ଆତଙ୍କର ଝଡତୋଫାନ : ଦିଲ୍ଲୀ, ହରିୟାଣା ସହ ୟୁପି ଓ ରାଜସ୍ଥାନରେ ଧୂଳିଝଡ ସହ ବର୍ଷା । ବିଜୁଳି ଠପ୍, ଆଜି ଝଡବର୍ଷା ସହ କୁଆପଥର ମାଡ ଆଶଙ୍କା
କନକ ବ୍ୟୁରୋ : ଉତ୍ତର ଭାରତରେ ତାଣ୍ଡବ ମଚାଇବା ପରେ ପୁଣି ଫେରିଛି ଝଡ ତୋଫାନ । ଦିଲ୍ଲୀରେ ସୋମବାର ସନ୍ଧ୍ୟାରେ ପୁଣି ହୋଇଛି ଭୟଙ୍କର ଝଡତୋଫାନ । ଦିଲ୍ଲୀ ଏନସିଆର, ନୋଏଡା, ଗାଜିଆବାଦ ସମେତ ଅନେକ ଅଂଚଳରେ ପ୍ରବଳ ଧୂଳିଝଡ ହୋଇଛି । ହରିୟାଣା ପଟୁ ଆସିଥିବା ଏହି ଝଡତୋଫାନର ବେଗ ଘଂଟା ପ୍ରତି ପ୍ରାୟ ୭୦ କିଲୋମିଟର ରହିଥିଲା । ଦିଲ୍ଲୀରେ ଝଡ ତୋଫାନ ଯୋଗୁ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ୯ଟି ବିମାନ ପ୍ରାୟ ୨୨ ମିନିଟ ବିଳମ୍ବରେ ଉଡାଣ ଭରିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗୁରୁଗ୍ରାମରେ ପ୍ରବଳ ବେଗରେ ଝଡ ତୋଫାନ ଫଳରେ ବଡ ବଡ ଗଛ ଉପୁଡି ପଡିବା ଯୋଗୁ ବିଦ୍ୟୁତ ସରବରାହ ଠପ ହୋଇପଡିଛି । ଗ୍ରେଟର ନୋଏଡା, ଦାଦ୍ରି ଅଂଚଳରେ ପ୍ରବଳ ବେଗରେ ପବନ ବହିବା ସହ ବିଜୁଳି ଘଡଘଡି ମାରିଛି । ଗାଜିଆବାଦ ଓ ନୋଏଡାରେ ସବୁ ସ୍କୁଲ କଲେଜ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ଉତ୍ତରପ୍ରଦେଶର ଅନେକ ଜିଲ୍ଲାରେ ଝଡତୋଫାନର ପ୍ରଭାବ ଦେଖିବାକୁ ମିଳିଛି । ମେରଠରେ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସମସ୍ତ ସ୍କୁଲକୁ ବନ୍ଦ କରି ଦିଆଯାଇଛି ।
ସେପଟେ ରାଜସ୍ଥାନର ବିଭିନ୍ନ ଅଂଚଳରେ ମଧ୍ୟ ପ୍ରବଳ ଧୂଳିଝଡ ହୋଇଛି । ସିକର, ଝୁନଝୁନୁ ଓ ବିକାନେର ଅଂଚଳରେ ପ୍ରବଳ ବେଗରେ ଧୂଳି ଝଡ ସହ ବର୍ଷା ହୋଇଛି । ପାକିସ୍ତାନ ପଟୁ ଧୂଳିଝଡ ରାଜସ୍ଥାନର ବିକାନେର ସୀମାକୁ ପ୍ରବେଶ କରିବା ପରେ ଚାରିଆଡେ ଅନ୍ଧାର ଦେଖା ଯାଇଥିଲା । ବାରମେର, ଯୋଧପୁର, ଜୈସଲମେର, ନାଗୋର ଏବଂ ଧୋଲପୁରରେ ଝଡର ପ୍ରଭାବ ଦେଖିବାକୁ ମିଳିଛି । ରାଜସ୍ଥାନର ହନୁମାନଗଡ ଓ ଚୁରୁ ଅଂଚଳରେ ଝଡତୋଫାନ ନେଇ ସତର୍କ ସୂଚନା ଜାରି କରା ଯାଇଛି । ପୂରା ରାଜ୍ୟରେ ୪୮ ଘଂଟିଆ ଆଲର୍ଟ ଜାରି ହୋଇଛି ।
ଆଜି ଅପରାହ୍ନ ୩ଟାରୁ ସନ୍ଧ୍ୟା ୭ଟା ମଧ୍ୟରେ ଦିଲ୍ଲୀରେ ୫୦ କିଲୋମିଟର ବେଗରେ ପବନ ବହିବା ସହ ଧୂଳିଝଡ ହେବ । ସାଢେ ୫ଟା ସୁଦ୍ଧା ଝଡର ବେଗ ଅତିପ୍ରବଳ ରହିପାରେ ବୋଲି ବୋଲି ପାଣିପାଗ ବିଭାଗ କହିଛି । ଝଡ ତୋଫାନ ନେଇ ଦିଲ୍ଲୀ ସଚିବାଳୟରେ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛି । ଜରୁରୀକାଳୀନ ସହାୟତା ପାଇଁ ଦିଲ୍ଲୀ ଡିଜାଷ୍ଟର ମ୍ୟାନେଜମେଂଟ ଅଥରିଟି ପକ୍ଷରୁ ଟୋଲ ଫ୍ରି ନମ୍ବର ଜାରି କରାଯାଇଛି । ସେହିପରି ହରିୟାଣାରେ ମଧ୍ୟ ଝଡ ତୋଫାନ ଆଶଙ୍କାକୁ ଦୃଷ୍ଟିରେ ରଖି ସମସ୍ତ ସରକାରୀ ଓ ବେସରକାରୀ ସ୍କୁଲକୁ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି । କେନ୍ଦ୍ରୀୟ ପାଣିପାଗ କାର୍ଯ୍ୟାଳୟର ସତର୍କ ସୂଚନା ଅନୁଯାୟୀ ୧୩ଟି ରାଜ୍ୟରେ ହେବ ଘଡଘଡି ସହ ବର୍ଷା । ଝଡବର୍ଷା ସହ କୁଆପଥର ମାଡର ଯଥେଷ୍ଟ ସମ୍ଭାବନା ରହିଛି । ଓଡିଶା, ଉତ୍ତର ପ୍ରଦେଶ, ବିହାର, ପଶ୍ଚିମବଙ୍ଗ, ସିକିମ, ଆସାମ, ମେଘାଳୟ, ନାଗାଲାଣ୍ଡ, ମଣିପୁର, ମିଜୋରାମ, ତ୍ରିପୁରା, କର୍ଣ୍ଣାଟକ ଓ କେରଳରେ ପ୍ରବଳ ବର୍ଷା ସମ୍ଭାବନା ରହିଥିବା ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ ।