କନକ ବ୍ୟୁରୋ : ପ୍ରେମ ପାଇଁ ପାକିସ୍ତାନରେ ବନ୍ଦୀଭାବେ ଜୀବନ ବିତାଇଥିବା ଯୁବକ ହମିଦ ଅନସାରି ଦୀର୍ଘ ୬ବର୍ଷ ପରେ ଭାରତ ଫେରିଛନ୍ତି । ଆଉ ଜନ୍ମମାଟିରେ ପହଁଚିବା ପରେ ପାକିସ୍ତାନରେ ବିତିଥିବା ଦୁର୍ବିସହ ଜେଲଜୀବନ ସମ୍ପର୍କରେ ସୂଚନା ଦେଇଛନ୍ତି । ପାକିସ୍ତାନ ଜେଲରେ କିଭଳି ବିତୁଥିଲା କଷ୍ଟଦାୟକ ଦିନରାତି ସୂଚନା ଦେବା ବେଳେ ହମିଦ୍ ଭାବୁକ ହୋଇପଡ଼ିଥିବା ବେଳେ ଜନ୍ମମାଟି ପହଁଚି ଖୁସି ଜାହିର କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚର୍ଚ୍ଚାରେ ହମିଦ୍ ଅନସାରୀଙ୍କ ଜେଲ୍ ଡାଏରୀ । ପାକ୍ ଜେଲରେ ଦୁର୍ବିସହ ଥିଲା ଜୀବନ । ପାକିସ୍ତାନରୁ ଫେରିଲେ ହମିଦ୍ ନିହାଲ୍ ଅନସାରୀ । ୬ ବର୍ଷ କାଳ ପାକିସ୍ତାନ ଜେଲର କାଳକୋଠରୀରେ ରହିବା ହମିଦଙ୍କ ଘରବାହୁଡ଼ା ହୋଇଛି ଆଉ ଜନ୍ମମାଟିରେ ପାଦ ରଖିବା ପରେ ସେ ବଖାଣିଛନ୍ତି ପାକିସ୍ତାନ ଜେଲରେ ବିତିଥିବା ତାଙ୍କର ଗୋଟିଏ ଗୋଟିଏ ଦିନର ଅଙ୍ଗେନିଭା ଅନୁଭୂତି । କିଭଳି ଥିଲା ଅତ୍ୟାଚାରର ସେହି କାହାଣୀ, କିଭଳି ଥିଲା ଦୁର୍ବିସହ ବନ୍ଦୀଜୀବନ ସେ ସମ୍ପର୍କରେ ସୂଚନା ଦେଇଛନ୍ତି ହମିଦ୍ ଅଂସାରୀ ।
– ଫେସବୁକରେ ପ୍ରେମ ହେବା ପରେ ପ୍ରେମିକାକୁ ଜବରଦସ୍ତି ବିବାହରୁ ବଂଚାଇବାକୁ ଆଫଗାନିସ୍ତାନ ବାଟ ଦେଇ ପାକିସ୍ତାନ ଯିବା ମହଙ୍ଗା ପଡ଼ିଲା ଓ ଧୋକା କରି ମତେ ଜେଲରେ ପୁରାଗଲା ।
– ପେଶାୱର ସେଂଟ୍ରାଲ ଜେଲରେ ଲାଗିଥିବା ଲୁହାର କବାଟ ଝରକାରେ ଟାଟା କମ୍ପାନୀର ଲୋଗୋ ଥିଲା ଯାହାକୁ ଦେଖି ଲାଗୁଥିଲା ମୁଁ ଭାରତରେ ଅଛି ଓ ଏହା ଆଶ୍ୱସ୍ଥି ଦେଉଥିଲା ।
– ବ୍ୟାଟ୍ ଜରିଆରେ ମଧ୍ୟ ଆକ୍ରମଣ କରାଯାଇପାରେ ତେଣୁ ଜେଲ ଭିତରେ କ୍ରିକେଟ୍ ଖେଳିବା ପାଇଁ ଅନୁମତି ନଥିଲା । ବାଧ୍ୟ ହୋଇ ଆମେ ଚପଲରେ କ୍ରିକେଟ୍ ଖେଳୁଥିଲୁ ।
– ସଂପୃକ୍ତ ଯୁବତୀ ଜଣକ କୋର୍ଟରେ ହମିଦ୍ ତାଙ୍କୁ ଭେଟିବାକୁ ପାକିସ୍ତାନ ଆସିଥିବା କହିବା ପରେ ବି ନକଲି ପରିଚୟପତ୍ର ଓ ଅଭିଯୋଗ ସହ ମତେ ୩ ବର୍ଷର ଜେଲଦଣ୍ଡ ଦିଆଯାଇଥିଲା ।
– ସୋସିଆଲ୍ ମିଡ଼ିଆରେ ସମ୍ପର୍କ ମହଙ୍ଗା ପଡ଼ିପାରେ, ତେଣୁ ପିତାମାତାଙ୍କୁ ମିଛ କହିବା ଉଚିତ ନୁହେଁ ଓ ସବୁବେଳେ ନିଜ ଦେଶର ସରକାର ତଥା ଆଇନ ଉପରେ ଭରସା କରିବା ଦରକାର ।
କାହାଣୀ ବାସ୍ତବ ଜୀବନର କିନ୍ତୁ ମୋଡ଼ ସିନେମାର ଦୃଶ୍ୟ ପରି । ଭାରତ ଫେରି ପରିବାରକୁ ଭେଟିବା ଆଶା ନେଇ ଆଜି ହୁଏତ ନାହାନ୍ତି ସରବଜିତ୍ ଆଉ ସଜା କାଟୁଛନ୍ତି କୂଳଭୂଷଣ ଯାଦବଙ୍କ ପରି ଏକାଧିକ ଭାରତୀୟ ବନ୍ଦୀ । କିନ୍ତୁ ସେଭଳି ଅଜଣା ଭୟ ଓ ଆଶଙ୍କା ଭିତରେ ଘରକୁ ଫେରିଛନ୍ତି ଅନସାରୀ ।