ଆଜି ବସିବ ବୈଠକ, ନିର୍ଦ୍ଧାରିତ ହେବ ଜୋରିମାନା ! କେଉଁ ମୋଡାଲିଟି ଆଧାରରେ କେତେ ଆଦାୟ ହେବ ନିଆଯିବ ନିଷ୍ପତ୍ତି
କନକ ବ୍ୟୁରୋ: କେଉଁ ଖଣି ମାଲିକଠାରୁ କେତେ ଜୋରିମାନା ଆଦାୟ ହେବ ସେ ନେଇ ଆଜି ସଚିବାଳୟରେ ବସିବ ବୈଠକ । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ସଚିବାଳୟରେ ଏହି ବୈଠକ ବସିବ । ଖଣି ଦୁର୍ନୀତିରେ ସମ୍ପୃକ୍ତ ଥିବା ଖଣି ମାଲିକଙ୍କଠାରୁ ଶତ ପ୍ରତିଶତ ଜୋରିମାନା ଆଦାୟ କରିବାକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ତେବେ କାହାଠାରୁ କେତେ ଜୋରିମାନା ଆଦାୟ ହେବ ଏବଂ କେଉଁ ଆଧାରରେ ଆଦାୟ ହେବ ସେ ନେଇ ଏହି ବୈଠକରେ ନିଷ୍ପତ୍ତି ନିଆଯିବ । ଖଣି ଅଂଚଳରେ କଣ କାମ କରାଯାଇଛି ସେ ନେଇ ରିପୋର୍ଟ ମାଗିଛନ୍ତି ସୁପ୍ରିମକୋର୍ଟ । ତାହା ମଧ୍ୟ ସେପ୍ଟେମ୍ବର ସୁଦ୍ଧା ଦାଖଲ କରାଯିବ ବୋଲି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ କହିଛନ୍ତି ।
ସୂଚନା ମୁତାବକ, ଓଡିଶା ଖଣି ଦୁର୍ନୀତି ମାମଲାରେ ସୁପ୍ରିମକୋର୍ଟଙ୍କ ପକ୍ଷରୁ କିଛି ଦିନ ତଳେ ରାୟ ଆସିଥିଲା । ବର୍ତ୍ତମାନ ପରିସ୍ଥିତିରେ ସିବିଆଇ ତଦନ୍ତ କରାଇବାକୁ ସୁପ୍ରିମକୋର୍ଟ ମନାକରିଛନ୍ତି । ତେବେ ବେଆଇନ ଖଣି ଉତ୍ତୋଳନକାରୀଙ୍କ ଉପରେ ସୁପ୍ରିମକୋର୍ଟ ଫାଇନ୍ ଲଗାଇଛନ୍ତି ।
ପରିବେଶ ମଞ୍ଜୁରୀ ପାଇନଥିବା ଖଣିରୁ ହୋଇଥିବା ବେଆଇନ ଉତ୍ତୋଳନ ଉପରେ ଜୋରିମାନା ଲଗାଇଛନ୍ତି ସୁପ୍ରିମକୋର୍ଟ । ଏହି ବାବଦରେ ରାଜ୍ୟ ସରକାର ଶତ ପ୍ରତିଶତ ଜୋରିମାନା ଲଗାଇପାରିବେ ବୋଲି ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ।
ଏହାଛଡା ପରିବେଶ ମଞ୍ଜୁରୀ ପାଇଥିବା ଖଣିରୁ ନିର୍ଦ୍ଧାରିତ ପରିମାଣଠାରୁ ଅଧିକ ଉତ୍ତୋଳନ ଉପରେ ମଧ୍ୟ ଜୋରିମାନା ଲାଗିଛି । ଗୁରୁତ୍ୱପୂର୍ଣ୍ଣ ଘଟଣା କ୍ରମେ ଜିନ୍ଦଲ ଷ୍ଟିଲ, ଶାରଦା ମାଇନିଂ ଓ ଏସଏଲ ତରଫରୁ ଖଣି ଖୋଲିବା ପାଇଁ ଦାଖଲ ହୋଇଥିବା ଆବେଦନ ଉପରେ ଶୁଣାଣି ହେବ । ଜାତୀୟ ଖଣି ନୀତି ବଦଳିବା ଦରକାର ବୋଲି ମତ ଦେଇଛନ୍ତି ସୁପ୍ରିମକୋର୍ଟ ।