ଡ୍ରେନେଜ ସମସ୍ୟାରେ ଯୁଝି ହେଉଛି ଖୋର୍ଦ୍ଧା ସହର, ଅଳିଆ ଆବାର୍ଜନାରେ ପୋତି ହୋଇଗଲାଣି ଡ୍ରେନ୍

କନକ ବ୍ୟୁରୋ : କଥାରେ ଅଛି ଗୋଦରା କୋଡ଼େ ଯେତେ ମାଡ଼େ ସେତେ। ଖୋର୍ଦ୍ଧା ସହରର ଅବସ୍ଥା ଠିକ୍‌ ସେମିତି । ଆଧୁନିକୀକରଣ ଆଳରେ ସାହି ଗଳି ସବୁ ଫେବର ପଡି ଚକାଚକ୍‌ । ହେଲେ ଡ୍ରେନ୍‌ ଗୁଡ଼ିକ ସହରର ହାଲକୁ ବେହାଲ କରୁଛି । କେଉଁଠି ଅଳିଆ ଆବର୍ଜନା ଭର୍ତ୍ତି ତ କେଉଁଠି ମୁକୁଳା ପଡିଛି । ବର୍ଷବର୍ଷ ଧରି ଏହାର ପ୍ରତିକାର ଦିଗରେ ପୌର ପ୍ରଶାସନ କୌଣସି ଗୁରୁତ୍ବ ଦେଉନଥିବା ଅଭିଯୋଗ ହୋଇଛି । ବର୍ଷା ଦିନ ପାଣି କେଉଁଆଡ଼େ ନିଷ୍କାସନ ହେବ ତାକୁ ନେଇ ଏବେଠୁ ପ୍ରମାଦ ଗଣିଲେଣି ସହରବାସୀ । 

ସହରର ଶ୍ରୀରାମ ନଗର, ମାଢୁଆଳିପଟି, ଗୁରୁଜଙ୍ଗ, ବରୁଣେଇ ସାହି, ରାଧାବଲ୍ଲଭ ସାହି, ଉପରସାହି, ଖ୍ରୀଷ୍ଟିଆନ ସାହି, ପୂର୍ତ୍ତ ବଙ୍ଗଳା ନିକଟ, ବାସେଳୀ ସାହି, ଡକ୍ଟର ସଲେନ, ବକ୍ସି ଲେନ୍‌, ସାମନ୍ତରାପୁର, ଠେଙ୍ଗାହାଟ, ମୁକୁନ୍ଦପ୍ରସାଦ ଆଦି ଅଞ୍ଚଳରେ ଡ୍ରେନ୍‌ ପ୍ରାୟ ପୋତି ହୋଇଗଲାଣି । କେତେକ ସ୍ଥାନରେ ଅପରିଷ୍କାର ପାଣି ଜମି ରହିଛି ।

ପ୍ରତିବର୍ଷ ବିଭିନ୍ନ ବାବଦକୁ ପୌର ପ୍ରଶାସନ କୋଟିକୋଟି ଟଙ୍କା ଟିକସ ଆଦାୟ କରୁଛି । କିନ୍ତୁ ଡ୍ରେନ୍‌ର ରକ୍ଷଣାବେକ୍ଷଣ ଏବଂ ମରାମତି କରୁନଥିବା ଅଭିଯୋଗ ହୋଇଛି । ସେପଟେ ପୌରାଧ୍ୟକ୍ଷା କହିଛନ୍ତି, ବର୍ଷା ପୂର୍ବରୁ କାମ ଆରମ୍ଭ ହେବ ।

ବେଳ ଥାଉଥାଉ ମୁକୁଳା ଡ୍ରେନ ପ୍ରତି ଦୃଷ୍ଟି ନଦିଆଗଲେ ଭୁବନେଶ୍ୱର ଭଳି ସ୍ଥିତି ନସୃଷ୍ଟି ହେବ ତାହା କିଏ କହିବ ।