ସାଧାରଣ ନିର୍ବାଚନ ପାଇଁ ବାଜିଲା କି ବିଗୁଲ ? ପ୍ରସ୍ତୁତି ପାଇଁ ସବୁ ଜିଲ୍ଲାପାଳଙ୍କୁ ଚିଠି ଲେଖିଲେ ମୁଖ୍ୟ ନିର୍ବାଚନ ଅଧିକାରୀ
କନକ ବ୍ୟୁରୋ : ରାଜ୍ୟରେ ଆଗୁଆ ନିର୍ବାଚନ ନେଇ ପୁଣି ଜୋରଧରିଲା ଚର୍ଚ୍ଚା । ସାଧାରଣ ନିର୍ବାଚନ ପାଇଁ ରାଜ୍ୟ ନିର୍ବାଚନ ଆୟୋଗଙ୍କ ପ୍ରସ୍ତୁତି ଆରମ୍ଭ ହୋଇଥିବାବେଳେ ପୁଣି ଏହି ପ୍ରସଙ୍ଗ ସାମ୍ନାକୁ ଆସିଛି । ଯଦିଓ ଜିଲ୍ଲାପାଳମାନଙ୍କୁ ଲେଖାଯାଇଥିବା ଚିଠିରେ ମାର୍ଚ୍ଚରୁ ମେ’ ମଧ୍ୟରେ ନିର୍ବାଚନ ହୋଇପାରେ ବୋଲି ସୂଚନା ଦିଆଯାଇଛି । ବିଜେଡି କହିଛି ଭୋଟର ତାଲିକା ସଂଶୋଧନ ଅବଧିକୁ ଅକ୍ଟୋବର ଯାଏଁ ବଢାଯାଇଥିବାରୁ ଆଗୁଆ ନିର୍ବାଚନ ନେଇ ସଂକେତ ମିଳୁଛି । ତଥାପି ଦଳ ନିର୍ବାଚନ ପାଇଁ ପ୍ରସ୍ତୁତ ଅଛି । ବିଜେପି ମଧ୍ୟ ସମାନ ଢଙ୍ଗରେ ପ୍ରତିକ୍ରିୟା ରଖିଥିବାବେଳେ କଂଗ୍ରେସ ଏହାକୁ ଗଣତନ୍ତ୍ରର ହତ୍ୟା ବୋଲି କହିଛି ।
Kanak News is now on WhatsApp
Join and get latest news updates delivered to you via WhatsApp
ଜୁନ ୧୨ ତାରିଖରେ ରାଜ୍ୟର ସବୁ ଜିଲ୍ଲାପାଳ ମାନଙ୍କୁ ଲେଖାଯାଇଥିବା ଚିଠିରୁ ଜଣାପଡୁଛି ଯେ, ସାଧାରଣ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି ନିର୍ବାଚନ କମିଶନ୍ । ପୁଲିଂ ପାର୍ଟିର ଯାତାୟାତ, ଷ୍ଟ୍ରଂଗ ରୁମ ବ୍ୟବସ୍ଥା ଓ ଅନ୍ୟାନ୍ୟ ଭିତ୍ତିଭୂମି ନେଇ ଜୁନ୍ ୨୦ ସୁଦ୍ଧା ରିପୋର୍ଟ ଦେବାକୁ ଚିଠିରେ କୁହାଯାଇଥିଲା । ଯଦିଓ ଚଳିତ ଆର୍ଥିକ ବର୍ଷର ଶେଷ କିମ୍ବା ଆଗାମୀ ଆର୍ଥିକ ବର୍ଷ ଆରମ୍ଭରେ ଉଭୟ ଲୋକସଭା ଓ ବିଧାନସଭା ନିର୍ବାଚନ ହୋଇପାରେ ବୋଲି ଚିଠିରେ ସୂଚନା ଦିଆଯାଇଛି, କିନ୍ତୁ କେନ୍ଦ୍ରରେ ମୋଦି ସରକାର ନିର୍ଦ୍ଧାରିତ ସମୟ ପୂର୍ବରୁ ନିର୍ବାଚନ କରାଇପାରନ୍ତି ବୋଲି ଚର୍ଚ୍ଚା ବି ଥମିନହିିଁ ।
ଗୋଟିଏ ଦେଶ ଗୋଟିଏ ନିର୍ବାଚନ ଫର୍ମୁଲା ଉପରେ ମୋଦି ସରକାର ଜୋର ଦେଉଥିବା ବେଳେ ଭାରତ ପରି ଏକ ବୃହତ ରାଷ୍ଟ୍ରରେ ସବୁତକ ନିର୍ବାଚନ ଏକାଠି କରାଇବା ଏତେ ସହଜ ନୁହେଁ । ତେଣୁ ପ୍ରଥମ ପର୍ଯ୍ୟାୟରେ ୨୦୧୯ ଲୋକସଭା ନିର୍ବାଚନ ସହ ୧୨ଟି ରାଜ୍ୟରେ ବିଧାନସଭା ନିର୍ବାଚନ ଏକାଠି କରାଇବାକୁ ଯୋଜନା କରିପାରେ ବିଜେପି ।
ଲୋକସଭା ନିର୍ବାଚନ ସହ ଓଡିଶା ସମେତ ରାଜସ୍ଥାନ, ଛତିଶଗଡ, ମଧ୍ୟପ୍ରଦେଶ, ମିଜୋରାମ, ସିକିମ, ଅରୁଣାଚଳ ପ୍ରଦେଶ, ତେଲେଙ୍ଗାନା, ଆନ୍ଧ୍ରପ୍ରଦେଶ, ହରିଆଣା, ମହାରାଷ୍ଟ୍ର ଓ ଝାଡଖଣ୍ଡରେ ବିଧାନସଭା ନିର୍ବାଚନ କରାଇବାକୁ ମୋଦି ସରକାର ଚିନ୍ତା କରୁଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଏପରିକି ଗତ ଫେବ୍ରୁଆରୀ ୨୮ ତାରିଖରେ ଦିଲ୍ଲୀରେ ବିଜେପି ଶାସିତ ରାଜ୍ୟଗୁଡିକର ମୁଖ୍ୟମନ୍ତ୍ରୀ ଓ ଉପମଖ୍ୟମନ୍ତ୍ରୀ ମାନଙ୍କୁ ଏନେଇ ବିଚାର ବିମର୍ଷ ହୋଇଛି ।
ଓଡିଶାରେ ୨୦୦୪ରୁ ଲୋକସଭା ଓ ବିଧାନସଭା ନିର୍ବାଚନ ଏକାଠି ହୋଇଆସୁଛି । ତେବେ କଥା ଅଟକିଛି ଆଗୁଆ ନିର୍ବାଚନରେ । ସାମ୍ବିଧାନିକ ବ୍ୟବସ୍ଥା ଆନୁସାରେ ସଂଖ୍ୟାଗରିଷ୍ଠତା ଥିବା ଶାସକ ଦଳ ଚାହିଁଲେ ୬ମାସ ପୂର୍ବରୁ ନିର୍ବାଚନ କରାଇପାରିବେ । ଆଉ ସାଂପ୍ରତିକ ରାଜନୈତିକ ପରିସ୍ଥିତିକୁ ଦେଖିଲେ ବିଜେପି ଏଭଳି ପଦକ୍ଷେପ ନେବା କିଛି ଅସମ୍ଭବ ନୁହେଁ ବୋଲି ମନେ ହେଉଛି ।