କନକ ବ୍ୟୁରୋ: ପଦମପୁର ଉପନିର୍ବାଚନରେ ହାତକୁ ଜୋରଦାର ଝଟକା ମିଳିଛି । ମାତ୍ର ୩୫୪୮ ଖଣ୍ଡ ଭୋଟ ପାଇଛନ୍ତି ପ୍ରାର୍ଥୀ ସତ୍ୟଭୂଷଣ ସାହୁ । ଯଦି ଅନ୍ୟ ପ୍ରାର୍ଥୀଙ୍କ କଥାକୁ ଦେଖିବା ବିଜେଡି ଏଠି ୧ ଲକ୍ଷ ୧୯ ହଜାର ୫୧୨ ଖଣ୍ଡ ଭୋଟ ପାଇଥିବା ବେଳେ ବିଜେପି ୭୭ ହଜାର ୪୪୭ ଖଣ୍ଡ ଭୋଟ ହାତେଇଛି । ଏହା ତୁଳନାରେ କଂଗ୍ରେସ ନୈରାଶ୍ୟଜନକ ପ୍ରଦର୍ଶନ କରିଛି । ଦଳ ପାଇଁ ହେବିୱେଟ ପ୍ରଚାର କରିଥିଲେ, ହେଲେ ମଧ୍ୟ ଲୋକଙ୍କ ଭରସା ଜିତିବାରେ କଂଗ୍ରେସ ପୁଣି ଥରେ ଫେଲ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ବିଧାନସଭା ନିର୍ବାଚନରେ କଂଗ୍ରେସରୁ ପ୍ରାର୍ଥୀ ହୋଇଥିବା ସତ୍ୟଭୂଷଣ ୩୨ ହଜାର ୭୮୭ ଖଣ୍ଡ ଭୋଟ ପାଇଥିଲେ କିନ୍ତୁ ଏହି ଉପନିର୍ବାଚନରେ ସେହି ଭୋଟକୁ ନିଜ ସପକ୍ଷରେ ଆଣିପାରିନଥିଲେ । ପୂର୍ବରୁ ୩ ଥର ବିଧାୟକ ରହିସାରିଥିବା ସତ୍ୟଭୂଷଣଙ୍କୁ ଲୋକେ ଗ୍ରହଣ କରିନାହାନ୍ତି ।
ଗତ ଧାମନଗର ଉପନିର୍ବାଚନ କଥାକୁ ଯଦି ଦେଖିବା କଂଗ୍ରେସ ସେଠାରେ ମଧ୍ୟ ମାତ୍ର ୩୫୩୩ ଖଣ୍ଡ ଭୋଟ ପାଇଥିଲା ପଦମପୁରରେ ଦଳୀୟ ପ୍ରାର୍ଥୀ ମାତ୍ର ୩୫୪୮ ଭୋଟ ପାଇଛନ୍ତି । ସମୟ ଗଡିବା ସହ କଂଗ୍ରେସ କେବଳ ଯେ ତୃତୀୟ ସ୍ଥାନରେ ରହୁଛି ତାହା ନୁହେଁ ଦଳର ଭୋଟ ପ୍ରତିଶତ ମଧ୍ୟ କମିବାରେ ଲାଗିଛି । ଯେଉଁଠି ଦିନେ ଦଳ ଭଲ ପ୍ରଦର୍ଶନ କରି ଭଲ ସ୍ଥିତିରେ ରହୁଥିଲା ଆଜି ସେହି ସମୟରେ ଦଳ ସ୍ଥିତିକୁ ବଜାୟ ରଖିବାରେ ସମ୍ପୂର୍ଣ୍ଣ ବିଫଳ ହୋଇଛି ।
ଉପନିର୍ବାଚନର ଫଳାଫଳ ହିଁ ସ୍ପଷ୍ଟ କରିଦେଇଛି ୨୦୨୪ର ରାସ୍ତା ଦଳ ପାଇଁ ୨୦୧୯ଠାରୁ ମଧ୍ୟ କଷ୍ଟ ହେବ । ୨୦୧୯ ନିର୍ବାଚନ ପୂର୍ବରୁ ଦଳ ଦ୍ୱିତୀୟ ସ୍ଥାନରେ ରହିଆସୁଥିଲା । ୨୦୧୯ରେ ଦଳ ତୃତୀୟ ସ୍ଥାନକୁ ଆସିଲା କିନ୍ତୁ ଏହା ପରବର୍ତ୍ତୀ ଉପନିର୍ବାଚନରେ ଦଳ ତାର ସ୍ଥିତି ହରାଇସାରିଛି । ନେତୃତ୍ୱ ପରିବର୍ତ୍ତନ ସତ୍ତେ୍ୱ ମଧ୍ୟ ଦଳ ଭଲ ପ୍ରଦର୍ଶନ କରିବା ପାଇଁ ସଙ୍ଘର୍ଷ ଜାରିରଖିଛି । ୨୦୨୪ ବେଳେକୁ ଏହି ସ୍ଥିତି ଆହୁରି ଜଟିଳ ହେବ ବୋଲି ରାଜନୈତିକ ସମୀକ୍ଷକ ମତ ଦେବା ଆରମ୍ଭ କଲେଣି ।