ଠକ ଠିକାଦାର ଗିରଫ ! ପୋଲିସର ତନାଘନା ପରେ ଥାନାରେ ଆତ୍ମସମର୍ପଣ କଲେ ପଣ୍ଡା ଇନଫ୍ରା ପ୍ରୋଜେକ୍ଟସ୍ ମାଲିକ ପ୍ରତାପ ପଣ୍ଡା
କନକ ବ୍ୟୁରୋ : ଭୁବନେଶ୍ୱରର ବମିଖାଲରେ ଭୁଶୁଡିପଡିଥିବା ଓଭରବ୍ରିଜ୍ ନିର୍ମାଣ କରୁଥିବା ଠିକାସଂସ୍ଥାର ମାଲିକ ପ୍ରତାପ ପଣ୍ଡାଙ୍କୁ ଗିରଫ କରିଛି ପୋଲିସ । ଘଟଣାରେ ତନାଘନା ଆରମ୍ଭ ହେବା ପରେ ଖୋଜା ଚାଲିଥିଲା ଏହି ଠିକାସଂସ୍ଥାର ମାଲିକଙ୍କୁ । ଏବଂ ଆଜି ଡିସିପି ଅଫିସକୁ ଯାଇ ଆତ୍ମସମର୍ପଣ କରିଛନ୍ତି ପ୍ରତାପ ପଣ୍ଡା । ଇଏ ହେଉଛନ୍ତି ସେହି ବ୍ୟକ୍ତି , ଯାହାଙ୍କର ଠିକା ସଂସ୍ଥା ଓଡିଶାରେ ବଡ ବଡ ଫ୍ଲାଏ ଓଭର ନିର୍ମାଣ ପାଇଁ ଟେଣ୍ଡର ପାଇଛି । ବିଶେଷ କିଛି ଅନୁଭବ ନଥିବା ସତ୍ୱେ ଖୁବ୍ ସହଜରେ ଏହି ବ୍ୟକ୍ତି ଜଣକ ଠିକା ପାଇଯାଆନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ କିଛି ପ୍ରଭାବଶାଳୀ ନେତା, ମନ୍ତ୍ରୀ, ପୁର୍ବତନ ମନ୍ତ୍ରୀ, ସରକାରୀ ଅଧିକାରୀ ଏହି ବ୍ୟକ୍ତିଙ୍କ ପକେଟରେ ଥାଆନ୍ତି । ଯେଉଁଥିପାଇଁ ଖୁବ୍ ସହଜରେ ତାଙ୍କୁ କାମ ମିଳିଯାଏ । ବୋମିଖାଲ ଓଭରବ୍ରିଜ୍ ସହିତ ତାଙ୍କର ଠିକାସଂସ୍ଥା ଏବେ ସମ୍ବଲପୁର, ଜଟଣୀ ଓ ଭୁବନେଶ୍ୱରର ପୋଖରୀପୁଟରେ ଫ୍ଲାଏ ଓଭର ବ୍ରିଜ୍ ନିର୍ମାଣ କରୁଛି । ଏ ବାବୁଙ୍କର ଆଉ ଏକ କରାମତି ହେଉଛି – ତାଙ୍କ କମ୍ପାନୀର ନେଟୱର୍ଥ ପ୍ରାୟ ୧୮ କୋଟି ଟଙ୍କା ଥିବା ବେଳେ କାମ କିନ୍ତୁ କରୁଛନ୍ତି ୫ ଶହ କୋଟିରୁ ଉଦ୍ଧ୍ୱର୍ ଟଙ୍କାର । କାରଣ ପାୱାର କରିଡରରେ ତାଙ୍କର ହାତ ଖୁବ ଲମ୍ବା ।
ଏବେ ନଜର ପକାନ୍ତୁ ଏହି ସବୁ ଫ୍ଲାଏ ଓଭର ନିର୍ମାଣ ପାଇଁ କିଏ ଦେଇଥାଏ ଅନୁମତି ଏବଂ କେଉଁ ପରିସ୍ଥିତିରେ ଏସବୁ ଟେଣ୍ଡର ଦିଆଯାଇଛି । ପୂର୍ତ ବିଭାଗର ସଚିବ ନଳୀନିକାନ୍ତ ପ୍ରଧାନଙ୍କ ଉପରେ ଏବେ ବଡ ପ୍ରଶ୍ନ ।
ପୂର୍ତ୍ତ ସଚିବ ଇଂଜିନିୟର ନଳିନୀକାନ୍ତ ପ୍ରଧାନ । ଯାହାଙ୍କ ଦସ୍ତଖତରେ ଆରମ୍ଭ ହୋଇଥିଲା ଏହି ନିମ୍ନମାନର ବମିଖାଲ ଓଭରବ୍ରିଜ କାର୍ଯ୍ୟ । ୧୯୮୦ ଦଶକରେ ପୂର୍ତ୍ତ ବିଭାଗରେ ଜଣେ ସହକାରୀ ଯନ୍ତ୍ରୀ ଭାବେ କାମ ଆରମ୍ଭ କରିଥିବା ଏହି ଅଧିକାରୀଙ୍କ ତତ୍ୱାବଧାନରେ କେବଳ ବମିଖାଲ ଓଭରବ୍ରିଜ କାର୍ଯ୍ୟ ଭୁଶୁଡ଼ି ପଡ଼ିନାହିଁ ଏହିପରି ରାଜ୍ୟର ଅନେକ ନିର୍ମାଣାଧିନ ପୋଲ ଭୁଶୁଡ଼ି ପଡ଼ିଥିବାର ରେକର୍ଡ ରହିଛି ।
ଇଂ ପ୍ରଧାନ ସଚିବ ଥିବା ସମୟରେ ରାଜ୍ୟର ମୋଟ୍ ୭ଟି ସେତୁ ଭୁଶୁଡ଼ି ପଡ଼ିଥିବା ଜଣାପଡିଛି ।
ମାର୍ଚ୍ଚ ୨୦୧୭- କଟକରେ ସିଡିଏ-ନୂଆପାଟଣା ନିର୍ମାଣାଧିନ ପୋଲ ଭୁଶୁଡ଼ି ପଡ଼ିଥିଲା ।
ଏହା ପୂର୍ବରୁ ଗଂଜାମ ଜିଲ୍ଲା ବୁଗୁଡ଼ାରେ ମଧ୍ୟ ଏକ ନିର୍ମାଣାଧିନ ପୋଲ ଭୁଶୁଡ଼ି ପଡ଼ିଥିଲା ।
ମାଓ ଲଢ଼େଇରେ ଗମନାଗମନର ମୁଖ୍ୟ ଭୂମିକା ଗ୍ରହଣ କରିବା ପାଇଁ ବିଚ୍ଛିନ୍ନାଚଂଳରେ ନିର୍ମାଣ ଚାଲିଥିବା ମାଲକାନାଗିରିର ଗୁରୁପ୍ରିୟା ସେତୁ ଏହା ମଧ୍ୟରେ ଦୁଇଥର କାର୍ଯ୍ୟ ଶେଷ ହେବା ପୂର୍ବରୁ ଭାଂଗି ପଡ଼ିଲାଣି ।
କଟକ ଜିଲ୍ଲାର ବାଙ୍କିଠାରେ ନିର୍ମାଣାଧିନ ଜାତମୁଣ୍ଡିଆ ସେତୁ ମଧ୍ୟ ୨୦୧୪ ଅଗଷ୍ଟ ୨୮ରେ ଭୁଶୁଡ଼ି ପଡ଼ିଥିଲା ।
ସେହିପରି ଗୋପସ୍ଥିତ ନେତପୁର ସେତୁ ମଧ୍ୟ ଭୁଶୁଡ଼ି ପଡ଼ିଥିବା ନଜିର ରହିଛି ।
ଅନ୍ୟପଟେ ବମିଖାଲ ଦୁର୍ଘଟଣା ଗୋଟିଏ ପରିବାରର ହସଖୁସି ଉଜାଡିଦେଇଛି । ଘରର ମୁରବୀ ଆରପାରିରେ ଆଉ କୁନି ଝିଅ ଗୁରୁତର ଅବସ୍ଥାରେ ଏବେ ହସପିଟାଲରେ ଚିକିତ୍ସିତ ହେଉଛି । ବ୍ରିଜ୍ ଭୁଶୁଡିବା ପରେ ଘଟଣାସ୍ଥଳରେ ପ୍ରାଣ ହରାଇଥିବା ଝାରପଡାର ସତ୍ୟବ୍ରତ ପଟନାୟକଙ୍କ ଅନ୍ତେଷ୍ଟି ସରିଛି । ହେଲେ ଏମ୍ସ ହସପିଟାଲରେ ଏବେବି ଚାଲିଛି ୮ ବର୍ଷର ଝିଅ ଶୀତଲର ଚିକିତ୍ସା ।
ଝାରପଡା ମାଜେଷ୍ଟିକ୍ ଆପାର୍ଟମେଂଟର ପ୍ଲଟ୍-ନଂ ୨୦୨ । ଏଇଠି ରୁହନ୍ତି ସତ୍ୟବ୍ରତଙ୍କ ପରିବାର । ହେଲେ ଏବେ ଏହି ଘରେ ତାଲା ପଡିଛି । ପଡୋଶୀଙ୍କ କହିବା କଥା, ସତ୍ୟବ୍ରତ ବେଶ୍ ମେଳାପି ଓ ସରଳ ବ୍ୟକ୍ତି ଥିଲେ । ଯେକୌଣସି ସମସ୍ୟା ହେଲେ ଆଗେଇ ଆସି ତାର ସମାଧାନ କରୁଥିଲେ । ଏବେ ପ୍ରିୟର ପଡୋଶୀଙ୍କୁ ଝୁରୁଛନ୍ତି ଆପାର୍ଟମେଂଟ୍ ବାସିନ୍ଦା ।
ବମିଖାଲ ଓଭରବ୍ରିଜ୍ ଭୁଶୁଡିଲାନି ଯେ, ସତ୍ୟବ୍ରତଙ୍କ ସଂସାର ଉଜୁଡିଗଲା । ଝିଅ ହସପିଟାଲରେ ଆଉ ଘରର ମୁରବୀ ଆରପାରିରେ ।