ଟି-୨୦ ବିଶ୍ୱକପ : ଟିମ ଇଣ୍ଡିଆର ନୈରାଶ୍ୟଜନକ ପ୍ରଦର୍ଶନ; ଲଗାତାର ଦ୍ୱିତୀୟ ଥର ପାଇଁ ହାରିଲା ଭାରତ
ନ୍ୟୁଜିଲାଣ୍ଡଠାରୁ ୮ ୱିକେଟ୍ରେ ହାରିବା ପରେ ସେମିଫାଇନାଲ ରେସରେ ପଛରେ ପଡିଲା ବିରାଟ ବାହିନୀ
କନକ ବ୍ୟୁରୋ : ଟି-୨୦ ବିଶ୍ୱକପରେ ଟିମ ଇଣ୍ଡିଆର ଶୋଚନୀୟ ପରାଜୟ । ଉଭୟ ବୋଲିଂ ଓ ବ୍ୟାଟିଂରେ ଫେଲ ମାରିଲା ବିରାଟ ବାହିନୀ । ଲଗାତର ଦୁଇଟି ଶୋଚନୀୟ ପରାଜୟ ବରଣ କରିବା ପରେ ଭାରତର ଟ୍ବେଣ୍ଟି-୨୦ ବିଶ୍ବକପ୍ ଅଭିଯାନ ବାଟହୁଡ଼ିଛି । ଭାରତର ଏହି ଆଶ୍ଚର୍ଯ୍ୟଜନକ, ଅପ୍ରତ୍ୟାଶିତ, ଅତ୍ୟନ୍ତ ଦୁର୍ବଳ ଓ ଦୟନୀୟ ପ୍ରଦର୍ଶନକୁ କେହି ଯେମିତି ବିଶ୍ବାସ କରି ପାରୁନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଶେଷ କରି ପାକିସ୍ତାନ ପରେ ନ୍ୟୁଜିଲାଣ୍ଡ ମଧ୍ୟ କୋହଲି ବାହିନୀକୁ ଅନାୟାସରେ ଧୂଳି ଚଟାଇବା ସବୁ ଭାରତବାସୀଙ୍କୁ ସ୍ତବ୍ଧ କରିଦେଇଛି । ରବିବାରର ବୃହତ୍ ପରାଜୟ ପରେ ଭାରତ ଏକପ୍ରକାର ସେମିଫାଇନାଲ୍ ଦୌଡ଼ରୁ ବାଦ ପଡ଼ିଛି । ବରଂ ୨୦୦୭ ଏକଦିବସୀୟ ବିଶ୍ବକପ୍ର ପ୍ରଥମ ରାଉଣ୍ଡରୁ ବିଦାୟ ନେବା ଭଳି ଚଳିତ ଟି-୨୦ ବିଶ୍ବକପ୍ରେ ମଧ୍ୟ ପ୍ରଥମ ରାଉଣ୍ଡରୁ ବାଦ୍ ପଡ଼ିବାର ଆଶଙ୍କା ସୃଷ୍ଟି ହୋଇଛି । ଅନ୍ୟପକ୍ଷରେ ୩୩ ବଲ୍ ପୂର୍ବରୁ ୮ ୱିକେଟ୍ ବିଜୟ ହାସଲ କରି ନ୍ୟୁଜିଲାଣ୍ଡ ତା’ର ସେମିଫାଇନାଲ୍ ପ୍ରବେଶ ଆଶାକୁ ଆହୁରି ଦୃଢ଼ କରିଛି ।
କୋହଲି ବାହିନୀ ସର୍ବଶ୍ରେଷ୍ଠ ଦାବିଦାରର ଉପାଧୀ ଏବଂ ପୁଣି ଥରେ ବିଜେତା ହେବାର ରଣହୁଙ୍କାର ସହ ବିଶ୍ବକପ୍କୁ ଯାଇଥିଲା । ଦୁବାଇରେ ଢେର ସମୟ ଧରି ଆଇପିଏଲ୍ ଖେଳୁଥିବାରୁ ସେଠାକାର ପାଗ ଓ ପରିବେଶକୁ ଭଲ ଭାବରେ ବୁଝି ଯାଇଥିବାର ବାହାସ୍ଫୋଟ ବି କିଛି ଖେଳାଳି ମାରୁଥିଲେ । ହେଲେ ପ୍ରଥମ ଦୁଇଟି ମ୍ୟାଚ୍ ପରେ ହିଁ ଟିମ୍ ଇଣ୍ଡିଆର ଏହି ଦମ୍ଭ ଅକାଳରେ ତୁଟି ଯାଇଛି । ପୁଣି ଥରେ ବ୍ୟାଟିଂ ଓ ବୋଲିଂରେ ପୂରା ବିଫଳ ହୋଇ ରବିବାର ଆଉ ଏକ ଲଜ୍ଜାଜନକ ପରାଜୟ ବରଣ କରିଛି ତାରକା ଖଚିତ ଭାରତୀୟ କ୍ରିକେଟ୍ ଦଳ । ରବିବାର ନ୍ୟୁଜିଲାଣ୍ଡ ବିପକ୍ଷ ଏହି ଅତ୍ୟନ୍ତ ମହତ୍ବପୂର୍ଣ୍ଣ ମୁକାବିଲାରେ ସଂପୂର୍ଣ୍ଣ ଆତ୍ମସମର୍ପଣ କରି ଲଗାତାର ଦ୍ବିତୀୟ ପରାଜୟ ବରଣ କରିଛି ।
କୋଟି କୋଟି ପ୍ରଶଂସକ ଭାରତର ଏଭଳି ଦୁର୍ବଳ ପ୍ରଦର୍ଶନରେ ମର୍ମାହତ ଓ ନିରାଶ । ଭାରତ ବିନା ଲଢ଼େଇରେ ହାରିବା ହିଁ ସେମାନଙ୍କୁ ସବୁଠୁ ବେଶି ବାଧିଛି । ଅଭିଯାନର ପ୍ରଥମ ମୁକାବିଲାରେ ଚିର ପ୍ରତିଦ୍ବନ୍ଦ୍ବୀ ପାକିସ୍ତାନଠାରୁ ୧୦ ୱିକେଟ୍ରେ ପରାଜିତ ହେବାର ଦୁଃଖକୁ ପ୍ରଶଂସକ ଭୁଲି ନଥିଲା ବେଳେ ଆଜି ନ୍ୟୁଜିଲାଣ୍ଡଠାରୁ ଏକତରଫା ଭାବେ ହାରିଛି ଭାରତ । ଫଳରେ ଆଫଗାନିସ୍ତାନ ଓ ନାମିବ୍ୟା ଭଳି ଦଳଠାରୁ ତଳେ ରହିଛି । ଅତି ସାଧାରଣ ଏବଂ କ୍ଲବ୍ ସ୍ତରୀୟ କ୍ରିକେଟ୍ଠାରୁ ବି ଖରାପ ଖେଳି ଦୁଇଟି ମ୍ୟାଚ୍ ପରେ ବି ଖାତା ଖୋଲିପାରିନି । ଏବେ ଆଫଗାନିସ୍ତାନ, ନାମିବ୍ୟା ଓ ସ୍କଟଲାଣ୍ଡ ବିପକ୍ଷ ତିନିଟି ମ୍ୟାଚ୍ ବାକି ଅଛି । ଏସବୁକୁ ଜିତିଲେ ମଧ୍ୟ ଭାରତ ସେମିଫାଇନାଲ୍ ଯିବାର ସମ୍ଭାବନା ନାହିଁ ।