କନକ ବ୍ୟୁରୋ: ଚିଲିକାର ଅକାତକାତ ପାଣିରେ ଚାଲିଛି ବିପଦପୂର୍ଣ୍ଣ ଜଳଯାତ୍ରା । ଲୋକମାନେ ଜୀବନକୁ ବାଜି ଲଗାଇ ଦେଶୀଡଙ୍ଗାରେ ଚିଲିକା ପାରିହେଉଛନ୍ତି । ଜଣେ କି ଦୁଇ ଜଣ ନୁହେଁ ଶହଶହ ଯାତ୍ରୀ ଦେଶୀ ଡଙ୍ଗାରେ ଚିଲିକା ଜଳରାଶିରେ ପ୍ରାୟ ୫ କିଲୋମିଟର ପାରି ହୁଅନ୍ତି । ଚିଲିକା ମଝିରେ ସେହି ଦୃଶ୍ୟ ଦେଖିଲେ ଆପଣମାନେ ବି ଚକିତ ହୋଇଯିବେ ।
Kanak News is now on WhatsApp
Join and get latest news updates delivered to you via WhatsApp
ପୁରୀ କୃଷ୍ଣପ୍ରସାଦ ବ୍ଲକର ଲୋକେ ଜିଲ୍ଲା ସଦରମହୁକମାକୁ ଯିବା ପାଇଁ ପ୍ରତିଦିନ ଚିଲିକାର ଅଥଳ ଜଳରାଶି ପାରି ହୋଇଥାନ୍ତି । ଜହ୍ନିକୁଦା-ସାତପଡା ଚିଲିକା ଦେଇ ଯିବାକୁ ହୁଏ । ଜଳପଥରେ ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି । ଆଉ ଚିଲିକା ପାରି ହେବା ପାଇଁ ଦେଶୀ ଡଙ୍ଗା ହିଁ ଏକମାତ୍ର ଭରସା । ଜୀବନକୁ ବାଜିରେ ଲଗାଇ ଡଂଗାରେ ଜଳଯାତ୍ରା କରୁଥିବା ଲୋକେ ଚିଲିକାରେ ସେତୁ ନିର୍ମାଣ ପାଇଁ ଦାବି କରନ୍ତି । ସାତପଡା ଚିଲିକାରେ ସେତୁ ହେଲେ ବର୍ଷ ବର୍ଷର ସମସ୍ୟା ସାମାଧାନ ହେବ । ଆଉ ନିର୍ବାଚନ ସମୟରେ ଏହି ଦାବିକୁ ନେଇ ସବୁ ରାଜନୈତିକ ଦଳ ବେଶ ଚର୍ଚ୍ଚା କରନ୍ତି, ହେଲେ ଭୋଟ ସରିଲେ ଶୀତଳ ଭଣ୍ଡାରରେ ରହିଯାଏ କୃଷ୍ଣପ୍ରସାଦ ଲୋକଙ୍କ ଦାବି ।
ସରକାର ହୁଅନ୍ତୁ ବା ସ୍ଥାନୀୟ ରାଜନେତା କେହି କୃଷ୍ଣପ୍ରସାଦର ସମସ୍ୟା ଉପରେ ନଜର ଦେଉନାହାନ୍ତି । ଯାହାର ଜ୍ୱଳନ୍ତ ଉଦାହରଣ ଏହି ଜଳଯାତ୍ରାର ଦୃଶ୍ୟ । ଡଙ୍ଗାରେ ଗାଡି, ମଣିଷ ଭର୍ତି ହୋଇ ଚିଲିକା ପାରି ହେଉଛନ୍ତି । ଅନେକ ସମୟରେ ଚିଲିକାରେ ଡଙ୍ଗାବୁଡି ଦୁର୍ଘଟଣା ବି ଘଟିଛି । ତଥାପି ସାତପଡାରେ ସେତୁ ନିର୍ମାଣ ପାଇଁ କାହାରି ଆନ୍ତରିକତା ନାହିଁ । ତେଣୁ ସ୍ଥାନୀୟ ଲୋକେ ଆଗକୁ ଆନ୍ଦୋଳନ କରିବାକୁ ସଜବାଜ ହେଲେଣି ।