କମିପାରେ ‘ପାର୍ଲେ-ଜି’ ବିସ୍କୁଟ ଦର! ଜାଣନ୍ତୁ କାରଣ କଣ?
କନକ ବ୍ୟୁରୋ : ଖାଉଟିଙ୍କ ପାଇଁ ବଡ ଖବର । କୋଟି କୋଟି ଭାରତୀୟଙ୍କ ପସନ୍ଦର ବିସ୍କୁଟ ଥିବା ପାର୍ଲେ-ଜି ଆହୁରି ଶସ୍ତା ହୋଇପାରେ । ଦାମ କମ କରିବା ସହ ପ୍ୟାକେଟର ଓଜନରେ ମଧ୍ୟ ବୃଦ୍ଧି କରିପାରେ କମ୍ପାନି । ଆଉ ଏଭଳି ଖବର ଏବେ ମହଙ୍ଗା ମାଡରେ ଅସ୍ତବ୍ୟସ୍ତ ହେଉଥିବା ଲୋକଙ୍କ ପାଇଁ ଟିକିଏ ଆଶ୍ୱସ୍ତି ଆଣିଦେବ । କୃଷିଜାତ ଦ୍ରବ୍ୟର ଦାମ କମିବା କାରଣରୁ ବିସ୍କୁଟର ଦାମର କମିପାରେ ବୋଲି ଆକଳନ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
କମ୍ପାନିର ଅଧିକାରୀଙ୍କ କହିବା ଅନୁଯାୟୀ, ଯଦି ଲଗାତାର କୃଷିଜାତ ସାମଗ୍ରୀର ଦର କମ ରହିବ ତେବେ ଆଗାମୀ ଦିନରେ ବିସ୍କୁଟର ମୂଲ୍ୟ ୧୦ରୁ ୨୦ ପ୍ରତିଶତ କମ ହୋଇପାରେ । ଯଦି ବିସ୍କୁଟର ଦର କମ ନହୁଏ ତେବେ ବିସ୍କୁଟ ପ୍ୟାକେଟର ସାଇଜ ବୃଦ୍ଧି ହୋଇପାରେ । ଗହମର ଦାମ କମୁଛି ଓ ବିସ୍କୁଟ ପାଇଁ କିଛି ସାମଗ୍ରୀର ଦରରେ ହ୍ରାସ ହେଉଛି ତେଣୁ ଖୁବଶୀଘ୍ର ବିସ୍କୁଟ ଦରରେ ହ୍ରାସ କରାଯାଇପାରେ ।
ପୂର୍ବରୁ କୃଷିଜାତ ସାମଗ୍ରୀର ଦର ବୃଦ୍ଧି କାରଣରୁ ବିସ୍କୁଟ ମୂଲ୍ୟ ବୃଦ୍ଧି ଛଡା କମ୍ପାନି ପାଖରେ କୌଣସି ବିକଳ୍ପ ନଥିଲା । ଏହାଛଡା କରୋନା କାରଣରୁ ସପ୍ଲାଏ ଚେନ୍ ମଧ୍ୟ ପ୍ରଭାବିତ ହୋଇଥିଲା । ଯାହାଫଳରେ ବିଭିନ୍ନ ସାମଗ୍ରୀର ଦର ବଢିଥିଲା । ଏହାଛଡା ୟୁକ୍ରେନ-ଋଷ ସଙ୍କଟ କାରଣରୁ ଗହମ ଓ ସୂଯ୍ୟମୁଖୀ ତେଲର ଦର ମଧ୍ୟ ବୃଦ୍ଧି ପାଇଥିଲା । ଫଳରେ ପାର୍ଲେର ବିଭିନ୍ନ ସାମଗ୍ରୀର ଦର ବଢିଥିଲା । କିନ୍ତୁ ଏବେ ଏହି ଦରରେ ହ୍ରାସ କାରଣରୁ ବିସ୍କୁଟ ଦର ମଧ୍ୟ କମ ହେବ ବୋଲି କମ୍ପାନୀ ପକ୍ଷରୁ କୁହାଯାଇଛି ।