ପିସିସି ସଭାପତି ବଦଳିଲେ ହେଲେ ତୁଟିଲାନି କଂଗ୍ରେସ କଳି: ସଂପାଦକ ପଦରୁ ମୋକିମ୍ ଇସ୍ତଫା ଦେବା ପରେ ଦଳ ଛାଡିବା ନେଇ ଚର୍ଚ୍ଚା
କନକ ବ୍ୟୁରୋ: କଟକର ନାଳ ପାଣିରେ ପଶି ପ୍ରତିବାଦ କରୁଛନ୍ତି କଂଗ୍ରେସ ବିଧାୟକ ମହମ୍ମଦ ମୋକିମ । ସହର ମଧ୍ୟରେ ଥିବା ପେଟାନାଳର ପୁନଃରୁଦ୍ଧାର ପାଇଁ ଦାବି କରିଛନ୍ତିି । କିନ୍ତୁ ଏତିକିବେଳେ ମୋକିମଙ୍କ ଦଳ ଛାଡିବା ନେଇ ଚର୍ଚ୍ଚା ମଧ୍ୟ ଜୋର ଧରୁଛି । କାରଣ ଏହା ଭିତରେ ସେ ଦଳୀୟ ସମ୍ପାଦକ ପଦରୁ ଇସ୍ତଫା ଦେଇଛନ୍ତି କଟକର ଏହି ବିଧାୟକ ।
Kanak News is now on WhatsApp
Join and get latest news updates delivered to you via WhatsApp
ପିସିସି ସଭାପତି ପଦ ପାଇଁ ନିରଞ୍ଜନ ପଟ୍ଟନାୟକଙ୍କ ପରେ ମହମ୍ମଦ ମୋକିମଙ୍କ ନାଁ ଚର୍ଚ୍ଚାରେ ଥିଲା ଏବଂ ସେ ଏହି ପଦ ପାଇଁ ଆଶାୟୀ ଥିଲେ । କିନ୍ତୁ ହାଇକମାଣ୍ଡ ଶରତ ପଟ୍ଟନାୟକଙ୍କୁ ସଭାପତି ଚୟନ କରିବା ପରେ ସେ ଅସନ୍ତୁଷ୍ଟ ଥିବା କୁହାଯାଉଛି । ତେବେ ଏହି ଚର୍ଚ୍ଚାକୁ ସିଧାସଳଖ ମନା କରି ନାହାଁନ୍ତି ମୋକିମ୍ । କହିଛନ୍ତି, ସେ ଏବେ ତାଙ୍କ ନିର୍ବାଚନ ମଣ୍ଡଳୀ ପାଇଁ କାମ କରିବାକୁ ଚାହୁଁଛନ୍ତି । ତେଣୁ ଦଳୀୟ ପଦ ଛାଡିଛନ୍ତି ।
ଆଗକୁ ଆସୁଛି ବିଧାନସଭାର ମୌସୁମୀ ଅଧିବେଶନ । ଏହି ଅଧିବେଶରେ କଂଗ୍ରେସର ଆଭିମୁଖ୍ୟ କଣ ରହିବ, ତା ଉପରେ ସମସ୍ତଙ୍କ ନଜର ରହିଛି । କାରଣ କିଛି ଦିନ ପୂର୍ବରୁ ବିଧାୟକ ଦଳ ନେତା ପଦରୁ ନରସିଂହ ମିଶ୍ର ଓ ସଚେତକ ପଦରୁ ବିଧାୟକ ତାରା ପ୍ରସାଦ ବାହିନପତି ଇସ୍ତଫା ଦେଇଥିବା ନେଇ ଚର୍ଚ୍ଚା ହେଉଥିଲା । କିନ୍ତୁ ଏହା ଭିତରେ ଦୁଇ ନେତା ମନ ପରିବର୍ତନ କରିଥିବା ଜଣାପଡିଛି ।
ନୂଆ ପିସିସି ସଭାପତି ହେବା ପରେ ବ୍ରଜରାଜନଗର ନିର୍ବାଚନରେ ପ୍ରଥମ ଥର ପାଇଁ ରାଜ୍ୟ କଂଗ୍ରେସ ଏକାଠି ହେବା ଦେଖାଯାଇଥିଲା । ଆଉ ଦଳ ତୃତୀୟସ୍ଥାନରୁ ଦ୍ୱିତୀୟ ସ୍ଥାନକୁ ଆସିବାରେ ସକ୍ଷମ ହୋଇଥିଲା । କିନ୍ତୁ ଏବେ ପୁଣି ଥରେ ଦଳରେ ସବୁ କିଛି ଠିକ୍ ଚାଲୁନଥିବା ଚର୍ଚ୍ଚା ହେଉଛି ।