅଭିଯୋଗ ଆସିଛି ପୁରୀ ଅସ୍ତରଙ୍ଗ ବ୍ଲକରୁ । ମହାତ୍ମାଗାନ୍ଧି ନିଶ୍ଚିତକର୍ମ ନିଯୁକ୍ତି ଯୋଜନାରେ ବୃକ୍ଷ ରୋପଣ ପାଇଁ ନିର୍ଦ୍ଦେଶ ଥିବା ବେଳେ ଏଥିରେ ବ୍ୟତିକ୍ରମ ହୋଇଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପୁରୀ ଜିଲ୍ଲା ଅସ୍ତରଙ୍ଗ ବ୍ଲକରେ ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଚାରା ରୋପଣ କରାଯାଇଛି । ଏଥିରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି । ୨୦୧୭-୧୮ ଆର୍ଥିକ ବର୍ଷରେ ଚାରା ରୋପଣରେ ଅର୍ଥ ଆତ୍ମସାତ ହୋଇଛି । ଅସ୍ତରଙ୍ଗ ବ୍ଲକ ନୂଆଗଡ ପଂଚାୟତରେ ଜବକାର୍ଡ ଧାରୀଙ୍କୁ କାମ ନଦେଇ ବିନା ଜବକାର୍ଡ ଧାରୀ ଶ୍ରମିକଙ୍କୁ ନେଇ କାମ ଦିଆଯାଇଛି । ଏମିତିକି ମୃତ ବ୍ୟକ୍ତି, ରାଜ୍ୟ ବାହାରେ ଥିବା ଲୋକଙ୍କ ବ୍ୟାଙ୍କ ଆକାଉଂଟକୁ ଚାରା ରୋପଣ ଟଙ୍କା ଯାଇଥିବା ଅଭିଯୋଗ ହୋଇଛି ।
୧. ଅସ୍ତରଙ୍ଗ ବ୍ଲକର ୫ଟି ପଂଚାୟତରେ ଚାରା ରୋପଣ କରାଯାଇଛି ।
୨. ରାସ୍ତାକଡ, ବାଡିବଗିଚା ଓ ସରକାରୀ ଜାଗାରେ ଆମ୍ବ, ନଡିଆ ଭଳି ୫ ପ୍ରକାରର ଗଛ ଲଗାଯାଇଛି ।
୩. ସେଥିପାଇଁ ୧୦ ଲକ୍ଷ ଟଙ୍କା ଖର୍ଚ କରାଯାଇଛି ।
ଜବକାର୍ଡ ଧାରୀ ଶ୍ରମିକ ଏଥିରେ କାମ କରୁଛନ୍ତି । ଯେଉଁମାନେ କାମ ପାଇନାହାନ୍ତି ସେମାନେ ଦୁର୍ନୀତି ଅଭିଯୋଗ ଆଣିଥିବା କହିଛନ୍ତି କାମ କରୁଥିବା କର୍ମଚାରୀ । ଚାରା ରୋପଣରେ ଘୋଟାଲା ହୋଇଥିବା ଅଭିଯୋଗ ହେବା ପରେ ପୁରୀ ଜିଲ୍ଲା ପ୍ରଶାସନ ୨୧ଟି ଫାଇଲକୁ ସ୍ଥଗିତ ରଖି ତଦନ୍ତ ଚଳାଇଛନ୍ତି ।
ପରିବେଶ ସୁରକ୍ଷା ଓ ମୃତ୍ତିକା ସଂରକ୍ଷଣ ପାଇଁ ସବୁଜ ବଳୟ ସୃଷ୍ଟି କରିବାରୁ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ବାତ୍ୟା ଫୋନି ମାଡରେ ନଷ୍ଟ ହୋଇଥିବା ସବୁଜ ବଳୟର କ୍ଷତି ଭରଣା ପାଇଁ ପୁଣି ଚାରା ରୋପଣ କରାଯାଉଛି । ନୂଆଗଡ ପଂଚାୟତର ୪ଟି ପ୍ରକଳ୍ପରେ ଗଛ ଲଗାଯାଉଛି । ଏ ବାବଦରେ ୨୦ ଲକ୍ଷ ଟଙ୍କା ଖର୍ଚ୍ଚ କରିବାର ଯୋଜନା ରଖିଛି ପ୍ରଶାସନ ।