ଶ୍ରୀଲଙ୍କାରେ ପ୍ରଧାନମନ୍ତ୍ରୀ କାର୍ଯ୍ୟାଳୟକୁ ଅକ୍ତିଆରକୁ ନେଲେ ପ୍ରଦର୍ଶନକାରୀ। ସଂସଦ ଭବନକୁ ମଧ୍ୟ କଲେ କବଜା।
କନକ ବ୍ୟୁରୋ: ଶ୍ରୀଲଙ୍କା ରାଷ୍ଟ୍ରପତି ଗୋଟାବାୟା ରାଜପକ୍ଷେ ଇସ୍ତଫା ନଦେଇ ମାଳଦ୍ୱୀପ ଫେରାର ହୋଇଯିବା ଖବର କଲମ୍ବୋରେ ନିଆଁ ଲଗାଇ ଦେଇଛି । ରାଷ୍ଟ୍ରପତି ଗୋଟାବାୟାଙ୍କ ମାଳଦ୍ୱୀପ ଫେରାର ଖବର ପରେ ହଜାର ହଜାର ଲୋକ ରାଜରାସ୍ତାକୁ ଓହ୍ଲାଇ ସଂସଦ ଓ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ କବଜା କରିଛନ୍ତି । ଅଧବାଟରେ ସେମାନଙ୍କୁ ରୋକିବା ପାଇଁ ସୁରକ୍ଷା କର୍ମୀ, ଲୁହବୁହା ଗ୍ୟାସ, ପାଣି ମାଡ ଓ ଫାଙ୍କା ଗୁଳି ଚାଳନା କରିଥିଲେ ମଧ୍ୟ କିଛି ପ୍ରଭାବ ପଡିନାହିଁ । ପ୍ରଧାନମନ୍ତ୍ରୀ କାର୍ଯ୍ୟାଳୟରେ ଭଙ୍ଗାରୁଜା ଓ ପୋଡାଜଳା କରିଛନ୍ତି ଉତ୍ତ୍ୟକ୍ତ ଜନତା ଶ୍ରୀଲଙ୍କା ପତାକା ଉଡାଇଛନ୍ତି । ଖାଲି ଏତିକି ନୁହେଁ ଦେଶର ସରକାରୀ ଟିଭି ଚ୍ୟାନେଲକୁ ନିଜ କବଜାକୁ ନେଇଥିଲେ ସରକାର ବିରୋଧୀ ଆନ୍ଦୋଳନକାରୀ ।
Kanak News is now on WhatsApp
Join and get latest news updates delivered to you via WhatsApp
ଗୋଟାବାୟା ଦେଶ ଛାଡି ଚାଲିଯିବା ପରେ ଶ୍ରୀଲଙ୍କାର କାର୍ଯ୍ୟକାରୀ ସଭାପତି ରାନିଲ ବିକ୍ରମସିଂଘେ ଦେଶର ନୂଆ କାର୍ଯ୍ୟନିର୍ବାହୀ ରାଷ୍ଟ୍ରପତି ହୋଇଛନ୍ତି । ବିକ୍ଷୋଭକାରୀଙ୍କ ଅରାଜକତାକୁ ନେଇ ସେ କହିଛନ୍ତି କିଛି ଫାଶୀବାଦୀ ସରକାରକୁ ନିଜ ହାତକୁ ନେବାକୁ ଉଦ୍ୟମ କରୁଛନ୍ତି । ସ୍ଥିତିକୁ ନିୟନ୍ତ୍ରଣ କରିବା ପାଇଁ ସେ ଜରୁରୀକାଳୀନ ପରିସ୍ଥିତି ଜାରି କରିଛନ୍ତି ।
ଶ୍ରୀଲଙ୍କାକୁ ଅର୍ଥନୈତିକ ଓ ରାଜନୈତିକ ସଙ୍କଟ ଭିତରେ ଛାଡିଦେଇ ରାଷ୍ଟ୍ରପତି ଗୋଟାବାୟା ରାତି ଅଧିଆ ବାୟୁସେନାର ସ୍ୱତନ୍ତ୍ର ପ୍ଲେନରେ ମାଳଦ୍ୱୀପ ଚାଲିଯାଇଛନ୍ତି । ସେଠାରୁ ସିଙ୍ଗାପୁର ପରିବାର ସହ ସେ ଚାଲି ଆସିଥିବା କୁହାଯାଉଛି । ଆଗକୁ ଦୁବାଇ ଯାଇ ଗୋଟାବାୟ ଇସ୍ତଫା ଦେଇପାରନ୍ତି ବୋଲି ଚର୍ଚ୍ଚା ହେଉଛି ।