ଗଡିଆଜୋର ନୂଆମୁଣ୍ଡା ଦନ୍ତା ମୃତ୍ୟୁ ଘଟଣା । ୨ ଶିକାରୀଙ୍କୁ ଗିରଫ କଲା ବନବିଭାଗ

କନକ ବ୍ୟୁରୋ : ପାଟଣାଗଡ଼ ଗଡିଆଜୋର ଦନ୍ତା ମୃତ୍ୟୁ ଘଟଣା । ଦୁଇ ଶିକାରୀଙ୍କୁ ଘରୁ ଉଠାଇନେଲା ବନ ବିଭାଗ । ଦନ୍ତା ମୃତ୍ୟୁ ଘଟଣାରେ ୭ ଜଣଙ୍କ ସମ୍ପୃକ୍ତି ଥିବା ଅଭିଯୋଗ । ପାଟଣାଗଡ଼ ରେଞ୍ଜ ଲରମ୍ଭା ସେକ୍ସନ ଗଡିଆଜୋର ନୂଆମୁଣ୍ଡା ଠାରେ ଦନ୍ତା ମୃତ୍ୟୁ ଘଟଣାରେ ବନ ବିଭାଗ ମଙ୍ଗଳବାର ବିଳମ୍ବିତ ରାତ୍ରିରେ ଗଡିଆଜୋର ଓ ସୁଲିଆମାଳ ଗ୍ରାମର ଦୁଇ ଜଣ ଶିକାରୀଙ୍କୁ ଉଠାଇନେଇଥିବା ଜଣାପଡିଛି । ଘଟଣାରେ ଅଂଚଳର ୭ ଜଣ ବାରହା ଶିକାରୀ ସାମିଲ ଥିବା କୁହାଯାଉଛି । ଏମାନେ ବାରହା ଶିକାର ପାଇଁ ବିଛାଇଥିଲେ ବିଦ୍ୟୁତ ତାର । ଯାହା ସଂସ୍ପର୍ଶରେ ଆସି ମୃତ୍ୟୁ ବରଣ କରିଥିଲା ଦନ୍ତା ହାତୀ । ସେଦିନ ରାତିରେ ବିଦ୍ୟୁତ ଫାସରେ ଲାଗିଥିବା ବାରହାକୁ ଶିକାରୀ ନେଇଯାଇଥିଲେ । 

ଦନ୍ତା ମୃତ୍ୟୁକୁ ଦେଖି ପ୍ରଥମେ ହାତୀର ଦାନ୍ତ କାଟିବାକୁ ଚେଷ୍ଟା କରିଥିଲେ । ପରେ କେହି ଲୋକ ଜାଣିଯିବେ ଭାବି ସେଠାରୁ ବିଦ୍ୟୁତ ତାର ସହ ତଳେ ଥିବା ଖୁଣ୍ଟି ଗୁଡିକୁ ନେଇ ଫେରାର ହୋଇଯାଇଥିଲେ । ଘଟଣାର ତଦନ୍ତ କରି ୨ଜଣଙ୍କୁ ଗିରଫ କରି ଅଧିକ ଜେରା କରୁଛି ବନ ବିଭାଗ ।