ନୂଆ ସଂସଦ ଭବନ ଉଦଘାଟନ : ବିରୋଧୀଙ୍କ ବିରୋଧ ବେଳେ ମୋଦୀଙ୍କୁ ମିଳିଲା ନବୀନ, ଜଗନଙ୍କ ସାଥ; ସମାରୋହରେ ସାମିଲ ହେବେ ବିଜେଡି ଏବଂ ୱାଇଏସଆର କଂଗ୍ରେସ
କନକ ବ୍ୟୁରୋ : ନୂଆ ସଂସଦ ଭବନ ଉଦଘାଟନକୁ ନେଇ ରାଜନୀତି ସରଗରମ ହୋଇଛି । ସମାରୋହକୁ ରାଷ୍ଟ୍ରପତିଙ୍କୁ ଡକା ଯାଇନଥିବାରୁ କଂଗ୍ରେସ ସମେତ ୧୯ ବିରୋଧ ଦଳ ଉଦଘାଟନକୁ ବର୍ଜନ କରିବେ ବୋଲି ଘୋଷଣା କରିଛନ୍ତି । ଏହି ସମୟରେ ଏନଡିଏକୁ ମିଳିଛି ନବୀନ ପଟ୍ଟନାୟକ ଓ ଜଗନ ରେଡ୍ଡୀଙ୍କ ସମର୍ଥନ । ଉଦଘାଟନ ସମାରୋହରେ ବିଜେଡି ଓ ଜଗନଙ୍କ ୱାଇଏସଆର କଂଗ୍ରେସ ସାମିଲ ହେବ ବୋଲି ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର ଏକ ପ୍ରେସ ରିଲିଜ ଜାରି କରି କହିଛନ୍ତି ଯେ, ଭାରତର ରାଷ୍ଟ୍ରମୁଖ୍ୟ ହେଉଛନ୍ତି ରାଷ୍ଟପତି । ଆଉ ପାର୍ଲାମେଂଟର ଦେଶ ୧୪୦ କୋଟି ଲୋକଙ୍କୁ ପ୍ରତିନିଧିତ୍ୱ କରୁଛି । ଉଭୟ ଅନୁଷ୍ଠାନ ଭାରତୀୟ ଗଣତନ୍ତ୍ରର ପ୍ରତୀକ । ଏମାନଙ୍କ ସମ୍ମାନ ଓ ଗାରିମା ସବୁଦିନ ସୁରକ୍ଷିତ ରହିବା ଦରକାର । ଏଗୁଡିକୁ କୌଣସି ପ୍ରକାରେ ମତଭେଦରୁ ଦୂରରେ ରଖାଯିବା ଆବଶ୍ୟକ । ଏହି ସବୁ ପ୍ରସଙ୍ଗରେ ପରବର୍ତ୍ତୀ ସମୟରେ ପବିତ୍ର ଗୃହରେ ଆଲୋଚନା କରାଯାଇପାରିବ ।
ସେହିଭଳି ଜଗନ ରେଡ୍ଡୀ ଏକ ଟୁଇଟି କରି କହିଛନ୍ତି, ସଂସଦ ଆମ ଗଣତନ୍ତ୍ରର ମନ୍ଦିର । ଏହା ଦେଶବାସୀଙ୍କ ଓ ସବୁ ଦଳର । ଏହାକୁ ବର୍ଜନ କରିବା ପ୍ରକୃତ ଗଣତନ୍ତ୍ରର ପରିଚାୟକ ନୁହେଁ । ମତଭେଦକୁ ଦୂର କରି ସବୁଦଳ ଏଥିରେ ଯୋଗ ଦେବା ଦରକାର । ନୂଆ ସଂସଦ ଭବନର ଉଦଘାଟନକୁ ତିନି ଦିନ ବାକି ଥିବା ବେଳେ ଏହାକୁ ନେଇ ରାଜନୀତି ଥମିବାର ନାଁ ନେଉନାହିଁ ।
ରାଷ୍ଟ୍ରପତିଙ୍କୁ ଡକାଯାଇନଥିବାରୁ କଂଗ୍ରେସ ସମେତ ମୋଟ ୧୯ ବିରୋଧୀ ଦଳ ଉତ୍ସବକୁ ବହିଷ୍କାର କରିବାକୁ ଘୋଷଣା କରିଛନ୍ତି । ସମସ୍ତ ବିରୋଧୀ ଦଳ ପକ୍ଷରୁ ମିଳିତ ବିବୃତି ଜାରି କରାଯାଇଛି । ବିରୋଧୀ ଦାବି କରିଛନ୍ତି, ପ୍ରଧାନମନ୍ତ୍ରୀ ନୁହେଁ ରାଷ୍ଟ୍ରପତି ନୂଆ ସଂସଦ ଭବନର ଉଦଘାଟନ କରନ୍ତୁ, ଯାହାକୁ ନେଇ ରାଜନୀତି ତେଜିଛି । ଆଉ ନବୀନ ଓ ଜଗନଙ୍କ ସମର୍ଥନ ଜାତୀୟ ରାଜନୀତିରେ ଚର୍ଚ୍ଚାର ବିଷୟ ପାଲଟିଛି ।