ମୋଦୀଙ୍କ ରାସ୍ତା ଅବରୋଧ କରିଥିଲେ ଆମ କାର୍ଯ୍ୟକର୍ତ୍ତା, ପ୍ରଧାନମନ୍ତ୍ରୀଙ୍କ ରୁଟ୍ ପ୍ଲାନ ବାବଦରେ ପଞ୍ଜାବ ପୋଲିସ ଠାରୁ ମିଳିଥିଲା ସୂଚନା । ମୁହଁ ଖୋଲିଲେ ଚାଷୀ ନେତା ।
କନକ ବ୍ୟୁରୋ : ପଞ୍ଜାବରେ ପ୍ରଧାନମନ୍ତ୍ରୀଙ୍କ ସୁରକ୍ଷାରେ ସାଂଘାତିକ ତ୍ରୁଟିକୁ ନେଇ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ଏହି ମାମଲାକୁ ନେଇ ଉଭୟ ବିଜେପି ଓ କଂଗ୍ରେସ ମଧ୍ୟରେ ତୁ ତୁ ମେଁ ମେଁ ଆରମ୍ଭ ହୋଇଥିବା ବେଳେ ଭାରତୀୟ କିଷାନ ସଂଘର ନେତା ସୁରଜିତ୍ ସିଂ ଫୁଲଙ୍କର ବଡ ବୟାନ ସାମ୍ନାକୁ ଆସିଛି । ସୁରଜିତ୍ କହିଛନ୍ତି ପ୍ରଧାନମନ୍ତ୍ରୀଙ୍କ ରାସ୍ତା ଅବରୋଧ ଭାରତୀୟ କିଷାନ ସଂଘର କାର୍ଯ୍ୟକର୍ତ୍ତା କରିଥିଲେ । ରାସ୍ତା ଅବରୋଧ କାରଣରୁ ପ୍ରଧାନମନ୍ତ୍ରୀଙ୍କ କାରକେଡ ଆଗକୁ ବଢି ପାରିନଥିଲା । ୧୫ରୁ ୨୦ ମିନିଟ୍ ଅପେକ୍ଷା କରିବା ପରେ ପ୍ରଧାନମନ୍ତ୍ରୀ ସଭାକୁ ନଯାଇ ବିମାନବନ୍ଦରକୁ ଫେରି ଆସିଥିଲେ । ଆଉ ସବୁଠୁ ବଡ କଥା ହେଲା ପ୍ରଧାନମନ୍ତ୍ରୀ ସଡକପଥରେ ଆସୁଥିବା ନେଇ ପୋଲିସ ପାଖରୁ ସୂଚନା ମିଳିଥିବା କହିଛନ୍ତି ସୁରଜିତ୍ ।
Kanak News is now on WhatsApp
Join and get latest news updates delivered to you via WhatsApp
ଏକ ଫେସବୁକ୍ ଭିଡ଼ିଓ ସେୟାର କରି ସୁରଜିତ୍ କହିଛନ୍ତି, ମୋଦୀଙ୍କ ରାସ୍ତା ଅବରୋଧ କରିଥିବାରୁ ସମସ୍ତ କାର୍ଯ୍ୟକର୍ତ୍ତାଙ୍କୁ ଧନ୍ୟବାଦ । ଇଏ ସେହି ବିଜେପି ଯିଏ ଚାଷୀ ଆନ୍ଦୋଳନ ବେଳେ ରାସ୍ତାରେ ଗାତ ଖୋଳି ଅଟକାଇବାକୁ ଚେଷ୍ଟା କରିଥିଲେ, ମଇଳା ପାଣି ପକାଇଥିଲେ । ଆଗକୁ ମଧ୍ୟ ଏଭଳି ଲଢେଇ ଜାରି ରହିବ ।
ତେବେ ଏସବୁ ଭିତରେ ଏହି ଘଟଣା ପରେ ଆକ୍ସନକୁ ଆସିଛନ୍ତି ପଞ୍ଜାବର ଚନ୍ନି ସରକାର । ଘଟଣାର ତଦନ୍ତ ପାଇଁ ଉଚ୍ଚସ୍ତରୀୟ କମିଟି ଗଠନ କରିଛନ୍ତି ପଞ୍ଜାବ ସରକାର । ଏହି କମିଟିରେ ଅବସରପ୍ରାପ୍ତ ବିଚାରପତି ଜଷ୍ଟିସ ମେହତାବ ସିଂ ଗିଲ୍ ଓ ପ୍ରମୁଖ ସଚିବ ଅନୁରାଗ ବର୍ମା ରହିଛନ୍ତି । ୩ ଦିନ ଭିତରେ କମିଟି ତାହାର ରିପୋର୍ଟ ଦେବ ।
ସେହିଭଳି ପ୍ରଧାନମନ୍ତ୍ରୀଙ୍କ ରୁଟକୁ କିଏ ଗ୍ରୀନ୍ ସିଗନାଲ ଦେଇଥିଲା ତାହାକୁ ନେଇ ଏବେ ପ୍ରଶ୍ନ ଉଠିଛି । ତେବେ ପ୍ରଧାନମନ୍ତ୍ରୀଙ୍କ ରୁଟ ଏସପିଜି, କେନ୍ଦ୍ରୀୟ ଗୁଇନ୍ଦା ସଂସ୍ଥା ଓ ସମ୍ପୃକ୍ତ ରାଜ୍ୟର ସ୍ଥାନୀୟ ପୋଲିସର ଆଲୋଚନା ପରେ ସ୍ଥିର ହୋଇଥାଏ । କିନ୍ତୁ ଶେଷ ନିଷ୍ପତ୍ତି ଏସପିଜି ନେଇଥାଏ । ରୁଟର ସୁରକ୍ଷାର ଦାୟିତ୍ୱ ସ୍ଥାନୀୟ ପୋଲିସ ଉପରେ ନ୍ୟସ୍ତ ଥାଏ । ଅଥାର୍ତ ରୁଟରେ କୌଣସି ବାଧା କିମ୍ବା ଏହାକୁ ଫାଙ୍କା ନ କରିଲେ ଏହାର ଜବାବ ସ୍ଥାନୀୟ ପୋଲିସକୁ ଦେବାକୁ ପଡିଥାଏ । ଯେହେତୁ ଚାଷୀ ଉକ୍ତ ରୁଟର ରାସ୍ତା ଅବରୋଧ କରିଥିଲେ ତେଣୁ ଏ ବାବଦରେ ଗୁଇନ୍ଦା ବିଭାଗକୁ ଖବର ମିଳିବା କଥା ଏବଂ ପ୍ରୋଟୋକଲ ଅନୁଯାୟୀ ବିକଳ୍ପ ରୁଟରେ ପ୍ରଧାନମନ୍ତ୍ରୀଙ୍କ କାରକେଡ ଯିବା କଥା । କିନ୍ତୁ ପଞ୍ଜାବରେ ସେମିତି କିଛି ଦେଖିବାକୁ ମିଳିନଥିଲା ।
କଣ ଥିଲା ପୂରା ଘଟଣା?
ପଞ୍ଜାବରେ ମଝି ରାସ୍ତାରେ ଅଟକିଥିଲା ପ୍ରଧାନମନ୍ତ୍ରୀ ମୋଦୀଙ୍କ କାରକେଡ । ଫ୍ଲାଏଓଭର ଉପରେ ପ୍ରାୟ ୧୫ରୁ ୨୦ ମିନିଟ୍ ପ୍ରଧାନମନ୍ତ୍ରୀଙ୍କ କାରକେଡ ଫଶି ରହିଥିଲା । ଆଉ ଏହିଠାରୁ ସଭାସ୍ଥଳକୁ ଯିବା ପରିବର୍ତ୍ତେ ପୁଣିଥରେ ବିମାନବନ୍ଦର ଅଭିମୁଖେ ବାହାରିଥିଲା ପ୍ରଧାନମନ୍ତ୍ରୀଙ୍କ କାରକେଡ । ଆଉ ଶେଷ ମୁହୂର୍ତ୍ତରେ ବାତିଲ ହୋଇଥିଲା ପ୍ରଧାନମନ୍ତ୍ରୀଙ୍କ ଫିରୋଜପୁର ସଭା । ପ୍ରଥମେ ବର୍ଷା କାରଣରୁ ମୋଦୀଙ୍କ ସଭା ବାତିଲ ହୋଇଥିବା କୁହାଯାଉଥିଲେ ମଧ୍ୟ ପରବର୍ତ୍ତୀ ସମୟରେ ସୁରକ୍ଷା ସମ୍ବନ୍ଧୀୟ କାରଣରୁ ସଭା ବାତିଲ ହୋଇଥିବା କୁହାଯାଉଛି । ଏପରିକି ଏନେଇ ଗୃହ ମନ୍ତ୍ରାଳୟ ପକ୍ଷରୁ ପଞ୍ଜାବ ସରକାରଙ୍କୁ ଜବାବ ମଗାଯାଇଛି ।
ଗୃହ ମନ୍ତ୍ରାଳୟ ପକ୍ଷରୁ ଜାରି କରାଯାଇଥିବା ବୟାନରେ କୁହାଯାଇଛି ଯେ, ଆଜି ସକାଳୁ ପ୍ରଧାନମନ୍ତ୍ରୀ ମୋଦୀ ବଠିଣ୍ଡାରେ ପହଞ୍ଚିଥିଲେ । ମେଘୁଆ ପାଗ ଯୋଗୁ ପ୍ରାୟ ୨୦ ମିନିଟ୍ ଅଟକିବା ପରେ ସଡକପଥରେ ରାଷ୍ଟ୍ରୀୟ ସହିଦ ସ୍ମାରକ ଯାଇଥାନ୍ତେ । ଯେଉଁଥିରେ ପ୍ରାୟ ୨ ଘଣ୍ଟା ସମୟ ଲାଗିଥାନ୍ତି । ଆଉ ପ୍ରଧାନମନ୍ତ୍ରୀଙ୍କ ଗସ୍ତ ବାବଦରେ ସଙ୍ଗେ ସଙ୍ଗେ ପଞ୍ଜାବ ପୋଲିସ ଡିଜିଙ୍କୁ ଜଣାଇବା ସହ ଆବଶ୍ୟକ ସୁରକ୍ଷା ବ୍ୟବସ୍ଥା କରିବାକୁ କୁହାଯାଇଥିଲା ।
ତେବେ ରାଷ୍ଟ୍ରୀୟ ସହିଦ ସ୍ମାରକୀ ଠାରୁ ୩୦ କିଲୋମିଟର ଦୂରରେ ପ୍ରଧାନମନ୍ତ୍ରୀଙ୍କ କାରକେଡ ଥିବା ବେଳେ ଏକ ଫ୍ଲାଏଓଭରରେ ଅଟକିବାକୁ ପଡିଲା । କାରଣ ଆଗକୁ ପ୍ରତିବାଦ କରୁଥିଲେ ପ୍ରଦର୍ଶନକାରୀ । ଆଉ ଉକ୍ତ ଫ୍ଲାଏଓଭର ଉପରେ ୧୫ରୁ ୨୦ ମିନିଟ୍ ଫଶି ରହିବା ପରେ ବିମାନବନ୍ଦର ଅଭିମୁଖେ ମୋଦୀଙ୍କ କାରକେଡ ବାହାରିଥିଲା । ଆଉ ଏହାକୁ ଗୃହ ମନ୍ତ୍ରାଳୟ ପ୍ରଧାନମନ୍ତ୍ରୀଙ୍କ ସୁରକ୍ଷାରେ ସାଂଘାତିକ ତ୍ରୁଟି ବୋଲି ଦର୍ଶାଇଛି । କାରଣ ପ୍ରଧାନମନ୍ତ୍ରୀଙ୍କ ଗସ୍ତ ବାବଦରେ ପୂର୍ବରୁ ପଞ୍ଜାବ ସରକାରଙ୍କୁ କୁହାଯାଇଥିଲା । ଯାହାକୁ ଧ୍ୟାନରେ ରଖି ସମସ୍ତ ପ୍ରକାର ପ୍ରସ୍ତୁତି, ବ୍ୟବସ୍ଥା କରିବା କଥା । ଏପରିକି ଜରୁରୀକାଳୀନ ସ୍ଥିତି ପାଇଁ ମଧ୍ୟ ପ୍ରସ୍ତୁତି ରହିବାର ଆବଶ୍ୟକ ଥିଲା । ଯେହେତୁ ପ୍ରଧାନମନ୍ତ୍ରୀ ସଡକ ମାର୍ଗରେ ଯାଉଥିଲେ ତେଣୁ ଅତିରିକ୍ତ ପୋଲିସ ନିୟୋଜିତ କରିବା କଥା । ଯାହା କରାଯାଇନଥିଲା । ଯେଉଁଥିପାଇଁ ପଞ୍ଜାବ ସରକାରଙ୍କୁ ଏ ସମ୍ବନ୍ଧରେ ବିସ୍ତୃତ ରିପୋର୍ଟ ଦେବାକୁ ଗୃହ ମନ୍ତ୍ରାଳୟ ପକ୍ଷରୁ କୁହାଯାଇଛି ।