କନକ ବ୍ୟୁରୋ: ୩୫ ବର୍ଷ ମଧ୍ୟରେ ୪୦୦ରୁ ଅଧିକ ଥର କୋର୍ଟ ଦୌଡି ଦୌଡି ନୟାନ୍ତ ହେବା ପରେ ଜୀବନର ସାୟାହ୍ନରେ ମିଳିଲା ନ୍ୟାୟ । ଏପରି ଘଟଣା ଘଟିଛି ଉତ୍ତରପ୍ରଦେଶରେ ।
ଏ ହେଉଛି ଉତ୍ତରପ୍ରଦେଶ ମୁଜାଫରନଗରର ୮୫ ବର୍ଷିୟ ଧର୍ମପାଲଙ୍କ ଦୁଃଖଦ କାହାଣୀ । ନ୍ୟାୟ ପାଇବା ଆଶାରେ ଜୀବନର ସବୁ ସମୟ କଟିଗଲା । ଦୀର୍ଘ ୩୫ ବର୍ଷ କାଳର ଲମ୍ବା ସଂଘର୍ଷ । ଏହାରି ଭିତରେ ୪୦୦ରୁ ଅଧିକ ଥର କୋର୍ଟକୁ ଦୌଡି କୌଡି ନୟାନ୍ତ ହେଲେ । ଶେଷରେ ୮୫ ବର୍ଷରେ ତାଙ୍କୁ ମିଳିଛି ନ୍ୟାୟ । ହେଲେ କି ପ୍ରକାର ମସସ୍ୟାରେ ଫଶିଥିଲେ ତାଙ୍କୁ ଏପରି ସଂଘର୍ଷ କରିବାକୁ ପଡିଲା?
Kanak News is now on WhatsApp
Join and get latest news updates delivered to you via WhatsApp
କଥା ହେଉଛି ୧୯୮୬ ମସିହାରେ ଧର୍ମପାଲ ତାଙ୍କ ଭାଇ ଓ ଅନ୍ୟ ଜଣେ ସହଯୋଗୀଙ୍କ ସହ ମିଶି ଘରେ ବେଆଇନ ଭାବେ କୀଟନାଶକ ଔଷଧ ପ୍ରସ୍ତୁତ କରୁଥିଲେ । ଏହି ଅଭିଯୋଗରେ ସେମାନଙ୍କୁ ଗିରଫ କରାଯାଇ ମାମଲା ଆରମ୍ଭ ହୋଇଥିଲା । ଏହି ମାମଲାରେ ଅଭିଯୁକ୍ତ ନିଜକୁ ମୁକ୍ତ କରିବାକୁ ଯେତେ ପ୍ରମାଣ ପତ୍ର ଉପସ୍ଥାପନ କରିଥିଲେ ବି କେଉଁଥିରେ ସନ୍ତୁଷ୍ଟ ହୋଇନଥିଲେ ମାନ୍ୟବର କୋର୍ଟ । ଫଳରେ ୧୮ ଦିନ ଜେଲରେ ରହି ଜାମିନ ପାଇଥିଲେ ବି କୋର୍ଟ ତାଙ୍କ ପିଛା ଛାଡିନଥିଲା । ବାରମ୍ବାର କୋର୍ଟକୁ ଦୌଡିଥିଲେ ଧର୍ମପାଲ । ଏମିତି କୋର୍ଟରେ ତାଙ୍କୁ ୪୦୦ରୁ ଅଧିକ ଥର ହାଜର ହେବାକୁ ପଡିଲା । ଶେଷରେ ଚଳିତ ବର୍ଷ ଚଳିତ ମାସରେ ମୁଜାଫରନଗର ଅତିରିକ୍ତ ମୁଖ୍ୟ ନ୍ୟାୟାଧିଶ ପ୍ରମାଣ ଅଭାବରୁ ଧର୍ମପାଲଙ୍କୁ ମୁକ୍ତ କରିଛନ୍ତି ।
ଏହି ୩୫ ବର୍ଷ ଭିତରେ ଅନେକ କିଛି ହରାଇ ସର୍ବସ୍ୱାନ୍ତ ହୋଇଛନ୍ତି ଧର୍ମପାଲ ଓ ତାଙ୍କ ପରିବାର । ନିଜେ ତ ଯାହା ଆର୍ଥିକ କଷ୍ଟ ପାଇଛନ୍ତି । ଏହାରି ଭିତରେ ତାଙ୍କ ଭାଇ ମଧ୍ୟ ଆର ପାରିକୁ ଚାଲିଯାଇଛନ୍ତି । ଅନ୍ୟଜଣେ ସହଯୋଗୀଙ୍କ ପତ୍ତା ମିଳୁନଥିବାରୁ କୋର୍ଟ ତାଙ୍କୁ ପଳାତକ ଘୋଷଣା କରିଛନ୍ତି । ଟାଇମ୍ସ ଅଫ ଇଣ୍ଡିଆକୁ ଏକ ସାକ୍ଷାତକାର ଦେଇ ଧର୍ମପାଲ କହିଛନ୍ତି ଯେ, କୋର୍ଟ ପାଇଁ ତାଙ୍କ ଜୀବନର ବହୁମୂଲ୍ୟ ସମୟ ନଷ୍ଟ ହୋଇଗଲା । ଏହି ଦୀର୍ଘ ଆଇନ ସଂଘର୍ଷରେ ସେ ତାଙ୍କର ଅର୍ଥ, ପ୍ରତିଷ୍ଠା, ମାନସିକ ଶାନ୍ତି ଓ ସ୍ୱଜନଙ୍କୁ ହରାଇଛନ୍ତି । ବିଳମ୍ବରେ ହେଉ ପଛେ ତାଙ୍କୁ ନ୍ୟାୟ ମିଳିଛି । ଅନ୍ତତଃ ଶାନ୍ତିରେ ମରି ତ ପାରିବେ ବୋଲି କହିଛନ୍ତି ଧର୍ମପାଲ ।