ବଲାଙ୍ଗିରରେ ଧାନ କିଣାରେ ଅବ୍ୟବସ୍ଥା । ମିଲର୍ସ ମନମାନି ପାଇଁ ଚିନ୍ତାରେ ଚାଷୀ ।

କନକ ବ୍ୟୁରୋ: ସରକାର ଚାଷୀଙ୍କ ସମସ୍ୟାର ସମାଧାନ ପାଇଁ ଅନେକ ପଦକ୍ଷେପ ନେଉଛନ୍ତି ।  ହେଲେ ହେଉନି ଚାଷୀଙ୍କ ସମସ୍ୟାର ସମାଧାନ । କେଉଁଠି ମିଲର୍ସ ଧାନ ଉଠାଉ ନାହଁନ୍ତି ତ ପୁଣି କେଉଁଠି ଖୋଲୁନି ମଣ୍ଡି । କଟ୍‌ନିଛଟ୍‌ନି ପାଇଁ ସବୁଠି କେଁ ।  ୪ଟି ମିଲ୍‌କୁ କାରଣ ଦର୍ଶାଅ ନୋଟିସ ଜାରି କରିଛି ଜିଲ୍ଲାଯୋଗାଣ ବିଭାଗ । ଚଳିତବର୍ଷ ବଲାଙ୍ଗିର ଜିଲ୍ଲାରେ ୧୫୮ ଟି ପେକ୍ସ ସହ ୧୭ ଟି ଏସଏଚଜିରେ ଧାନକିଣା ପ୍ରକ୍ରିୟା ଆରମ୍ଭ ହୋଇଛି । ହେଲେ ଏବେ ବି ଗୁଡାଏ ଅଵ୍ୟଵସ୍ଥା ଲାଗି ରହିଛି । ପ୍ରଶାସନିକ ଅବହେଳା ହଉ କି ମିଲର୍ସ ଓ ପେକ୍ସ ଗୁଡିକର ମନମାନି ପାଇଁ ଏବେ ଚିନ୍ତାରେ ପଡ଼ିଛନ୍ତି ଚାଷୀ ।  ଅନ୍ୟପଟେ ଚାଷୀ ସେମାନଙ୍କ ସମସ୍ୟା ପାଇଁ ପ୍ରତିବାଦ କରିବାକୁ ବାଧ୍ୟ ହେଉଛନ୍ତି । 

ଏହାରି ଭିତରେ ମଣ୍ଡିରୁ ଧାନ ନଉଠାଇବାରୁ ୪ଟି ମିଲକୁଙ୍କୁ କାରଣ ଦର୍ଶାଅ ନୋଟିସ କରାଯାଇଛି । ମିଲଗୁଡିକ ହେଲା ପାହାଡ଼ି ମାତା, ଶ୍ରୀ ଶ୍ୟାମ ଜି, ରାଧାଗୋବିନ୍ଦ ଓ ଭଗବତୀ । ମିଲର୍ସ ଧାନ ନଉଠାଇବାରୁ ଜିଲ୍ଲାପାଳଙ୍କ ନିର୍ଦ୍ଦେଶରେ ନୋଟିସ କରାଯାଇଛି । ଏନେଇ ସୁଚନା ଦେଇଛନ୍ତି ବଲାଙ୍ଗିର ଜିଲ୍ଲାପାଳ ଗୌରବ ଶିବାଜୀ । ଧାନ ବୁଣିବା ଠାରୁ ଅମଳ ପର୍ୟ୍ୟନ୍ତ କେତେବେଳେ ରୋଗପୋକ ତ ପୁଣି କେତେବେଳେ ଅଦିନିଆ ବର୍ଷା ଚାଷୀଙ୍କ ଫସଲ ଉଜାଡ଼ି ଦେଉଛି । ଏବେ ମଣ୍ଡିରେ ଧାନ ବିକ୍ରି ନହେବାରୁ ଚାଷୀ ଚିନ୍ତାରେ ପଡ଼ିଛନ୍ତି ।