କନକ ବ୍ୟୁରୋ: ଓଡ଼ିଶାରେ ଏଚ୍୩ଏନ୍୨ ସଂକ୍ରମିତ ଚିହ୍ନଟ ହେବା ପରେ ସତର୍କ ହୋଇଛି ସ୍ୱାସ୍ଥ୍ୟ ବିଭାଗ । ମାସ୍କ ପିନ୍ଧିବା, ଛିଙ୍କିବା ବେଳେ ରୁମାଲ ବ୍ୟବହାର କରିବା ଓ ପ୍ରଚୁର ପରିମାଣର ପାଣି ପିଇବା ପାଇଁ ପରାମର୍ଶ ଦିଆଯାଇଛି । କୋଭିଡ୍ ଭଳି ଇନଫ୍ଲୁଏଞ୍ଜା ସଂକ୍ରମଣ ନେଇ ଗାଇଡଲାଇନ୍ ପାଳନ କରିବା ପାଇଁ ପରାମର୍ଶ ଦିଆଯାଇଛି । ତେବେ ରାଜ୍ୟରେ ୫୯ ଜଣ ଏଚ୍୩ଏନ୍୨ ଆକ୍ରାନ୍ତ ଚିହ୍ନଟ ହେବା ପରେ ସତର୍କ ଘଣ୍ଟି ବାଜିଛି । ଥଣ୍ଡା, କାଶ ଓ ଜ୍ୱରରେ ଅନେକ ଆକ୍ରାନ୍ତ ହୋଇଥିବା ବେଳେ ଏହା ଉପରେ କିପରି ବ୍ରେକ ଲାଗିବ ଏନେଇ ଚିନ୍ତା ବଢ଼ିଛି ।
Kanak News is now on WhatsApp
Join and get latest news updates delivered to you via WhatsApp
ସତର୍କ ରହିବାକୁ ପରାମର୍ଶ
- ଇନଫ୍ଲୁଏଞ୍ଜା ହେଉଛି ଏକ ସାଧାରଣ ଋତୁକାଳୀନ ଭୂତାଣୁ ସଂକ୍ରମଣ
- ଏଚ୍୧ଏନ୍୧ ଓ ଏଚ୍୩ଏନ୍୨ ହେଉଛି ‘ଇନଫ୍ଲୁଏଞ୍ଜା-ଏ’ର ଉପପ୍ରଜାତି
- ଆକ୍ରାନ୍ତଙ୍କ ଠାରେ ଜ୍ୱର, ଥଣ୍ଡା, କାଶ, ନାକରୁ ପାଣି ବୋହିବା ଭଳି ଲକ୍ଷଣ ଦେଖାଯାଏ
- ବିଭିନ୍ନ ରୋଗରେ ପୀଡ଼ିତ ଓ ବୃଦ୍ଧବୃଦ୍ଧାଙ୍କ କ୍ଷେତ୍ରରେ ଶ୍ୱାସକ୍ରିୟାରେ ଜଟିଳତା ସୃଷ୍ଟି କରିପାରେ
- ଭୂତାଣୁରେ ୯୦ ପ୍ରତିଶତ ସଂକ୍ରମିତ ଆପେ ଆପେ ସୁସ୍ଥ ହୋଇଥାନ୍ତି
- ୧୦ ପ୍ରତିଶତଙ୍କ କ୍ଷେତ୍ରରେ ଶ୍ୱାସକ୍ରିୟାରେ ଅସୁବିଧା ହୋଇପାରେ
- କାଶ ଓ କଫ ନକମିଲେ, ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ
- ଡିସେମ୍ବରରୁ ମାର୍ଚ୍ଚ ଭିତରେ ଭୂତାଣୁର ସଂକ୍ରମଣ ଅଧିକ ଥାଏ
- ରାଜ୍ୟର ୩୦ ଡିପିଏଚ୍ଏଲ୍ରେ କ୍ରମାଗତ ଭାବେ ଭୂତାଣୁ ଉପରେ ପରୀକ୍ଷା କରାଯାଉଛି
- ରାଜ୍ୟର ୨୩ ଆରଟିପିସିଆର ଲ୍ୟାବରେ ମଧ୍ୟ ପରୀକ୍ଷା କରାଯାଉଛି
- ଲକ୍ଷଣ ଦେଖାଦେଲେ ମାସ୍କ ପିନ୍ଧିବା ଓ କରୋନା ନିୟମ ପାଳନ କରିବା ଆବଶ୍ୟକ
ଦେଶର ବିଭିନ୍ନ ରାଜ୍ୟରେ ଏଚ୩ଏନ୨ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ତେଣୁ ସତର୍କ ରହିବାକୁ ରାଜ୍ୟଗୁଡିକୁ ପରାମର୍ଶ ଦେଇଛି କେନ୍ଦ୍ର । ମୁକାବିଲା କରିବା ପାଇଁ କୋଭିଡ ବିରୋଧୀ ୫ ସୂତ୍ରୀ କାର୍ଯ୍ୟକ୍ରମ ଚାଲୁ ରଖିବାକୁ କୁହାଯାଇଛି । ଟେଷ୍ଟ, ଟ୍ରାକ, ଟ୍ରିଟମେଣ୍ଟ ଓ ଟିକାକରଣ ଉପରେ ଗୁରୁତ୍ୱ ଦେବାକୁ କୁହାଯାଇଛି । ହସ୍ପିଟାଲଗୁଡ଼ିକୁ ପ୍ରସ୍ତୁତି ରଖିବାକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର ।
ମେଡିକାଲ ବେଡ୍ ଓ ଅକ୍ସିଜେନ୍ ସିଲିଣ୍ଡର ମହଜୁଦ ରଖିବାକୁ କୁହାଯାଇଛି । ଏହା ଋତୁକାଳୀନ ଇନଫ୍ଲୁଏଞ୍ଜା ଓ ଚଳିତ ମାସ ଶେଷ ସୁଦ୍ଧା ହ୍ରାସ ପାଇବ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ କହିଛି । ଭିଡ଼ ସ୍ଥାନରେ ମାସ୍କ ପିନ୍ଧିବା, ବାରମ୍ବାର ହାତ ଧୋଇବା, କାଶ ବା ଛିଙ୍କ ହେଲେ ଟିସୁ କିମ୍ବା କହୁଣୀରେ ମୁହଁକୁ ଢାଙ୍କିବା, ସର୍ବସାଧାରଣ ସ୍ଥାନରେ ଛେପ ନପକାଇବାକୁ କହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । କରୋନା ଭଳି ମାର୍ଗଦର୍ଶିକା ଜାରି କରି ସ୍ଥିତି ଉପରେ ରାଜ୍ୟ ଓ ଜିଲ୍ଲାସ୍ତରରେ ନଜର ରଖିବାକୁ ପରାମର୍ଶ ଦେଇଛି କେନ୍ଦ୍ର ।