୧୭ ବର୍ଷ ପରେ ଦୁଃଖ ପ୍ରକାଶ କଲେ ଗାଙ୍ଗୁଲି: କହିଲେ, ଏମିତି ନହୋଇଥିଲେ ମୋ ନାଁରେ ଆଜି ୫୦ରୁ ଅଧିକ ଶତକ ଥାଆନ୍ତା

କନକ ବ୍ୟୁରୋ: କିମ୍ବଦନ୍ତୀ ବାମହାତୀ ବ୍ୟାଟସମ୍ୟାନ ସୌରଭ ଗାଙ୍ଗୁଲି ତାଙ୍କ କ୍ୟାରିୟରରେ ଅନେକ ଶତକରୁ ଅଳ୍ପକେ ବର୍ତ୍ତିବା ପାଇଁ ଦୁଃଖ ପ୍ରକାଶ କରିଛନ୍ତି । ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲି ଅନ୍ତର୍ଜାତୀୟ କ୍ରିକେଟରେ 38ଟି ଶତକ ହାସଲ କରିଛନ୍ତି । କିନ୍ତୁ ତାଙ୍କୁ ଏହି ସଂଖ୍ୟା ପସନ୍ଦ ନୁହେଁ । ଗାଙ୍ଗୁଲି ୩୧୧ଟି ଦିନିକିଆ ଏବଂ ୧୧୩ଟି ଟେଷ୍ଟ ମ୍ୟାଚ୍ ଖେଳିଛନ୍ତି । ସେ ତାଙ୍କ ଅନ୍ତର୍ଜାତୀୟ କ୍ୟାରିୟରରେ ମୋଟ ୧୮୫୭୫ ରନ କରିଛନ୍ତି । ଗାଙ୍ଗୁଲିଙ୍କୁ ଯେତେବେଳେ ପଚରାଗଲା ଯେ ସେ ପୁରୁଣା ଗାଙ୍ଗୁଲିଙ୍କୁ କ'ଣ ପରାମର୍ଶ ଦେବାକୁ ଚାହାଁନ୍ତି, ସେତେବେଳେ ଗାଙ୍ଗୁଲି ଦୁଃଖ ପ୍ରକାଶ କରିଥିଲେ ।

ଗାଙ୍ଗୁଲି ପିଟିଆଇକୁ ଦେଇଥିବା ଏକ ସାକ୍ଷାତକାରରେ କହିଥିଲେ, 'ମୁଁ ଅନେକ ଥର ଶତକ ମାରିବାରୁ ବଞ୍ଚିତ ହୋଇଥିଲି, ମୋତେ ଅଧିକ ରନ୍ କରିବା ଦରକାର ଥିଲା । ମୁଁ ଅନେକ ଥର ୯୦ ଏବଂ ୮୦ ରନ୍ କରିଥିଲି ।' ଯଦି ଆମେ ଗାଙ୍ଗୁଲିଙ୍କ ପରିସଂଖ୍ୟାନ ଉପରେ ନଜର ପକାଇବା, ତେବେ ଜଣାପଡ଼େ ଯେ ସେ ୩୦ ଥର ୮୦  ସ୍କୋର ଅତିକ୍ରମ କରିଥିଲେ ଏବଂ ଶତକ ପୂରଣ କରିବା ପୂର୍ବରୁ ଆଉଟ୍ ହୋଇଯାଇଥିଲେ । ଯଦି ସେ ଏହି ଇନିଂସଗୁଡ଼ିକୁ ଶତକରେ ପରିଣତ କରିବାରେ ସଫଳ ହୋଇଥାନ୍ତେ, ତେବେ ତାଙ୍କ ନାମରେ 50ରୁ ଅଧିକ ଶତକ ପଞ୍ଜିକୃତ ହୋଇଥାନ୍ତା । ଆପଣଙ୍କୁ କହି ରଖୁଛୁ ଯେ ଗାଙ୍ଗୁଲି ୨୦୦୮ରେ ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ । ଏହାପରେ ସେ ତାଙ୍କର ଅବସର ଘୋଷଣା କରିଥିଲେ ।

ଯେତେବେଳେ ଗାଙ୍ଗୁଲି ଏକା ଥାଆନ୍ତି, ସେ ତାଙ୍କର ପୁରୁଣା ଇନିଂସ ଦେଖିବାକୁ ପସନ୍ଦ କରନ୍ତି । ଏହା ତାଙ୍କୁ ମନେ ପକାଇ ଦିଏ ଯେ ସେ ଅଧିକ ଶତକ ହାସଲ କରିବାକୁ କେତେ ନିକଟତର ଥିଲେ । ସେ କହିଥିଲେ, 'ମୁଁ ଯେତେବେଳେ ଏକା ଥାଏ, ମୁଁ ମୋର ବ୍ୟାଟିଂ ଭିଡିଓ ଦେଖେ ।' 

ଗାଙ୍ଗୁଲି କହିଥିଲେ ଯେ ଯେତେବେଳେ ମୋ ସ୍ତ୍ରୀ ଘରେ ନଥାନ୍ତି ମୁଁ  ୟୁଟ୍ୟୁବ ଦେଖେ ଏବଂ ନିଜକୁ କୁହେ 'ଓଃ, ମୁଁ ପୁଣି ୭୦ ରନରେ ଆଉଟ ହୋଇଗଲି । ମୋର ଶତକ ମାରିବା ଉଚିତ ଥିଲା । କିନ୍ତୁ ଏବେ ତୁମେ ଏହାକୁ ବଦଳାଇ ପାରିବ ନାହିଁ ।' ଗାଙ୍ଗୁଲି ଦିନିକିଆରେ ୭୨ ଏବଂ ଟେଷ୍ଟ କ୍ରିକେଟରେ ୩୫ ଅର୍ଦ୍ଧଶତକ ହାସଲ କରିଛନ୍ତି ।