‘ପ୍ରଧାନମନ୍ତ୍ରୀଙ୍କ ହତ୍ୟା ଷଡଯନ୍ତ୍ର ପାଇଁ ପଞ୍ଜାବ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଉ’ । ସାମ୍ବାଦିକ ସମ୍ମିଳନୀ କରି ସାଂଘାତିକ ଅଭିଯୋଗ ଆଣିଲେ ଆସାମ ମୁଖ୍ୟମନ୍ତ୍ରୀ ।
କନକ ବ୍ୟୁରୋ : ପଞ୍ଜାବ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଉ । ପ୍ରଧାନମନ୍ତ୍ରୀଙ୍କ ହତ୍ୟାର ଷଡଯନ୍ତ୍ର ପାଇଁ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନିଙ୍କୁ ଗିରଫ କରାଯାଉ ବୋଲି କହିଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା । ସାମ୍ବାଦିକ ସମ୍ମିଳନୀ କରି ଚନ୍ନି ସରକାର ଉପରେ ବର୍ଷିବା ସହ ପ୍ରଧାନମନ୍ତ୍ରୀଙ୍କ ହତ୍ୟା ପାଇଁ ଉଭୟ ଚନ୍ନି ସରକାର ଓ କଂଗ୍ରେସ ଷଡଯନ୍ତ୍ର କରିଥିଲେ ବୋଲି କହିଛନ୍ତି ହିମନ୍ତ । ନିଜ ଚୌକି ବଞ୍ଚାଇବାକୁ ପ୍ରଧାନମନ୍ତ୍ରୀଙ୍କ ଉପରେ ଆକ୍ରମଣ କରିବାକୁ ବୋଧହୁଏ ଷଡଯନ୍ତ୍ର କରିଥିଲେ ଚନ୍ନି । କିନ୍ତୁ ଏହାର ଜବାବ ଜନତା ନିଶ୍ଚୟ ଦେବେ ।
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀଙ୍କୁ ହତ୍ୟା କରିବାକୁ ପଞ୍ଜାବ ମୁଖ୍ୟମନ୍ତ୍ରୀ କୌଣସି ବିଦେଶୀ ଶତ୍ରୁଙ୍କ ସହ ମିଶି ଷଡଯନ୍ତ୍ର କରିଥିବେ ବୋଲି କହିଛନ୍ତି ହିମନ୍ତ । ତେଣୁ ଏହାର ନିରପେକ୍ଷ ଯାଞ୍ଚର ଆବଶ୍ୟକତା ରହିଥିଲା । ସୁପ୍ରିମକୋର୍ଟକୁ ମାମଲା ଯିବା ପରେ ପଞ୍ଜାବ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଡ୍ରାମା କରୁଛନ୍ତି । ପ୍ରଧାନମନ୍ତ୍ରୀଙ୍କୁ ସଭାସ୍ଥଳ ପର୍ଯ୍ୟନ୍ତ ସୁରକ୍ଷିତ ଭାବେ ପହଞ୍ଚାଇବା ପଞ୍ଜାବ ସରକାରଙ୍କର ଦାୟିତ୍ୱ ଥିଲା କିନ୍ତୁ ତାହା ହୋଇପାରିଲା ନାହିଁ । ଆସାମର ମୁଖ୍ୟମନ୍ତ୍ରୀ କହିଛନ୍ତି, ଏକ ଟେଲିଭିଜନ ଚ୍ୟାନେଲ ଦ୍ୱାରା କରାଯାଇଥିବା ଷ୍ଟିଙ୍ଗ୍ ଅପରେସନରୁ ସ୍ପଷ୍ଟ ହୋଇଛି ଯେ, ପ୍ରଧାନମନ୍ତ୍ରୀଙ୍କ କାରକେଡ ଯେଉଁ ଅଞ୍ଚଳରେ ଅଟକି ରହିଥିଲା ସେଠାରେ ପ୍ରଦର୍ଶନ ହେବ ବୋଲି ପୂର୍ବରୁ ପୋଲିସକୁ ସୂଚନା ମିଳିଥିଲା । ଏନେଇ ଉପରିସ୍ଥ ଅଧିକାରୀ ମଧ୍ୟ ଜାଣିଥିଲେ । ଏହାସତ୍ତେ୍ୱ ମଧ୍ୟ ସୁରକ୍ଷା ବ୍ୟବସ୍ଥାକୁ କଡାକଡି କରାଗଲା ନାହିଁ । ଏହାଛଡା ଆନ୍ଦୋଳନରେ ଚାଷୀ ନୁହେଁ ବରଂ ଖଲିସ୍ତାନୀ ସମର୍ଥକ ବସିଥିଲେ । ଏହାବାଦ୍ ପ୍ରଧାନମନ୍ତ୍ରୀଙ୍କ କାରକେଡ ଅଟକିଥିବା ସ୍ଥାନ ଠାରୁ ମାତ୍ର ୧୦ କିଲୋମିଟର ଦୂରରେ ପାକିସ୍ତାନ ସୀମା ରହିଥିଲା । ଯେଉଁଠାରୁ ବେଶ ସହଜରେ ଶତ୍ରୁ ଦେଶର ଡ୍ରୋନ, ସ୍ନାଇପର, ମିସାଇଲ ରେଞ୍ଜ ପ୍ରଧାନମନ୍ତ୍ରୀଙ୍କ କାରକେଡ ଆସୁଥିଲା । ତେଣୁ ସୁରକ୍ଷା ବ୍ୟବସ୍ଥାକୁ କିଭଳି କଡାକଡି କରାଗଲା ନାହିଁ ବୋଲି ପ୍ରଶ୍ନ କରିଛନ୍ତି ହିମନ୍ତ ।
ସବୁଠୁ ବଡ କଥା ହେଉଛି, ପ୍ରଧାନମନ୍ତ୍ରୀ କାରକେଡ ଅଟକିବା ଘଟଣା କଂଗ୍ରେସର ହାଇକମାଣ୍ଡଙ୍କ ସହ ଆଲୋଚନା କରିଥିଲେ ପଞ୍ଜାବ ମୁଖ୍ୟମନ୍ତ୍ରୀ । କିଭଳି ଦଳୀୟ ଫୋରମରେ ଏହା ଆଲୋଚନା କରାଗଲା ତାହାକୁ ନେଇ ହିମନ୍ତ ପ୍ରଶ୍ନ କରିଛନ୍ତି । ପ୍ରଧାନମନ୍ତ୍ରୀଙ୍କ ଗସ୍ତ ଦିନ ପଞ୍ଜାବ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ମଧ୍ୟ ସ୍ୱାଗତ କରିବାକୁ ବିମାନବନ୍ଦରରେ ପହଞ୍ଚିନଥିଲେ । କୋଭିଡ ସଂକ୍ରମିତଙ୍କ ସଂସ୍ପର୍ଶରେ ଆସିଥିବାରୁ ଦୂରେଇ ରହିଥିବା କହିଥିଲେ କିନ୍ତୁ ଏହି ଘଟଣାର ପରଦିନ କିଭଳି ଚନ୍ନି ପ୍ରେସମିଟ୍ କରି ସଫେଇ ରଖିଲେ ବୋଲି ପ୍ରଶ୍ନବାଣ ମାରିଛନ୍ତି । ଚନ୍ନି ସରକାରଙ୍କ କାର୍ଯ୍ୟକଳାପ ଓ କଂଗ୍ରେସ ନେତାଙ୍କ ବୟାନବାଜି ହିଁ ଦର୍ଶାଉଛି ଯେ, ପ୍ରଧାନମନ୍ତ୍ରୀଙ୍କୁ ହତ୍ୟା କରିବାକୁ ବଡ ଧରଣର ପ୍ରାୟୋଜିତ ଷଡଯନ୍ତ୍ର ହୋଇଥିଲା ।
ଗତ ୫ ତାରିଖରେ ପଞ୍ଜାବରେ ଏକ ସଭାରେ ଯୋଗଦେବାକୁ ଯାଉଥିବା ବେଳେ ଫିରୋଜପୁର ଓଭରବ୍ରିଜ ଉପରେ ପ୍ରଧାନମନ୍ତ୍ରୀଙ୍କ କାରକେଡ ପ୍ରାୟ ୧୫ରୁ ୨୦ ମିନିଟ୍ ଫଶି ରହିଥିଲା । ଚାଷୀ ପ୍ରଦର୍ଶନ କରୁଥିବା କାରଣରୁ ପ୍ରଧାନମନ୍ତ୍ରୀଙ୍କ କାରକେଡକୁ ଅଟକାଯାଇଥିଲା । ଆଉ ଏହାପରେ ସଭାସ୍ଥଳକୁ ନ ଯାଇ ବିମାନବନ୍ଦର ଫେରି ଆସିଥିଲେ ପ୍ରଧାନମନ୍ତ୍ରୀ । ଏହି ଘଟଣାକୁ ନେଇ ଏବେ ବିଜେପି-କଂଗ୍ରେସ ମଧ୍ୟରେ ଜୋରଦାର ବୟାନବାଜି ଯୁଦ୍ଧ ଆରମ୍ଭ ହୋଇଛି ।