ଭାରତ ନିର୍ମିତ କୋଭିଡ୍ ଟିକା ପାଇବ ପାକିସ୍ତାନ । ଗାଭି ଜରିଆରେ ୪କୋଟି ୫୦ଲକ୍ଷ ଡୋଜ କୋଭିସିଲ୍ଡ ଟିକା ମାଗଣାରେ ପାଇବ ଇସଲାମାବାଦ ।
କନକ ବ୍ୟୁରୋ: ଭାରତରେ ନିର୍ମିତ କରୋନା ଟିକା ଖୁବ ଶୀଘ୍ର ପାକିସ୍ତାନକୁ ମାଗଣାରେ ମିଳିବ । ୟୁନାଇଟେଡ ଗ୍ଲୋବାଲ ଆଲିଆନ୍ସ ଫର ଭାକ୍ସିନ ଆଣ୍ଡ ଇମ୍ୟୁନାଇଜେସନ ବା ଗାଭି ଜରିଆରେ ଟିକା ପାଇବ ପାକିସ୍ତାନ । ବିଶ୍ୱର ବିଭିନ୍ନ ସରକାର ଓ ବେସରକାରୀ ପ୍ରତିଷ୍ଠାନର ଯୌଥ ଉଦ୍ୟମରେ ଆର୍ଥିକ ଅନଗ୍ରସର ଦେଶଗୁଡିକୁ ମାଗଣାରେ ଟିକା ଯୋଗାଇବା ପାଇଁ ଏହି ଗାଭି ସଂଗଠନ ଗଠନ କରାଯାଇଛି । ଭାରତ ବର୍ତମାନ ସୁଦ୍ଧା ୬୫ଟି ଦେଶକୁ କରୋନା ମୁକାବିଲା ପାଇଁ ଟିକା ଯୋଗାଇଛି । କିଛି ରାଷ୍ଟ୍ରକୁ ମାଗଣାରେ ଟିକା ଦିଆଯାଇଥିବା ବେଳେ କିଛି ରାଷ୍ଟ୍ର ଅନୁଦାନ ଦେଇ ଟିକା ନେଇଛନ୍ତି । କେବଳ ପାକିସ୍ତାନକୁ ଛାଡିଦେଲେ ଭାରତର ସମସ୍ତ ପଡୋଶୀ ରାଷ୍ଟ୍ର ଭାରତରେ ନିର୍ମିତ କୋଭିଡ ଟିକା ପାଇଛନ୍ତି । ପଡୋଶୀ ଭୂଟାନ, ନେପାଳ, ବାଂଲାଦେଶ, ଆଫଗାନିସ୍ତାନ, ମାଳଦ୍ୱୀପରେ ମେଡ-ଇନ-ଇଣ୍ଡିଆ ଟିକାକରଣ ଆରମ୍ଭ ହୋଇସାରିଲାଣି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱର ୧୯୦ ଆର୍ଥିକ ଅନଗ୍ରସର ଦେଶର ୨୦ ପ୍ରତିଶତ ଲୋକଙ୍କୁ କରୋନା ଟିକା ମାଗଣାରେ ଯୋଗାଇବାକୁ ଗତବର୍ଷ ପ୍ରତିଶ୍ରୁତି ଦେଇଛି ୟୁନାଇଟେଡ ଗାଭି ଆଲିଆନ୍ସ । ସେହି ୧୯୦ ଦେଶ ମଧ୍ୟରେ ପାକିସ୍ତାନ ମଧ୍ୟ ରହିଛି । ତେଣୁ ଗାଭି ଜରିଆରେ ଭାରତରେ ନିର୍ମିତ ଟିକା ପାକିସ୍ତାନକୁ ପଠାଯିବ ବୋଲି ସୂଚନା ମିଳିଛି ।
ଗଣମାଧ୍ୟମର ସୂଚନା ଅନୁସାରେ ୪ କୋଟି ୫୦ ଲକ୍ଷ କୋଭିସିଲଡ ଡୋଜ ପାକିସ୍ତାନକୁ ପଠାଇବ ଭାରତ । ବିଶ୍ୱର ସବୁଠୁ ବଡ ଟିକା ନିର୍ମାତା କଂପାନୀ ସିରମ ଇନଷ୍ଟିଚ୍ୟୁଟ ଦ୍ୱାରା ପ୍ରସ୍ତୁତ କୋଭିସିଲଡ ଟିକା ଜରିଆରେ କରୋନା ବିରୋଧୀ ଲଢେଇ ଲଢିବେ ଇମ୍ରାନ ସରକାର । ପାକିସ୍ତାନରେ ଏବେ ଚୀନଠାରୁ ମିଳିଥିବା ଟିକା ସ୍ୱାସ୍ଥ୍ୟକର୍ମୀ ଓ କୋଭିଡ ଯୋଦ୍ଧାଙ୍କୁ ଦିଆଯାଉଛି । ଚୀନ କଂପାନୀ ସିନୋଫାର୍ମା ୧୦ଲକ୍ଷ କୋଭିଡ ଦେବାକୁ ପ୍ରତିଶ୍ରୁତି ଦେଇଛି । ସେଥିରୁ ପାକିସ୍ତାନକୁ ୫ ଲକ୍ଷ ଡୋଜ ଟିକା ପାଇବା ପରେ ୨ ଲକ୍ଷ ୭୫ ହଜାର ସ୍ୱାସ୍ଥ୍ୟକର୍ମୀଙ୍କୁ ଟିକାକରଣ କରିଛି ।
ଗତ ମାସରେ ବିଶ୍ୱ ସ୍ୱାସ୍ଥ୍ୟ ସଂଗଠନ ମୁଖ୍ୟ ଟୁଇଟ କରି ଭାରତ ଓ ପ୍ରଧାନମନ୍ତ୍ରୀଙ୍କୁ ପ୍ରଂଶସା କରି ଲେଖିଛନ୍ତି ଭାରତରେ ନିର୍ମିତ କରୋନା ଟିକା ପାଇବା ପରେ ୬୦ରୁ ଅଧିକ ଦେଶରେ ଟିକାକରଣ ଆରମ୍ଭ ହୋଇଯାଇଛି । ଅନ୍ୟଦେଶଗୁଡିକ ମଧ୍ୟ ଭାରତକୁ ଅନୁକରଣ କରିବେ ବୋଲି ଆଶା ପ୍ରକାଶ କରିଛନ୍ତି ଡବ୍ଲୁଏଚଓ ମୁଖ୍ୟ ।