କୁଲଭୂଷଣ ଯାଦବଙ୍କୁ ପାକିସ୍ତାନର ଫାଶି ଦଣ୍ଡାଦେଶ ! ବଂଚାଇବାକୁ ରାସ୍ତା ଖୋଜୁଛି ଭାରତ
କନକ ବ୍ୟୁରୋ : ର’ ଏଜେଂଟ୍ କହି କୁଲଭୂଷଣ ଯାଦବଙ୍କୁ ପାକିସ୍ତାନ ଫାଶି ଦଣ୍ଡାଦେଶ ଶୁଣାଇଥିବା ବେଳେ କୁଲଭୂଷଣଙ୍କୁ ବଂଚାଇବାକୁ ରାସ୍ତା ଖୋଜୁଛି ଭାରତ । ଏନେଇ ଭାରତ ପାଖରେ କିଛି ବିକଳ୍ପ ମଧ୍ୟ ଖୋଲା ରହିଛି । ପ୍ରଥମ ବିକଳ୍ପ ହେଉଛି ଏହି ମାମଲାରେ ଭାରତ ଅନ୍ତଃରାଷ୍ଟ୍ରୀୟ ଅଦାଲତର ଦ୍ୱାରସ୍ଥ ହୋଇପାରିବ । କାରଣ ଗତବର୍ଷ ପାକ୍ ବୈଦେଶିକ ପରାମର୍ଶଦାତା ପାକିସ୍ତାନ ସିନେଟକୁ କହିଥିଲେ ଯେ କୁଲଭୂଷଣଙ୍କ ବିରୋଧରେ ଦୃଢ ପ୍ରମାଣ ମିଳୁ ନଥିବାରୁ ସରକାର ଡୋଜିଅର ପୂରା କରିପାରୁ ନାହାଁନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହା ସହ କୁଲଭୂଷଣ ର’ ଏଜେଂଟ୍ ବୋଲି ପାକିସ୍ତାନର ଦାବିକୁ ଶତ ପ୍ରତିଶତ ମିଥ୍ୟା କହି ସାରିଛନ୍ତି ପାକିସ୍ତାନରେ ଅବସ୍ଥାପିତ ଇରାନ୍ ରାଷ୍ଟ୍ରଦୂତ । ତେଣୁ ଏହି ସବୁ ତଥ୍ୟ ଆଧାରରେ ଅନ୍ତଃରାଷ୍ଟ୍ରୀୟ ଅଦାଲତର ଦ୍ୱାରସ୍ଥ ହୋଇପାରେ ଭାରତ । ତେବେ ପାକିସ୍ତାନ ସହ ଦ୍ୱିପାକ୍ଷିକ ସମସ୍ୟା ଠାରୁ ଅନ୍ତଃରାଷ୍ଟ୍ରୀୟ ସମୁଦାୟକୁ ଦୂରେଇ ରଖିବାକୁ ସବୁବେଳେ ଚାହିଁ ଆସିଛି ଭାରତ । ତେଣୁ ଏହି ନୀତିର ପରିପନ୍ଥୀ ହୋଇଥିବାରୁ ଅନ୍ତଃରାଷ୍ଟ୍ରୀୟ ଅଦାଲତକୁ ଯିବାର ସମ୍ଭାବନା କମ୍ ରହିଛି ।
ଆଉ ଏକ ବିକଳ୍ପ ହେଉଛି ଟ୍ରାକ୍ ଟୁ ଡିପ୍ଲୋମାସିରେ ସହମତି । ଅର୍ଥାତ୍ ଉଭୟ ଦେଶ ମଧ୍ୟରେ ଗୁପ୍ତଚରଙ୍କ ଅଦଳ-ବଦଳ । କାରଣ ଋଷ ଓ ଆମେରିକା ଭଳି ଅହି-ନକୁଳ ସଂପର୍କ ଥିବା ଦେଶଗୁଡିକ ବି ପରସ୍ପର ମଧ୍ୟରେ ଏପରି ବ୍ୟବସ୍ଥାକୁ କାର୍ଯ୍ୟକାରୀ କରିଥାନ୍ତି । ତେବେ ପାକିସ୍ତାନର ସରିଫ ସରକାର ଯଦି ଏଥିପାଇଁ ରାଜି ବି ହୁଅନ୍ତି, ପାକ୍ ସେନା କିନ୍ତୁ ଏଥିପାଇଁ ଅନୁମତି ଦେବାର ସମ୍ଭାବନା କମ୍ ରହିଛି ।
ଆଉ ଏକ ବିକଳ୍ପ ହେଉଛି ପାକିସ୍ତାନରେ ପ୍ରଚଳିତ ଆଇନ ଅନୁଯାୟୀ କୋର୍ଟ ମାର୍ଶଲ ଦ୍ୱାରା ଦଣ୍ଡାଦେଶ ପାଇଥିବା ଦୋଷୀ ଏହାର ପୁନର୍ବିଚାର ପାଇଁ ସିଭିଲ୍ କୋର୍ଟରେ ଆବେଦନ କରିପାରିବେ । ଏଥିପାଇଁ ଭାରତ ମଧ୍ୟ ଓକିଲ ଯୋଗାଇ ଦେଇପାରିବ । ଏଭଳି ଅପରାଧୀଙ୍କ ପାଇଁ ସେଠାରେ ରାଷ୍ଟ୍ରପତିଙ୍କ ପାଖରେ ଗୁହାରି କରିବା ଶେଷ ବିକଳ୍ପ ହୋଇଥାଏ । କୁଲଭୂଷଣଙ୍କ ପାଖରେ ଏହି ବିକଳ୍ପ ଖୋଲା ରହିଛି ।
ତେବେ ଆଉ ଏକ ବିକଳ୍ପ ହେଉଛି ପାକିସ୍ତାନ ଉପରେ ଅନ୍ତଃରାଷ୍ଟ୍ରୀୟ ଚାପ । କାରଣ ଆମେରିକା ଓ ସାଉଦିଆରବ ପରି ମଧ୍ୟପ୍ରାଚ୍ୟ ରାଷ୍ଟ୍ରଙ୍କ ଚାପ ପାକିସ୍ତାନୀ ଜେନରାଲଙ୍କ ଉପରେ ପ୍ରାୟ କାମ କରିଥାଏ । ଏହି ସବୁ ଦେଶ ସହ ଭାରତର ସଂପର୍କ ମଧ୍ୟ ବେଶ୍ ଭଲ ରହିଛି । ତେଣୁ କୂଟନୈତିକ ସ୍ତରରେ ପାକିସ୍ତାନ ଉପରେ ଚାପ ପକାଇପାରେ ଭାରତ । ତେବେ ଏତେ ସବୁ ବିକଳ୍ପ ସତ୍ୱେ ଭାରତୀୟ ବନ୍ଦୀଙ୍କ ବିରୋଧରେ ପାକିସ୍ତାନ ଯେଉଁଭଳି ଏକପାଖିଆ ନୀତି ଆପଣାଉଛି, ଭାରତର ଉଦ୍ୟମ କେତେ ସଫଳ ହେବ ତାହା ସନ୍ଦେହ ଘେରରେ ।
ଏହା ସହ ଦେଖନ୍ତୁ ଏହି ଭିଡିଓ –