ବନ୍ଧୁକ ମୁନରେ ଶାସନ ଛଡାଇନେଇଥିବା ତାଲିବାନୀଙ୍କୁ ବଡ ବିରୋଧ । ପ୍ରଥମ ଥର ପାଇଁ ଜଲାଲାବାଦରେ ରାସ୍ତାକୁ ଓହ୍ଲାଇଲେ ସାଧାରଣ ଲୋକ । ତାଲିବାନ ପତାକା କାଢ଼ି ଲଗାଇଲେ ଆଫଗାନ ପତାକା ।
କନକ ବ୍ୟୁରୋ: ଆଜି ପ୍ରଥମ ଥର ପାଇଁ ଆଫଗାନିସ୍ତାନରେ ତାଲିବାନ ବିରୋଧୀ ପ୍ରତିବାଦ ଦେଖିବାକୁ ମିଳିଛି । ପଶ୍ଚିମ ଆଫଗାନର ଜଲାଲାବାଦ ନାମକ ସହରର ଏକ ଛକରେ ବିକ୍ଷୋଭକାରୀ ମାନେ ତାଲିବାନ ବିରୋଧୀ ନାରା ଦେବା ସହ ଦେଶର ପତାକା ଉଡାଇଥିଲେ । କାବୁଲ ଠାରୁ ୧୫୦କିଲୋମିଟର ଦୂର ଜଲାଲାବାଦରେ ଏହି ପ୍ରତିବାଦ ଚାଲିଥିବାବେଳେ ତାଲିବାନୀ ମାନେ ଗୁଳି ଚଳାଇଥିଲେ । ଏଥିରେ ୩ଜଣଙ୍କର ମୃତ୍ୟୁ ହୋଇଛି । ତାଲିବାନୀଙ୍କ ବିରୋଧରେ ଏଭଳି ପ୍ରତିବାଦ ପ୍ରଥମ ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛିଦିନ ହେଲା ହାତରେ ବନ୍ଧୁକ ଧରି ତାଲିବାନୀମାନେ ଆଫଗାନ ରାସ୍ତାରେ ପଇଁତରା ମାରୁଥିବାର ଖବର ଆମେ ଜାଣିଛେ । ହେଲେ ଏହାରି ଭିତରେ ଆଫଗାନିସ୍ତାନର ଜଲାଲାବାଦରୁ ସାଧାରଣ ନାଗରିକଙ୍କ ପ୍ରତିବାଦ ସାମ୍ନାକୁ ଆସିଛି । ତାଲିବାନର କାବୁଲ ଦଖଲ ପରେ ଏହା ପ୍ରଥମ ବଡ ପ୍ରତିବାଦ । ତାଲିବାନ ବିରୋଧୀ ନାରା ଦେଇ ସାଙ୍ଗରେ ଜାତୀୟ ପତାକା ଧରି ଆଗକୁ ବଢୁଛନ୍ତି ଆଫଗାନିସ୍ତାନର ସାଧାରଣ ନାଗରିକ । ଜଲାଲାବାଦ ସହରରେ କିଛି ଲୋକ ତାଲିବାନକୁ ଖୋଲାଖୋଲି ବିରୋଧ କରିଛନ୍ତି । ହାତରେ ହତିଆର ଧରି ଏକ ଗଣତାନ୍ତ୍ରିକ ରାଷ୍ଟ୍ରଠାରୁ କ୍ଷମତା ଛଡାଇ ନେଇଥିବା ଦୁର୍ଦ୍ଦର୍ଶ ଆତଙ୍କବାଦୀ ଗୋଷ୍ଠୀଙ୍କ ବିରୋଧରେ ସାଧାରଣ ନାଗରିକଙ୍କ ନିର୍ଭିକ ସ୍ୱର ଶୁଭିଛି ।
ଜୀବନ ବିକଳରେ ଲୋକେ ଅନ୍ୟଦେଶର ଉଦ୍ଧାରକାରୀ ବିମାନରେ ଝୁଲି ବାହାରକୁ ଚାଲିଯିବାକୁ ବ୍ୟାକୁଳ ହେଉଥିବାର ଚିତ୍ର ଭିତରେ ଏହି ଚିତ୍ର ବି ସାମ୍ନାକୁ ଆସିଛି । ଯେଉଁଠି ଜଲାଲାବାଦର ଏକ ଉଚ୍ଚ ସ୍ମାରକୀରେ ତାଲିବାନ ପତାକାକୁ ଖୋଲି ଆଫଗାନିସ୍ତାନର ଜାତୀୟ ପତାକା ଉଡାଇବାକୁ ସାହସ ଜୁଟାଇଛନ୍ତି କିଛି ସାଧାରଣ ନାଗରିକ । ୮ ସେକେଣ୍ଡର ଏକ ଭିଡିଓକୁ ଟ୍ୱିଟ କରିଛି ଏକ ସ୍ଥାନୀୟ ଗଣମାଧ୍ୟମ ପାଝୱକ ଆଫଗାନ୍ ନ୍ୟୁଜ । ନାଲି, ନୀଳ ଓ କଳା ରଙ୍ଗର ଆଫଗାନ ଜାତୀୟ ପତାକାକୁ ଇଡାଇ କିଛି ଲୋକ ତାଲିବାନ ବିରୋଧରେ ମୁଣ୍ଡ ନୁଆଁଇବେ ନାହିଁ ବୋଲି ଶୁଣାଇ ଦେଇଛନ୍ତି ।
ଦୀର୍ଘ ୨୦ ବର୍ଷ ପରେ ଆଫଗାନକୁ ପୁଣି କବଜାକୁ ନେଇଥିବା ତାଲିବାନ ଏଭଳି ଖୋଲା ଆହ୍ୱାନକୁ କେମିତି ହଜମ କରିପାରିଥାନ୍ତା । ଗତ ରବିବାର ତାଲିବାନର କାବୁଲ ଦଖଲ ପରେ ଏହା ପ୍ରଥମ ବଡ ପ୍ରତିବାଦ ଶୋଭାଯାତ୍ରା । ତେଣୁ ଲୋକଙ୍କୁ ଏଭଳି କରୁଥିବା ଦେଖି ତତକ୍ଷଣାତ କାର୍ଯ୍ୟାନୁଷ୍ଠାନ ଆରମ୍ଭ କରିଦେଇଥିଲେ ତାଲିବାନୀ ସୈନିକ । ଧମାଧମ ଗୁଳିମାଡରେ ଛତ୍ରଭଙ୍ଗ ଦେଇଥିଲେ ପ୍ରତିବାଦକାରୀ । ଆଖିବୁଜା ଗୁଳିମାଡରେ କିଛି ଲୋକଙ୍କ ମୃତ୍ୟୁ ହେବା ସହ କେତେକ ଆହତ ହୋଇଥିବା କୁହାଯାଉଛି । କୁହାଯାଉଛି କାବୁଲରେ ତାଲିବାନ ଓ ଆଫଗାନିସ୍ତାର ପୂର୍ବତନ ରାଷ୍ଟ୍ରପତି ହମିଦ କାର୍ଜାଇଙ୍କ ସହ ଅନ୍ୟକିଛି ନେତାଙ୍କୁ ନେଇ ଆଲୋଚନା ଚାଲିଛି । ମିଳିତ ସରକାର ଚଳାଇବା ପାଇଁ ପ୍ରକ୍ରିୟା ଆରମ୍ଭ ହୋଇଥିବାବେଳେ ଜଲାଲାବାଦରେ ଏଭଳି ପ୍ରତିବାଦ ଓ ଗୁଳିକାଣ୍ଡ ହୋଇଛି । କାହାରି କିଛି କ୍ଷତି କରାଯିବ ନାହିଁ ବୋଲି ତାଲିବାନର ପ୍ରତିଶ୍ରୁତି ସତ୍ତେ୍ୱ ସାଧାରଣ ନାଗରିକ ବିଶ୍ୱାସ କରିପାରୁନାହାନ୍ତି ।