ମୋଦିଙ୍କ ଶକ୍ତି ପରୀକ୍ଷା : ବିରୋଧୀଙ୍କ ଅନାସ୍ତା ପ୍ରସ୍ତାବକୁ ଗ୍ରହଣ କଲେ ବାଚସ୍ପତି, ସଂଖ୍ୟାଖେଳରେ ସହଜ ସ୍ଥିତିରେ ବିଜେପି
କନକ ବ୍ୟୁରୋ : ଶୁକ୍ରବାର ସଂସଦରେ ବଡ ପରୀକ୍ଷା ଦେବାକୁ ଯାଉଛନ୍ତି ମୋଦି ସରକାର । କାରଣ ଏନଡିଏ ସରକାର ବିରୋଧରେ ଆସିଥିବା ଅନାସ୍ଥା ପ୍ରସ୍ତାବକୁ ଗ୍ରହଣ କରିନେଇଛନ୍ତି ବାଚସ୍ପତି ସୁମିତ୍ରା ମହାଜନ୍ । ଆଉ ଶୁକ୍ରବାର ଏନେଇ ଗୃହରେ ଆଲୋଚନା ଓ ଭୋଟିଂ କରିବାକୁ ସ୍ଥିର କରିଥିବା ଜାତୀୟ ଗଣମାଧ୍ୟମ ଗୁଡିକରେ ଚର୍ଚ୍ଚା ହୋଇଛି । ତେବେ ସଂଖ୍ୟା ଦୃଷ୍ଟିରୁ ବେଶ ସହଜ ସ୍ଥିତିରେ ଥିବା ବିଜେପି ପାଇଁ ଏହି ଆସ୍ଥାଭୋଟ ଜିତିବା କଷ୍ଟକର ହେବନାହିଁ । କିନ୍ତୁ ନିର୍ବାଚନୀ ବର୍ଷରେ ମେଂଟ ସହଯୋଗୀଙ୍କ ବିଶ୍ୱାସର ପରୀକ୍ଷା ହେବାକୁ ଯାଉଛି ଏହି ଅନାସ୍ଥା ଭୋଟ୍ । ଆଉ ବିଜେପି ଓ ବିରୋଧୀ ମେଂଟରୁ ଦୂରେଇ ରହୁଥିବା ବିଜେଡିର ଆଭିମୁଖ୍ୟ ମଧ୍ୟ ଜଣାପଡିବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଲୋକସଭା ବାଚସ୍ପତି ସୁମିତ୍ରା ମହାଜନଙ୍କ ଏହି ଘୋଷଣା ସହ ଗୃହିତ ହୋଇଥିଲା ମୋଦି ସରକାରଙ୍କ ବିରୋଧରେ ଆସିଥିବା ଅନାସ୍ଥା ପ୍ରସ୍ତାବ । ସଂସଦର ବଜେଟ ଅଧିବେସନ ବେଳେ ଯେଉଁ ଅନାସ୍ଥା ପ୍ରସ୍ତାବକୁ ନେଇ ପ୍ରବଳ ହଙ୍ଗାମା ହୋଇଥିଲା ତାକୁ ମୌସୁମୀ ଅଧିବେସନ ଆରମ୍ଭରୁ ଗ୍ରହଣ କରିନେଇଛନ୍ତି ସୁମିତ୍ରା ମହାଜନ୍ । କଂଗ୍ରେସ ଓ ଟିଡିପି ସମେତ ଅନ୍ୟ କେତେକ ବିରୋଧୀଦଳ ଏନେଇ ପ୍ରସ୍ତାବ ଆଣିଥିବାବେଳେ ଟିଡିପି ସାଂସଦ କେସିନେନି ଶ୍ରୀନିବାସଙ୍କ ପ୍ରସ୍ତାବକୁ ଗ୍ରହଣ କରିଥିଲେ ବାଚସ୍ପତି । ଯାହା ଲଟେରି ଜରିଆରେ ଚୟନ କରାଯାଇଥିଲା । ତେବେ ବିରୋଧୀ ଦଳଗୁଡିକର ଗୋଟିଗୋଟି କରି ନାଁ ପଢିଥିଲେ ବାଚସ୍ପତି ସୁମିତ୍ରା ମହାଜନ୍ ।
ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବି କରି ଗତ ମାର୍ଚ୍ଚ ମାସରେ ଏନଡିଏରୁ ଓହରି ଯାଇଥିଲା ଚନ୍ଦ୍ରବାବୁ ନାଇଡୁଙ୍କ ଟିଡିପି । ଆଉ ଆଜି ମୌସୁମୀ ଅଧିବେସନ ଆରମ୍ଭରୁ ହିଁ ଶୂନ୍ୟକାଳରେ ଅନାସ୍ଥା ପ୍ରସ୍ତାବ ଆଗତ କରିଥିଲା ଦଳ । ବାଚସ୍ପତି ଅନାସ୍ଥା ପ୍ରସ୍ତାବକୁ ଗ୍ରହଣ କରିବା କ୍ଷଣି ସଂସଦୀୟ ବ୍ୟାପାରମନ୍ତ୍ରୀ ଗୃହରେ ଦାବି କରିଥିଲେ ଯେ, ଏହି ଅନାସ୍ଥା ପରୀକ୍ଷାକୁ ମୋଦି ସରକାର ଅତି ସହଜରେ ପାର କରିଯିବେ । କାରଣ ସଂସଦରେ ବିଜେପି ଓ ଏହାର ସହଯୋଗୀ ଦଳଙ୍କର ଦୁଇ ତୃତୀୟାଂଶ ସଦସ୍ୟ ଅଛନ୍ତି । ଶୁକ୍ରବାର ପ୍ରଶ୍ନକାଳକୁ ବାତିଲ କରି ଦିନ ତମାମ ଆସ୍ଥା ଭୋଟ ଉପରେ ଚର୍ଚ୍ଚା ହେବ ଏବଂ ଭୋଟିଂ ମଧ୍ୟ କରାଇ ପାରନ୍ତି ବାଚସ୍ପତି ସୁମିତ୍ରା ମହାଜନ୍ । ଏବେ ଆସନ୍ତୁ ଜାଣିବା ସଂଖ୍ୟା ଗଣିତ ଉପରେ ।
ଲୋକସଭା
ମୋଟ୍ ସଦସ୍ୟ ସଂଖ୍ୟା- ୫୪୫
ଆସ୍ଥାଭୋଟ୍ ଜିତିବାକୁ ଦରକାର- ୨୭୨
ବିଜେପି- ୨୭୨
ଅନ୍ୟ ସହଯୋଗୀ ଦଳ- ୩୯
କଂଗ୍ରେସ- ୪୮
ଏଆଇଏଡିଏମକେ- ୩୭
ଟିଏମସି- ୩୪
ବିଜେଡି- ୨୦
ଅନ୍ୟାନ୍ୟ- ୮୯
ମନୋନୀତ ସଦସ୍ୟ- ୨
ଖାଲି ପଡିଛି- ୪
ଅର୍ଥାତ ଆସ୍ଥା ଭୋଟରେ ଜିତିବା ପାଇଁ କେବଳ ବିଜେପି ନିକଟରେ ଥିବା ସଂଖ୍ୟା ହିଁ ଯଥେଷ୍ଟ । ହେଲେ ଏ ପରୀକ୍ଷା ଦଳ ଭିତରେ ଅସନ୍ତୁଷ୍ଟ ଓ ମେଂଟ ସହଯୋଗୀଙ୍କ ବିଶ୍ୱାସର ପରୀକ୍ଷା ହେବାକୁ ଯାଉଛି ।
ମୋଦି ସରକାରଙ୍କ ଏକଚାଟିଆ ନୀତିରେ ମେଂଟ ସହଯୋଗୀ ଖୁସି ନଥିବା ଚର୍ଚ୍ଚା ହେଉଛି । ଆଉ ଏପଟେ ଉଭୟ ବିଜେପି ଓ ବିରୋଧୀ ମେଂଟରୁ ଦୂରତା ରଖିଆସୁଥିବା ବିଜେଡି ଭଳି ଦଳର ଆଭିମୁଖ୍ୟ କଣ ରହୁଛି ତାହା ଜଣାପଡିଯିବ । ଏଥିପାଇଁ ଗୁରୁବାର ବିଜେଡି ସଂସଦୀୟ ଦଳ ବୈଠକ ବସୁଛି, ଯେଉଁଠି ଦଳ ତାର ଆଭିମୁଖ୍ୟ ନେଇ ନିଷ୍ପତ୍ତି କରିବ । ଗୋଟିଏ ପଟେ ବିରୋଧୀ ଏକାଠି ହେବା ପାଇଁ ବଳ ଗୋଟାଉ ଥିବାବେଳେ ନିର୍ବାଚନୀ ବର୍ଷରେ ମୋଦିଙ୍କ ପାଇଁ ଏସିଡ ଟେଷ୍ଟ ହେବାକୁ ଯାଉଛି ଆସ୍ଥା ଭୋଟର ପରୀକ୍ଷା । ଯେଉଁଥିପାଇଁ ଶୁକ୍ରବାର ସମସ୍ତ ସଦସ୍ୟ ଉପସ୍ଥିତ ରହିବାକୁ ଦଳ ପକ୍ଷରୁ ହ୍ୱିପ ଜାରି କରିଦିଆଯାଇଛି ।