ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଲେ ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲଙ୍କ ପୁଅ ପ୍ରୟାସକାନ୍ତି, ବିଜେପିରେ ଯୋଗ ଦେବା ନେଇ ବଢିଲା ଚର୍ଚ୍ଚା

କନକ ବ୍ୟୁରୋ :   ବିଜେଡ଼ି ସରକାରରୁ ଯିବା ପରେ ଦଳକୁ ଗୋଟିଏ ପରେ ଗୋଟିଏ ଝଟକା ଲାଗୁଛି । ଜଣଙ୍କ ପରେ ଜଣେ ନେତା ଦଳ ଛାଡୁଛନ୍ତି । ଏହି କ୍ରମରେ ଆଜି ଭଣ୍ଡାରୀ ପୋଖରୀ ନିର୍ବାଚନ ମଣ୍ଡଳୀ ତଥା ଭଦ୍ରକ ଜିଲ୍ଲାର ବିଜେଡିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲଙ୍କ  ପୁଅ ପ୍ରୟାସକାନ୍ତି ବିଜେଡିର  ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ହେଲେ ବାପା ପ୍ରଫୁଲ୍ଲ ସାମଲ ବିଜେଡିରେ ରହିଛନ୍ତି । ଦିନେ ବିଜେଡିରେ ଖୁବ୍ ଶକ୍ତିଶାଳୀ ଥିଲେ ପ୍ରଫୁଲ୍ଲ ସାମଲ । ବିଭିନ୍ନ ବିଭାଗର ମନ୍ତ୍ରୀ ପଦ ସମ୍ଭାଳିଛନ୍ତି । ତେବେ ପୁଅ ପ୍ରୟାସକାନ୍ତି କାହିଁକି ବିଜେଡି ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଲେ, ଜଣାପଡିନାହିଁ । ସେପଟେ ଭଦ୍ରକରେ ଦିନକୁ ଦିନ ବିଜେପି ଶକ୍ତିଶାଳୀ ହେଉଛି । ଭଦ୍ରକ ଲୋକସଭା  ଓ ଭଦ୍ରକ ବିଧାନସଭା ଆସନ ବିଜେପି ହାତରେ ରହିଛି । ଏହାସହ ବିଜେପି ରାଜ୍ୟ ସଭାପତି ମନମୋହନ ସାମଲ, ଉଚ୍ଚଶିକ୍ଷାମନ୍ତ୍ରୀ ଖୋଦ୍ ଭଦ୍ରକ ଜିଲ୍ଲାରୁ । ଏହାସହ ଗତ ସାଧାରଣ ନିର୍ବାଚନରେ ପ୍ରଫୁଲ୍ଲ ସାମଲ ଭଣ୍ଡାରୀପୋଖରୀ ଆସନ ଛାଡି ଭଦ୍ରକରୁ ବିଧାୟକ ପ୍ରାର୍ଥୀ ହୋଇଥିଲେ ବି ଜଣେ ନବାଗତା ବିଜେପିର ଯୁବନେତାଙ୍କ ଠାରୁ ପରାଜିତ ହୋଇଥିଲେ ।