କନକ ବୁରୋ: କଂଗ୍ରେସ ନେତା ରାହୁଲ ଗାନ୍ଧୀ ଶୁକ୍ରବାର ଏକ ବଡ ବୟାନ ରଖିଛନ୍ତି । ସେ କହିଛନ୍ତି, ଦେଶର ସବୁଠୁ ପୁରୁଣା ରାଜନୈତିକ ଦଳ ଅର୍ଥାତ କଂଗ୍ରେସର ଡିଏନଏ ବିହାରରେ ଅଛି । ଖାଲି ସେତିକି ନୁହେଁ, ଭାରତ ଯୋଡ ଯାତ୍ରା ସମୟରେ ବିହାରର ଲୋକମାନେ ସବୁ ସ୍ଥାନରେ ତାଙ୍କ ସହ ସାଙ୍ଗ ହେଇ ଚାଲିଛନ୍ତି ବୋଲି ରାହୁଲ ଗାନ୍ଧୀ କହିଛନ୍ତି । ତେବେ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଦ୍ୱାରା ଡକାଯାଇଥିବା ବିରୋଧୀ ଦଳ ବୈଠକରେ ଯୋଗ ଦେବା ଅବସରରେ ସେ ଏହି କଥା କହିଛନ୍ତି ।
ରାହୁଲ ଗାନ୍ଧୀ ନିଜ ଭାଷଣରେ ବିଜେପିକୁ ମଧ୍ୟ ଟାର୍ଗେଟ କରିଛନ୍ତି । ସେ କହିଛନ୍ତି, ଦେଶରେ ଏବେ ଦୁଇଟି ବିଚାରଧାରାର ଲଢେଇ ଚାଲିଛି । ଗୋଟିଏ ଆମର ଭାରତ ଯୋଡ ଏବଂ ଅନ୍ୟଟି ହେଲା ଭାରତ ତୋଡ୍ । ବିଜେପି ଭାରତକୁ ଭାଙ୍ଗିବାକୁ ଏବଂ ହିଂସା ଖେଳାଇବାକୁ କାମ କରୁଛି । ଜବାବରେ କଂଗ୍ରେସ ଭାରତକୁ ଯୋଡିବାକୁ କାମ କରୁଛି ବୋଲି ରାହୁଲ ଗାନ୍ଧୀ କହିଛନ୍ତି । ତେବେ ଦେଶର ସବୁ ବିରୋଧୀ ଦଳ ଏକାଠି ହେଲେ ବିଜେପିକୁ ହରାଯାଇପାରିବ ବୋଲି ବି ସେ କହିଛନ୍ତି ।
କଂଗ୍ରେସର ଏହି ପୂର୍ବତନ ସାଂସଦ ଆହୁରି ମଧ୍ୟ କହିଛନ୍ତି ଯେ, କର୍ଣ୍ଣାଟକରେ ବିଜେପି ବିଜୟୀ ହେବ ବୋଲି ଦାବି କରୁଥିଲା । ହେଲେ କଂଗ୍ରେସ ପାର୍ଟି ଏକାକି ଠିଆ ହେଇଥିଲା । ଯାହା ଫଳରେ କର୍ଣ୍ଣାଟକରେ ବିଜେପି ଗାଏବ୍ ହେଇଗଲା । ଆଗକୁ ମଧ୍ୟପ୍ରଦେଶ, ଛତିଶଗଡ, ରାଜସ୍ଥାନରେ ମଧ୍ୟ ବିଜେପି ଦେଖିବାକୁ ମିଳିବନି । କଂଗ୍ରେସର ଅର୍ଥ ହେଲା ଗରିବଙ୍କ ସହ ଛିଡା ହେବା, ଏବଂ ତାଙ୍କ ପାଇଁ କାମ କରିବା ।
#WATCH | There is a war of ideology going on in India. On one side is Congress party's 'Bharat Jodo' ideology and on the other RSS and BJP's 'Bharat Todo' ideology ...Congress party's DNA is in Bihar, says Congress leader Rahul Gandhi to party workers in Bihar's Patna pic.twitter.com/XRov71pSB6
— ANI (@ANI) June 23, 2023
ଏହା ପୂର୍ବରୁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ୍ ଖଡଗେ ବିହାର କଂଗ୍ରେସର କାର୍ଯ୍ୟାଳୟରେ ପହଞ୍ଚି କହିଥିଲେ ଯେ, ଏହା ଦେଶର ଇତିହାସରେ ବଡ ମହତ୍ୱ ରଖେ । ଏ କାର୍ଯ୍ୟାଳୟରୁ ଯେଉଁ ନେତା ବାହାରଛନ୍ତି, ସେ ଦେଶର ସ୍ୱାଧୀନତା ପାଇଁ ଲଢିଥିଲେ । ଦେଶର ପ୍ରଥମ ରାଷ୍ଟ୍ରପତି ରାଜେନ୍ଦ୍ର ପ୍ରସାଦ ମଧ୍ୟ ଏହି କାର୍ଯ୍ୟାଳୟରୁ ବାହାରିଥିଲେ, ତେଣୁ ଆମେ ଯଦି ବିହାରକୁ ଜିତିବୁ, ତେବେ ସାରା ଭାରତ ଜିତିବୁ ବୋଲି ସେ କହିଛନ୍ତି ।
ସୂଚନାଯୋଗ୍ୟ ଯେ, ବିହାରର ରାଜଧାନୀ ପାଟନାରେ ଆଜି ହେଉଛି ମୋଦୀ ବିରୋଧୀ ମେଳି । ୨୦୨୪ ସାଧାରଣ ନିର୍ବାଚନରେ ମୋଦୀଙ୍କୁ ମିଳିତ ଭାବେ ଟକ୍କର ଦେବାକୁ ଏଥିରେ ରଣନୀତି ପ୍ରସ୍ତୁତ ହେବ । ଏଥିପାଇଁ କଂଗ୍ରେସ ସମେତ ବିରୋଧୀ ନେତାଙ୍କୁ ନୀତିଶ କୁମାର ନିମନ୍ତ୍ରଣ ଦେଇଥିଲେ । ବୈଠକରେ ଯୋଗଦେବାକୁ ପାଟନାରେ ପହଞ୍ଚିସାରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ, ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ । କଂଗ୍ରେସରୁ ରାହୁଲ ଗାନ୍ଧୀ ଓ ମଲ୍ଲିକାର୍ଜୁନ ଖଡ଼ଗେ ଯୋଗ ଦେଇଛନ୍ତି । ତା ସହ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ସପା ମୁଖ୍ୟ ଅଖିଳେଶ ଯାଦବ, ନେସନାଲ କନଫରେନ୍ସ ନେତା ଫାରୁକ ଅବଦୁଲ୍ଲା, ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ପ୍ରମୁଖ ଏହି ବୈଠକରେ ଯୋଗଦେବାର ଅଛି ।