କନକ ବ୍ୟୁରୋ : ଭାରତୀୟ କ୍ରିକେଟର ପୃଥ୍ୱୀ ଶ’ ଓ ମଡେଲ ସପନା ଗିଲଙ୍କ ମଧ୍ୟରେ ପାଟିତୁଣ୍ଡ ଘଟଣାକୁ ଏହା ଭିତରେ ବେଶ କିଛି ମାସ ବିତି ଗଲାଣି । ଏପରିକି ଗତ କିଛି ଦିନ ପୂର୍ବେ ପୃଥ୍ୱୀ ଶ’ଙ୍କୁ ଏହି ଘଟଣାରେ ନିର୍ଦ୍ଦୋଷ ବୋଲି କହିଛି ପୋଲିସ । କିନ୍ତୁ ଏହା ଭିତରେ ଏକ ସିସିଟିଭି ଭିଡ଼ିଓ ସାମ୍ନାକୁ ଆସିଛି । ଯେଉଁଥିରେ କେମିତି ବିବାଦ ଆରମ୍ଭ ହୋଇଥିଲା ତାହା ଦେଖିବାକୁ ମିଳିଛି ।

Advertisment

ଏହି ଭିଡ଼ିଓ ଏବେ କୋର୍ଟରେ ଉପସ୍ଥାପନ କରାଯାଇଛି । ଯେଉଁଥିରେ ଦେଖିବାକୁ ମିଳିଛି ଯେ, ସପନା ଗିଲଙ୍କ ବନ୍ଧୁ ଶୋଭିତ ଠାକୁର ସେଲଫି ନେବାକୁ ପୃଥ୍ୱୀଙ୍କ ପାଖକୁ ଯାଇଥିଲେ । ଅନ୍ୟପଟେ ସପନା ନିଜ ଟେବୁଲରେ ବସିଥିଲେ । ତେବେ କୌଣସି କାରଣ ବସତଃ ଶୋଭିତ ଓ ପୃଥ୍ୱୀଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ଏବଂ ଏହା ପରବର୍ତ୍ତୀ ସମୟରେ ମାରପିଟ୍ ଯାଏଁ କଥା ଯାଇଥିଲା । ତେବେ ପୃଥ୍ୱୀଙ୍କ ଜଣେ ବନ୍ଧୁ ଶୋଭିତଙ୍କୁ ଅଟକାଉଥିବା ବେଳେ ସପନା ଏହି ଘଟଣା ଦେଖିଥିଲେ । ତୁରନ୍ତ ନିଜ ବନ୍ଧୁଙ୍କୁ ବଞ୍ଚାଇବାକୁ ଏଥିରେ ହସ୍ତକ୍ଷେପ କରିଥିଲେ । ତେବେ କ୍ଲବ ଭିତରୁ ଆରମ୍ଭ ହୋଇଥିବା ଏହି ପାଟିତୁଣ୍ଡ କ୍ଲବ ବାହାର ପର୍ଯ୍ୟନ୍ତ ପହଞ୍ଚିଥିଲା । ପରେ ଏନେଇ ଥାନାରେ ଅଭିଯୋଗ ହେବା ପରେ ମୁମ୍ବାଇ ପୋଲିସ ଯାଞ୍ଚ ଆରମ୍ଭ କରିଥିଲା । ଏପରିକି ପୃଥ୍ୱୀଙ୍କ ନାଁରେ ଅସଦାଚାରଣ ଅଭିଯୋଗ ଆଣିଥିଲେ ସପନା ଗିଲ ।

ପୋଲିସ ସିସିଟିଭି ଫୁଟେଜ ଯାଞ୍ଚ କରିବା ପରେ ଉଲ୍ଲେଖ କରିଥିଲା ଯେ, ସପନା ହାତରେ ବେସବଲ ବ୍ୟାଟ୍ ଧରି ପୃଥ୍ୱୀ ଶଙ୍କ କାରକୁ ପିଛା କରିଥିଲେ । ଏପରିକି ସପନା ଓ ତାଙ୍କ ବନ୍ଧୁ ପୃଥ୍ୱୀଙ୍କ କାର କାଚକୁ ମଧ୍ୟ ଭାଙ୍ଗିଥିଲେ ।