ହେଲମେଟ ଅଭିଯାନକୁ ନେଇ ଆଉ ପାଦେ ଆଗେଇଲା ପୋଲିସ ! ଆପଣ ହେଲମେଟ ପିନ୍ଧିଥିଲେ କି ନାହିଁ, ଦୁର୍ଘଟଣା ଜନିତ ମୃତ୍ୟୁରେ ଏଣିକି ରହିବ ତଥ୍ୟ ।
ହେଲମେଟ ଅଭିଯାନକୁ ଆଉ ଏକ ପାଦ ଆଗକୁ ବଢାଇଛି ପଞ୍ଜାବ ପୋଲିସ ପ୍ରଶାସନ । ଏବେ ଟ୍ରାଫିକ ନିୟମ ଉଲ୍ଲଘଂନ କରିବା ଆହୁରି ମହଙ୍ଗା ପଡିବ । ଟ୍ରାଫିକ ନିୟମ ଉଲ୍ଲଘଂନକାରୀଙ୍କୁ ପୋଲିସ ଆଉ କେବଳ ଫାଇନ କାଟି ଛାଡିଦେବନି । ଯଦି ସଡକ ଦୁର୍ଘଟଣାରେ ଦୁଇ ଚକିଆ ଯାନ ଚାଳକର ମୃତ୍ୟୁ ହୋଇଯାଏ ତେବେ ଦୁର୍ଘଟଣା ସମୟରେ ମୃତ ବ୍ୟକ୍ତି ହେଲମେଟ ପିନ୍ଧିଥିଲେ କି ନାହିଁ ସେ ବାବଦରେ ଏଫଆଇଆରରେ ଉଲ୍ଲେଖ ରହିବ ।
Kanak News is now on WhatsApp
Join and get latest news updates delivered to you via WhatsApp
ପଞ୍ଜାବ ଟ୍ରାଫିକ ଏଡିଜିପି ଶରଦ ସତ୍ୟ ଚୌହାନ କହିଛନ୍ତି ଯେ, ଏପରି କରିବାର କାରଣ ହେଉଛି ପୂର୍ବରୁ ହେଲମେଟ ନପିନ୍ଧିବା କାରଣରୁ କେତେ ଲୋକଙ୍କର ମୃତ୍ୟୁ ହୋଇଛି ସେନେଇ ପୋଲିସ ପାଖରେ କୌଣସି ତଥ୍ୟ ନାହିଁ । କିନ୍ତୁ ହେଲମେଟ ନପିନ୍ଧିବା କାରଣରୁ ଆଦାୟ ହେଉଥିବା ଫାଇନରେ ଦିନକୁ ଦିନ ବୃଦ୍ଧି ହେଉଛି । ୨୦୧୬ ମସିହାରେ ହେଲମେଟ ନପିନ୍ଧିବା କାରଣରୁ ଚାଳକମାନଙ୍କ ଠାରୁ ଯେଉଁଠି ୮୦ ହଜାର ଟଙ୍କା ଚାଲାଣ କଟାଯାଇଥିଲା ତାହା ୨୦୧୭ ରେ ବୃଦ୍ଧି ହୋଇ ୧.୮୦ ଲକ୍ଷ ଟଙ୍କାରେ ପହଞ୍ଚିଛି ।
ପଞ୍ଜାବ ଭବନରେ ଗଣମାଧ୍ୟମକୁ ସୂଚନା ଦେବାକୁ ଯାଇ ଶରଦ ସତ୍ୟ ଚୌହାନ କହିଛନ୍ତି ଯେ, ଟ୍ରାଫିକ ନିୟମକୁ କଡାକଡି ପାଳନ କରିବା ଦ୍ୱାରା ସଡକ ଦୁର୍ଘଟଣାରେ ହେଉଥିବା ମୃତ୍ୟୁ ସଂଖ୍ୟା ୧୫.୭ ପ୍ରତିଶତ ଖସିଆସିଛି । ଏଡିଜିପି କହିଛନ୍ତି ଯେ, ରାଜ୍ୟରେ ମୋଟ ୪୦୦ ବ୍ଲାକ ସ୍ପଟ ରହିଛି ଯେଉଁଥିରୁ ୧୫୦କୁ ଉନ୍ନତିକରଣ କରାଯାଇସାରିଲାଣି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ପଞ୍ଜାବରେ ୬୦ରୁ ୬୫ ପ୍ରତିଶତ ସଡକ ଦୁର୍ଘଟଣା ଜାତୀୟ ରାଜପଥ କିମ୍ବା ରାଜ୍ୟ ରାଜପଥରେ ହୋଇଥାଏ । ଯାହାକି ମୋଟ ଦୁର୍ଘଟଣାର ୫.୪ ପ୍ରତିଶତ ଅଂଶ ଅଟେ । ତେବେ ଏପରି ଅଭିଯାନ ଦ୍ୱାରା ସଡକ ଦୁର୍ଘଟଣାକୁ କିଛି ମାତ୍ରାରେ ରୋକା ଯାଇପାରିବ ।