ପ୍ରସ୍ତାବିତ ପାଇକ ସ୍ମାରକୀ ନିର୍ମାଣ କାର୍ଯ୍ୟ ଆହୁରି ବିଳମ୍ବ ଘଟିବା ନେଇ ଆଶଙ୍କା । ଏଯାଏଁ ଚିହ୍ନଟ ହୋଇନି ୧୦ ଏକର ଜମି ।
କନକ ବ୍ୟୁରୋ : ପ୍ରସ୍ତାବିତ ପାଇକ ସ୍ମାରକୀ ନିର୍ମାଣ କାର୍ଯ୍ୟ ଆହୁରି ବିଳମ୍ବ ଘଟିବା ଆଶଙ୍କା ସୃଷ୍ଟି ହୋଇଛି । ରାଜ୍ୟ ସରକାର ଯୋଗାଇ ଦେଇଥିବା ୧୦ ଏକର ଜମି ଏଯାଏଁ ଚିହ୍ନଟ ହୋଇପାରିନାହିଁ । ଗୋଟିଏ ପଟେ ଶିଳ୍ପାଂଚଳର ଘରୋଇ କମ୍ପାନୀ ଦ୍ୱାରା ଜମି ବେଆଇନ ଦଖଲ ହୋଇନାହିଁ ବୋଲି ତହସିଲଦାର ରିପୋର୍ଟ ଦେବା ପରେ ବର୍ତମାନ ବନ ବିଭାଗ ଉକ୍ତ ଅଂଚଳ ସଂରକ୍ଷିତ ଜଙ୍ଗଲ ମଧ୍ୟରେ ରହିଛି ବୋଲି ଦାବି କରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ରାଜ୍ୟ ସରକାର ଐତିହାସିକ ବରୁଣେଇ ପାହାଡ଼ ତଳେ ୧୦ ଏକର ଜମି ଯୋଗାଇ ଦେବାକୁ ଘୋଷଣା କରିଥିଲେ । ଜମି ଚିହ୍ନଟ ହେବା ପରେ ୨୦୧୯ ଡିସେମ୍ବର ୮ ତାରିଖରେ ରାଷ୍ଟ୍ରପତି ସେଠାରେ ଭିତ୍ତିପ୍ରସ୍ତର ସ୍ଥାପନ କରିଥିଲେ । କିନ୍ତୁ ପରବର୍ତୀ ସମୟରେ ଜିଲ୍ଲା ପ୍ରଶାସନ ପକ୍ଷରୁ ଜମି ମାପଚୁପ କରାଯାଇ ୯ ଏକର ୬୮୫ ଡେସିମଲ ଜମି ଚିହ୍ନଟ କରାଯାଇଥିଲା । ପ୍ରାଥମିକ ପର୍ଯ୍ୟାୟରେ ଏହି ଚିହ୍ନଟ ସମୟରେ ଜମିର ପ୍ରାୟ ଅଢ଼େଇ ଏକର ଅଂଚଳ ବ୍ରିଟାନିଆ କମ୍ପାନୀ ଓ ଟାଇଟ୍ ଇଂଜିନିୟରିଂ କଲେଜ ଅଧୀନରେ ରହିଥିବା ଜଣାଯାଇଥିଲା । ଏହାପରେ ଜିଲ୍ଲା ପ୍ରଶାସନ ପକ୍ଷରୁ ନୋଟିସ୍ ଦିଆଯାଇଥିଲା । ଗତ ଜାନୁଆରୀ ୧୧ ତାରିଖରେ ଜିଲ୍ଲାପାଳ, ଅତରିକ୍ତ ଜିଲ୍ଲାପାଳ, ଉପଜିଲ୍ଲାପାଳଙ୍କ ଉପସ୍ଥିତିରେ ଜମି ମାପଚୁପ ହୋଇ ଜମିର ଅଢ଼େଇ ଏକର ନୁହେଁ ୬୦୦-୭୦୦ ଡେସିମଲ ଜମି ଘରୋଇ କମ୍ପାନୀ ଅଧୀନରେ ରହିଥିବା ଜଣାପଡ଼ିଥିଲା । ଏହି ଜମିକୁ ଛାଡ଼ିବା ପାଇଁ ତିନିଦିନିଆ ଚରମପତ୍ର ମଧ୍ୟ ଦିଆଯାଇଥିଲା । ଇତିମଧ୍ୟରେ ବ୍ରିଟାନିଆ କମ୍ପାନୀ ପକ୍ଷରୁ ହାଇକୋର୍ଟରେ ଆଶ୍ରୟ ନିଆଯାଇ ଜମି ଉପରେ ସ୍ଥିତାବସ୍ଥା ଜାରି କରାଯାଇଛି ।
ଅପରପକ୍ଷରେ, ଚଳିତ ମାସ ୫ ତାରିଖରେ ତହସିଲଦାର ଦାଖଲ କରିଥିବା ଦ୍ୱିତୀୟ ରିପୋର୍ଟରେ ଉକ୍ତ ଜମିରେ ବ୍ରିଟାନିଆ କିମ୍ବା ଟାଇଟ୍ ଦ୍ୱାରା କୌଣସି ଜମି ଜବର ଦଖଲ ହୋଇନାହିଁ ବୋଲି ଦର୍ଶାଯାଇଛି । ଏହାପରେ ଜିଲ୍ଲାପାଳ ନିକଟରେ ଥିବା ଗଛ କାଟି, ରାସ୍ତା ସମତଳ କରିବା ଓ ୩୩ କେଭି ବିଦ୍ୟୁତ୍ ତାରର ରାସ୍ତା ବଦଳାଇବା ନେଇ ନିର୍ଦ୍ଦେଶ ଦେଇଥିଲେ । ଏହି ସମୟରେ ବନ ବିଭାଗ ପକ୍ଷରୁ ଯେଉଁ ସ୍ଥାନ ସମତଳ କରିବା ପାଇଁ ନିର୍ଦ୍ଦେଶ ଦିଆଯାଇଛି ତାହା ବନ ବିଭାଗର ସଂରକ୍ଷିତ ଜଙ୍ଗଲ ଇଲାକାରେ ଥିବା ଦର୍ଶାଯାଇଛି । ଏନେଇ ଜିଲ୍ଲାପାଳ ସନତ କୁମାର ମହାନ୍ତି କହିଛନ୍ତି ଯେ ବନ ବିଭାଗର ଆପତ୍ତି ପରେ ତହସିଲଦାରଙ୍କ ରିପୋର୍ଟ ସହ ବନ ବିଭାଗର ଆପତ୍ତି ମଧ୍ୟ ରାଜ୍ୟ ସଚିବଙ୍କ ନିକଟକୁ ପଠାଇଦେଇଛନ୍ତି । ଡିଏଫ୍ଓଙ୍କୁ ଏନେଇ ଆଲୋଚନା କରିବାକୁ ଡାକିଛନ୍ତି । ଆଲୋଚନା ପରେ ଏନେଇ ଏକ ରାସ୍ତା ବାହାରିବା ସମ୍ଭାବନା ରହିଛି ।