କନକ ବ୍ୟୁରୋ : ସାରା ବିଶ୍ୱରେ ଭାରତର ରେଳ ବିଭାଗ ହେଉଛି ସର୍ବ ବୃହତ ରେଳ ବିଭାଗ । ସ୍ୱାଧୀନତା ପରଠାରୁ ଭାରତୀୟ ରେଳ ବିଭାଗ କେବେ କ୍ଷତିରେ ଚାଲିଛି ତାହା କେହି କେବେ ଶୁଣି ନଥିବେ । ହେଲେ ଲାଭର ଚାଲୁଥିବା ଏକ ସରକାରୀ ସଂସ୍ଥା ସେହି ଦେଶର ଲୋକଙ୍କୁ ରେଳଯାତ୍ରା ବେଳେ ଯଦି ଶୋଷଣ କରେ ତେବେ ସାଧାରଣ ନାଗରିକଟିଏ କଣ ବା କରିପାରିବ ।
Kanak News is now on WhatsApp
Join and get latest news updates delivered to you via WhatsApp
ଆପଣ କେବେ ଶୁଣିଛନ୍ତି କି କୌଣସି ଜିନିଷର କିଣା ଦାମ ଠାରୁ ଟ୍ୟାକ୍ସ ଅଧିକ ଦେବାକୁ ପଡେ ବୋଲି । ହଁ ଅଜ୍ଞା ଏବେ ସବୁ ଏଭଳି ବିଚିତ୍ର ଚିତ୍ର ସାମ୍ନାକୁ ଆସୁଛି । ଏବେ ରେଳରେ ଯାତ୍ରା କରିବା ବେଳେ ଯଦି ଆପଣ ରେଳ ଭେଣ୍ଡରଙ୍କ ଠାରୁ ଚା ପିଇବେ ତେବେ ଆପଣଙ୍କୁ ଚା ବାବଦରେ ୨୦ ଟଙ୍କା ଓ ସେବାକର ବାବଦରେ ୫୦ ଟଙ୍କା ଏଭଳି ଗୋଟିଏ କପ ସାଧାରଣ ଚା ପାଇଁ ଆପଣଙ୍କୁ ସର୍ବମୋଟ ୭୦ ଟଙ୍କା ଦେବାକୁ ପଡିବ ଓ ଏବେ ପଡୁଛି ମଧ୍ୟ ।
ଏହାର ଏକ ସଦ୍ୟ ଉଦାହରଣ ଦେଖିବାକୁ ମିଳିଛି ଭୋପାଳ ଯାଉଥିବା ଜନଶତାବ୍ଦୀ ଏକ୍ସପ୍ରେସରେ । ଏହି ଟ୍ରେନରେ ଯାତ୍ରା କରୁଥିବା ଜଣେ ବ୍ୟକ୍ତି ରେଳ ଭେଣ୍ଡରଙ୍କ ଠାରୁ ଏକ କପ ଚା ପିଇଥିଲେ । ଏହାପରେ ରେଳ ଭେଣ୍ଡର ଯେଉଁ ମନି ରିସିପ୍ଟ ଦେଇଥିଲେ ତାହାକୁ ଦେଖି ଯାତ୍ରୀ ଜଣଙ୍କ ହତବାକ ହୋଇଯାଇଥିଲେ । ଏଥିରେ ଚା କପ ବାବଦକୁ ୨୦ ଟଙ୍କା ଓ ସର୍ଭିସ ଚାର୍ଜ ବାବଦକୁ ୫୦ ଟଙ୍କା ମୋଟ ୭୦ ଟଙ୍କା ଲେଖାଯାଇଥିଲା । ଏନେଇ ଯାତ୍ରୀ ଜଣଙ୍କ ଏହି ରିସିପ୍ଟକୁ ସୋସିଆଲ ମିଡିଆରେ ପୋଷ୍ଟ କରିବା ପରେ ଭାରତୀୟ ରେଳ ବିଭାଗ ଏବେ ଟ୍ରୋଲ ହେଉଛି ।
ଏଭଳି ଖବର ରେଳ ବିଭାଗ କାନରେ ପହଂଚିବା ପରେ ଏବେ ରେଳ ବିଭାଗ ସଫେଇ ଦେଇଛି । ବିଭାଗ ପକ୍ଷରୁ କୁହାଯାଇଛି କି ଯଦି କୌଣସି ଯାତ୍ରୀ ଶତାବ୍ଦୀ କିମ୍ବା ରାଜଧାନୀ ଏକ୍ସପ୍ରେସର ରିଜରଭେସନ ବଗିରେ ଯାତ୍ରା କରୁଛି ଓ ଯାତ୍ରା କରିବା ପୂର୍ବରୁ ଖାଦ୍ୟ ପାନୀୟ ବାବଦରେ ବୁକ କରିନାହିଁ ତେବେ ସେ ରେଳରେ ଯାତ୍ରା କରୁଥିବା ବେଳେ ଯାହା ବୁକ କରିବେ ତା ବାବଦରେ ଯାତ୍ରୀଙ୍କୁ ୫୦ ଟଙ୍କା ସର୍ଭିସ ଟ୍ୟାକ୍ସ ଦେବାକୁ ପଡିବ ।