ସୂର୍ଯ୍ୟକୁ ନାସା ପଠାଇଲା ମହାକାଶ ଯାନ ! ନଭେମ୍ବରରୁ ଆରମ୍ଭ ହେବ ଗବେଷଣା, ୭ବର୍ଷର ଜୀବନକାଳ ଭିତରେ ସୂର୍ଯ୍ୟକୁ ମାରିବ ୨୪ ଘେରା ।
କନକ ବ୍ୟୁରୋ : ରବିବାର ଭୋର ୩ଟା ୩୧ରେ ମହାକାଶକୁ ଛୁଟି ଚାଲିଲା ନାସାର ବହୁ ପ୍ରତିକ୍ଷିତ ପାର୍କର ସୋଲାର ପ୍ରୋବ୍ । କାଉଣ୍ଟଡାଉନ ସରିବା ସହ ଆକାଶ ବୁକୁ ଚିରି ମଣିଷ ସଭ୍ୟତା ଓ ଆକାଶ ବିଜ୍ଞାନରେ ନୂଆ ଇତିହାସ ସୃଷ୍ଟି କରିଛି ଏହି ଯାନ । ପ୍ରଥମ ଥର ପାଇଁ ସୂର୍ଯ୍ୟର ଅତି ନିକଟକୁ ଯାଇ ଗବେଷଣା କରିବ ଏହି ସୋଲାର ପ୍ରୋବ ।
Kanak News is now on WhatsApp
Join and get latest news updates delivered to you via WhatsApp
ପୃଥିବୀଠାରୁ ପ୍ରାୟ ୧୫ କୋଟି କିଲୋମିଟର ଦୂରରେ ଥିବା ବିରାଟ ସୂର୍ଯ୍ୟର ପାଖରେ ପହଂଚିବା ପାଇଁ ଏହି ମହାକାଶ ଯାନ ପ୍ରାୟ ୪ ମାସ ସମୟ ନେବ ବୋଲି ଆକଳନ କରାଯାଇଛି । ଘଂଟାକୁ ପ୍ରାୟ ୧୬ ହଜାର କିଲୋମିଟର ବେଗରେ ଗତି କରୁଛି ଏହି ପ୍ରୋବ । ତେବେ ଏହି ଯାନ ସୂର୍ଯ୍ୟର ପୃଷ୍ଠଠାରୁ ପ୍ରାୟ ୬୨ ଲକ୍ଷ କିଲୋମିଟର ଦୂରରେ ରହି ଗବେଷଣା କରିବ ।
ଏହି ପାର୍କର ସୋଲାର ପ୍ରୋବ ସୂର୍ଯ୍ୟର ପ୍ରଭାମଣ୍ଡଳର ରହସ୍ୟ ବୁଝିବା ସହ ସୌର ବାୟୁମଣ୍ଡଳ ଉପରେ ଅଧିକ ଗବେଷଣା କରିବ । ସୂର୍ଯ୍ୟର ପୃଷ୍ଠର ତାପମାତ୍ରାଠାରୁ ୩୦୦ ଗୁଣ ଅଧିକ ଉତ୍ତପ୍ତ ହେଉଛି ସୌର ପ୍ରଭାମଣ୍ଡଳ ବା କୋରୋନା । ଏହା ହେଉଛି ଶକ୍ତିଶାଳୀ ପ୍ଲାଜମା ଓ ଶକ୍ତି କଣିକାର ଘଂଟା ଚକଟା ହେଉଥିବା ସ୍ଥାନ । ତେବେ ଏହି ସବୁ ଏବେ ବି ବହୁ କଥା ଅସ୍ପଷ୍ଟ । ଏନେଇ ଅଧିକ ଗବେଷଣା କରିବ ନାସାର ଏହି ଯାନ । ଏହାର ଜୀବନ କାଳ ୭ ବର୍ଷ ରଖିଛି ନାସା । ଏହି ସମୟ ଭିତରେ ଯାନଟି ୨୪ ଥର ସୂର୍ଯ୍ୟ ଚାରିପଟେ ବୁଲିବ ।
ଉଚ୍ଚ ସୌର ବିକିରଣ ଓ ଉତ୍ତାପ ରୋକିବା ପାଇଁ ସ୍ୱତନ୍ତ୍ର ତାପରୋଧୀ ବ୍ୟବସ୍ଥା କରାଯାଇଛି । ଫଳରେ ଏହି ଯାନର କୌଣସି କ୍ଷତି ହେବ ନାହିଁ । ନାସାର ଏହି ସୌର ଅଭିଯାନ ପାଇଁ ୬ ହଜାର ୫ଶହ କୋଟି ଟଙ୍କା ଖର୍ଚ୍ଚ କରାଯାଇଛି । ପାର୍କର ସୋଲାର ପ୍ରୋବ ସଫଳ ହେଲେ ସୂର୍ଯ୍ୟ ନେଇ ବିଜ୍ଞାନୀଙ୍କ ମନରେ ଥିବା ଅନେକ ପ୍ରଶ୍ନର ସମାଧାନ ହେବ ।