ଚାଷୀଙ୍କ ୩ ଘଣ୍ଟିଆ ଚକା ଜାମ୍ । ଦିଲ୍ଲୀ ସୀମା ସିଲ୍, ୧୦ ମେଟ୍ରୋ ଷ୍ଟେସନ ବନ୍ଦ, ଗାଜିପୁର ଓ ସିଂଘୁ ସୀମାରେ ୫୦ ହଜାର ସୁରକ୍ଷା କର୍ମୀ ମୁତୟନ
କନକ ବ୍ୟୁରୋ: କେନ୍ଦ୍ର ସରକାରଙ୍କ ଦ୍ୱାରା ପାରିତ ନୂତନ କୃଷିବିଲ୍ କୁ ବିରୋଧ କରି ୨ ମାସରୁ ଅଧିକ ସମୟ ହେବ ଧାରଣାରେ ବସିଥିବା କୃଷକ ମାନଙ୍କ ଡାକରାରେ ଆଜି ସାରା ଦେଶରେ ୩ ଘଣ୍ଟିଆ ଚକା ଜାମ୍ ଆନ୍ଦୋଳନ କରାଯାଉଛି । ଏହି ଚକା ଜାମ୍ ଆନ୍ଦୋଳନ ମଧ୍ୟାହ୍ନ ୧୨ ଟାରୁ ଆରମ୍ଭ ହୋଇଛି ଓ ଏହା ଅପରାହ୍ନ ୩ ଟା ପର୍ଯ୍ୟନ୍ତ ଚାଲିବ ବୋଲି କୁହାଯାଇଛି । କିଛି ନିଦ୍ଧିଷ୍ଟ କାରଣ ପାଇଁ ଉତ୍ତରପ୍ରଦେଶ, ଉତ୍ତରାଖଣ୍ଡ ଓ ଦିଲ୍ଲୀକୁ ବାଦ ଦେଇ ଦେଶର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଏହି ଆନ୍ଦୋଳନ ଜାରି ରହିଛି । ଆନ୍ଦୋଳନ ଶାନ୍ତିପୂର୍ଣ୍ଣ ଭାବେ ଚାଲିଥିବା ନେଇ ଭାରତୀୟ କିଷାନ ୟୁନିୟନର ମୁଖ୍ୟ ରାକେଶ ଟିକାୟତ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଜାନୁଆରୀ ୨୬ ତାରିଖରେ ହୋଇଥିବା ଆନ୍ଦୋଳନ ବେଳେ ଘଟିଥିବା ହିଂସାକାଣ୍ଡକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡା କଡି କରାଯାଇଛି । ଦିଲ୍ଲୀରେ ଚକା ଜାମ୍ ଆନ୍ଦୋଳନ ହେଉନଥିବା ବେଳେ ବି କୃଷକ ମାନେ ଆନ୍ଦୋଳନରେ ବସିଥିବା ବିଭିନ୍ନ ସୀମାରେ ୫୦ ହଜାରରୁ ଅଧିକ ସୁରକ୍ଷାକର୍ମୀ ନିୟୋଜିତ ହୋଇଥିବା ସୂଚନା ମିଳିଛି । ଏହାସହ ବହୁସ୍ତରୀୟ ବ୍ୟରିକେଡ୍ ବ୍ୟବସ୍ଥା ବି କରାଯାଇଥିବା ଦେଖିବାକୁ ମିଳିଛି ।
କୃଷକ ମାନଙ୍କର ଏହି ଚକାଜାମ୍ ଆନ୍ଦୋଳନକୁ କଂଗ୍ରେସ ପକ୍ଷରୁ ସମର୍ଥନ ଦିଆଯାଇଛି । କଂଗ୍ରେସ ନେତା ରାହୁଲ ଗାନ୍ଧୀ ଓ କଂଗ୍ରେସ ମହାସଚିବ ପ୍ରିୟଙ୍କାଭଦ୍ରା ଗାନ୍ଧୀ ଏନେଇ ସରକାରଙ୍କୁ ଟାର୍ଗେଟ୍ କରିଛନ୍ତି । ଏଭଳି କଳା କୃଷିଆଇନକୁ କେନ୍ଦ୍ରସରକାର ତୁରନ୍ତ ପ୍ରତ୍ୟାହାର କରନ୍ତୁ ବୋଲି ସେମାନେ ଦାବି କରିଛନ୍ତି ।
ଓଡିଶାରେ ବି କୃଷକମାନେ କିଛି କିଛି ସ୍ଥାନରେ ଚକାଜାମ୍ ଆନ୍ଦୋଳନରେ ସାମିଲ ହୋଇଛନ୍ତି । ଓଡିଶାର ନବନିର୍ମାଣ କୃଷକ ସଂଗଠନ ଏହି ଆନ୍ଦୋଳନକୁ ସମର୍ଥନ ଜଣାଇବାରେ ପରେ ଏଠାରେ କିଛି ମାତ୍ରାରେ ପ୍ରତିଫଳନ ଦେଖିବାକୁ ମିଳିଛି ।