କାଲିଠାରୁ ଓଡିଶାର ୧୦ଟି ଜିଲ୍ଲାରେ ନାଇଟ୍ କର୍ଫ୍ୟୁ । ଆଜିଠୁ ଜୋରଦାର ହେଲା ଚେକିଂ । ସେପଟେ ଦୈନିକ ସଂକ୍ରମଣ ୪୭୧କୁ ବୃଦ୍ଧି
କନକ ବ୍ୟୁରୋ: ନାଇଟ କର୍ଫ୍ୟୁ ଲାଗୁ ହେବା ପୂର୍ବରୁ ସୁନ୍ଦରଗଡର ଡେଲି ମାର୍କେଟରେ ଶହ ଶହ ଲୋକଙ୍କ ଭିଡ ଦେଖିବାକୁ ମିଳିଛି । ବଜାରରେ ଲାଗିଥିବା ଭିଡ ଭିତରେ ନା ଅଛି ସାମାଜିକ ଦୂରତା ରହିଛି ନା କେହି ମାସ୍କ ପିନ୍ଧିଛନ୍ତି । କାହାର ବି କରୋନା ସଂକ୍ରମଣକୁ ଖାତିର ନାହିଁ । କେବଳ ସୁନ୍ଦରଗଡ ନୁହେଁ, ନବରଙ୍ଗପୁରରେ ମଧ୍ୟ ସେହି ସମାନ ଅବସ୍ଥା । ହେଲେ ଏଠାରେ ଅମାନିଆଙ୍କୁ ସାବାଡ କରିବା ପାଇଁ ଜରିମାନା ଆଦାୟ କରିଛି ନବରଙ୍ଗପୁର ପୁଲିସ ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ସଂକ୍ରମଣ ବଢୁଥିବା ବେଳେ ଅନ୍ୟପଟେ ପଡ଼ୋଶୀ ଛତିଶଗଡ଼ରୁ ପଶ୍ଚିମ ଓଡିଶାକୁ ସଂକ୍ରମଣ ଆଶଙ୍କାକୁ ଦୃଷ୍ଟିରେ ରଖି ଆସନ୍ତାକାଲିଠାରୁ ୧୦ଟି ଜିଲ୍ଲାରେ ନାଇଟ୍ କର୍ଫ୍ୟୁ ଲାଗୁ ହେଉଛି । ଏହି ୧୦ଟି ଜିଲ୍ଲା ମଧ୍ୟରେ ରହିଛି ସୁନ୍ଦରଗଡ, ଝାରସୁଗୁଡା, ସଂବଲପୁର, ବରଗଡ, ବଲାଙ୍ଗିର, ନୂଆପଡା, କଳାହାଣ୍ଡି, ନବରଙ୍ଗପୁର, କୋରାପୁଟ ଏବଂ ମାଲକାନଗିରି । ପ୍ରାୟ ସମସ୍ତ ଜିଲ୍ଲା ଛତିଶଗଡ଼ ସୀମାକୁ ଲାଗିଛି।
ନାଇଟ କର୍ଫ୍ୟୁ କଟକଣା
- ରାତି ୧୦ରୁ ସକାଳ ୫ଟା ଯାଏଁ କଟକଣା ଜାରି ରହିବ
- ଜରୁରୀ ସେବାକୁ କଟକଣାରୁ ବାଦ ଦିଆଯାଇଛି
- ବ୍ୟକ୍ତିଗତ ଯାତାୟତ ଉପରେ କଟକଣା
- ସାଧାରଣ ପରିବହନକୁ ଅନୁମତି
- ବିଜୁଳି , ଅଗ୍ନିଶମ ସେବା, ଟେଲିକମ୍ , ଜଳ ଯୋଗାଣ ଓ ରେଳବାଇ, ବିମାନ ସେବା ଯୋଗାଉଥିବା କର୍ମଚାରୀ ଯାତାୟତ କରିପାରିବେ
- ସମସ୍ତ ଶିଳ୍ପ ସଂସ୍ଥା, ଔଷଧ ଦୋକାନ ଖୋଲା ରହିବ, ନିର୍ମାଣ କାର୍ଯ୍ୟ ଜାରି ରହିବ
- ଗ୍ରୋସରୀ, ପନିପରିବା, ଅଣ୍ଡା, ମାଛ, ମାଂସ, ରେଷ୍ଟୁରାଂଟରୁ ଖାଦ୍ୟ ମଗାଇ ପାରିବେ
ଏହାରି ଭିତରେ ଦେଶରେ ଦୈନିକ ସଂକ୍ରମଣ ସଂଖ୍ୟା ନୂଆ ରେକର୍ଡ଼ କରୁଛି । ୫ ମାସ ପରେ ୨୪ ଘଂଟାରେ ୯୩ ହଜାର ୨୪୯ ଆକ୍ରାନ୍ତ ଚିହ୍ନଟ ହୋଇଛନ୍ତି । ୫୧୩ଜଣଙ୍କ ମୃତ୍ୟୁ ହୋଇଛି । ରାଜ୍ୟରେ ଗତ ୨୪ ଘଂଟା ଭିତରେ ୪୭୧ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆଜିର ଆକ୍ରାନ୍ତଙ୍କ ମଧ୍ୟରେ ସୁନ୍ଦରଗଡ଼ ଜିଲ୍ଲାରୁ ସର୍ବାଧିକ ୮୫ଜଣ, କଳାହାଣ୍ଡି ୫୦, ଖୋର୍ଦ୍ଧାରୁ ୪୦, ନୂଆପଡ଼ାରୁ ୪୨ ଆକ୍ରାନ୍ତ ଚିହ୍ନଟ ହୋଇଛନ୍ତି ।