ଆଜି ନନ୍ଦନକାନନକୁ ପୁରିଲା ୬୨ ବର୍ଷ : ନାହିଁ ନାହିଁରେ ଚାଲିଛି ଚିଡ଼ିଆଖାନା; ନିର୍ମାଣ ପରେ ଖତ ଖାଉଛି ବହୁତଳ ପାର୍କିଂ
ଆସିବାଦିନରୁ ବାରମ୍ବାର ଅଟକୁଛି ଟଏ ଟ୍ରେନ୍;ଏପର୍ଯ୍ୟନ୍ତ ସରିନାହିଁ ରୋପ୍ ୱେ କାମ
କନକ ବ୍ୟୁରୋ : ଆଜି ନନ୍ଦନକାନନର ୬୨ ତମ ପ୍ରତିଷ୍ଠା ଦିବସ । ଏଥିପାଇଁ ଆଜି ନନ୍ଦନକାନରେ ବିଭିନ୍ନ କାର୍ଯ୍ୟକ୍ରମ କରାଯାଉଛି । ହେଲେ ୬୨ ବର୍ଷ ପରେ ମଧ୍ୟ ନନ୍ଦନକାନନରେ ଅନେକ ସମସ୍ୟା ରହିଛି । ଏହି ବିଶାଳ ପ୍ରାଣୀ ଉଦ୍ୟାନର କଳେବର ବଢିବ କ’ଣ, ଦିନକୁ ଦିନ କମିବାରେ ଲାଗିଛି । ଗୋଟିଏ ପରେ ଗୋଟିଏ ବିରଳ ପ୍ରଜାତିର ପ୍ରାଣୀଙ୍କ ମୃତ୍ୟୁ ହେଉଛି । ବଂଶବୃଦ୍ଧି ପାଇଁ ଯୋଜନା କରାଯାଉଥିଲେ ମଧ୍ୟ କାର୍ଯ୍ୟକାରୀ କରାଯାଇପାରୁନାହିଁ । ଲୋପ ପାଇଯାଉଛନ୍ତି ବିରଳ ଜୀବଜନ୍ତୁ ଓ ପକ୍ଷୀ । ଏବେ ସୁଦ୍ଧା ୧୬୦ଟି ବାଘ ନନ୍ଦନକାନନରେ ଜନ୍ମ ନେଇଛନ୍ତି । କଳା ବାଘ ବଂଶ ବୃଦ୍ଧି ମଧ୍ୟ କିଛି ମାତ୍ରାରେ ସଫଳ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
୧୯୮୦ରେ ସିଂହଙ୍କ ସଂଖ୍ୟା ୫୬ ଥିଲା। ବାଧ୍ୟ ହୋଇ କେନ୍ଦ୍ରୀୟ ଚିଡିଆଖାନା କର୍ତ୍ତୃପକ୍ଷଙ୍କ ନିର୍ଦ୍ଦେଶକ୍ରମେ ୧୯୯୮ରେ ସିଂହମାନଙ୍କ ଅସ୍ତ୍ରୋପଚାର କରିଥିଲେ । ଶେଷ ଶାବକ ଭାବେ ୨୦୦୦ରେ ‘କାବେରୀ’ ଓ ‘କରିସ୍ମା’ ଜନ୍ମ ଲାଭ କରିଥିଲେ । ଏହାପରଠାରୁ ଲଗାତର ଭାବେ ସିଂହ ବଂଶ ହ୍ରାସ ପାଇ ୨୦୧୨ରେ ଦୁଇ ଅଙ୍କ ତଳକୁ ଖସିଥିଲା । ଗୁଜୁରାଟରୁ ହଳେ ଏସୀୟ ସିଂହ ଆଣି ବଂଶ ବୃଦ୍ଧି ଯୋଜନା କରାଯାଇଥିଲେ ମଧ୍ୟ ସଫଳ ହୋଇ ନଥିଲା । ଯେଉଁଥିପାଇଁ ୨୦୧୪ରେ ବେଙ୍ଗାଲୁରୁରୁ ସିଂହୀ ‘ରୁକ୍ମିଣୀ’ ଓ ‘ନରସିଂହା’ଙ୍କୁ ଅଣାଯିବାରୁ ବଂଶ ବୃଦ୍ଧି ଯୋଜନାକୁ ସଫଳତା ମିଳିଛି। ‘କଳ୍ପନା’ ଓ ‘ଜିତ୍’ ଜନ୍ମ ନେଇଛନ୍ତି । ସିଂହ ବଂଶ ବୃଦ୍ଧି ଯୋଜନା ଏବେ ପ୍ରଥମ ସୋପାନରେ ରହିଛି ।
ବହୁ ଦିନ ଧରି ବନ୍ଦ ରହିଥିବା ଶିଶୁ ରେଳ ଗତ ନଭେମ୍ବର ୧୭ରେ ନୂଆ ରୂପରେ ଆସିଛି ସତ । ମାତ୍ର ଅଧା ବାଟରେ ଝୁଣ୍ଟୁଛି । ଚଳାଚଳ କରିବାର ୪୮ ଘଣ୍ଟା ନପୁରୁଣୁ ଇଞ୍ଜିନ୍ରେ ସଟ ସର୍କିଟ ଯୋଗୁଁ ବନ୍ଦ ରହିଥିଲା । କିଛି ଦିନ ବ୍ୟବଧାନରେ ଟ୍ରାକ୍ ବାହାରକୁ ବି ଚାଲିଯାଇଥିଲା । ପରବର୍ତ୍ତି ସମୟରେ ମରାମତି କରାଯାଇ ଚାଲୁ ରହିଛି । ତେବେ ୨୦୧୨ରୁ ବନ୍ଦ ରହିଥିବା ନନ୍ଦନକାନନର ରୋପ ୱେ କାର୍ଯ୍ୟ ଏଯାବତ୍ ସରି ନାହିଁ । ଏକ ଦଶନ୍ଧି ଧରି ବନ୍ଦ ରହିଥିଲେ ମଧ୍ୟ ଚଲାଇ ନ ପାରିବା କର୍ତୃପକ୍ଷଙ୍କ ପାରିବା ପଣିଆ ନେଇ ପ୍ରଶ୍ନ ଉଠିଛି । ବହୁତଳ ପାର୍କିଂ କାର୍ଯ୍ୟ ଶେଷ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ଉଦ୍ଘାଟନ କି କାର୍ଯ୍ୟକ୍ଷମ ହୋଇପାରି ନାହିଁ । ଯେଉଁଥିପାଇଁ କୋଟି କୋଟି ଟଙ୍କାର ସମ୍ପତ୍ତି ଖତ ଖାଉଛି ।
ଓରାଙ୍ଗଓଟାନ, ନୀଳଗିରି ହନୁ, ସିଂହଲାଞ୍ଜି ମାଙ୍କଡ, ଭାରତୀୟ ଗଣ୍ଡା, ଜେବ୍ରାଙ୍କ ଭଳି ବିରଳ ଜୀବ ଓ କାସ୍ବାରୀ ଭଳି ବିରଳ ପକ୍ଷୀଙ୍କ ବଂଶ ଲୋପ ପାଇଛି । ସାଥୀ ମରିଯିବାରୁ ଲାଲ ହାତ ତାମରିନ୍ ମାଙ୍କଡ, ଜିରାଫ ‘ଖୁସୀ’, ହଳିଦୀ ପିଠିଆ ଶୁଆ, କକାଟିଲ, କ୍ରାଷ୍ଟାଲ କକୋଟୋ ଭଳି ବିରଳ ପ୍ରାଣୀ ଓ ପକ୍ଷୀ ଏକାକୀ ଜୀବନ ବିତାଉଛନ୍ତି । ଏମାନଙ୍କ ପାଇଁ ସାଥୀଟିଏ ଅଣାଯାଇ ପାରି ନାହିଁ । ଜିରାଫ ‘ଖୁସୀ’ର ସାଥୀ ଓ ନୂଆ ପ୍ରଜାତିର ହୁଲକ ଗିବନ ଆଣିବାକୁ କର୍ତୃପକ୍ଷ ବାରମ୍ବାର ଘୋଷଣା କରୁଥିଲେ ମଧ୍ୟ କେବେ ଆଣିବେ ତାହାକୁ ନେଇ ସାଧାରଣରେ ପ୍ରଶ୍ନବାଚ୍ଚୀ ସୃଷ୍ଟି ହୋଇଛି । ମାଈ ଅଷ୍ରିଚ ପକ୍ଷୀ, ଆସାମି ମାଙ୍କଡ, ଅଣ୍ଡିରା ତାମରିନ ମାଙ୍କଡ, ଗୋଲଡେନ ଫିଜାଣ୍ଟ ପକ୍ଷୀ, ନୀଳଗାଈ, ଗୁରାଣ୍ଟି, ଚିଙ୍କାର, ସମ୍ବର, ବାରାଶିଙ୍ଗା ହରିଣ, ଧୂସର ଗଧିଆ, ବଜ୍ରକାପ୍ତା, ଅଜଗର ସାପ, ସିଂହ ମୃତ୍ୟୁ ମଧ୍ୟ ଚର୍ଚ୍ଚାରେ ରହିଛି ।
Chimpanzee Rakhi Given birth one Female baby on Tuesday 28.12.21. Both the mother and the baby are healthy. The Zoo now has eight chimpanzees: @CZA_Delhi @moefcc @CMO_Odisha @PCCFWL_Odisha @ForestDeptt @odisha_tourism @waza pic.twitter.com/qoB2P89fXf
— NANDANKANAN ZOOLOGICAL PARK (@ddnandankanan) December 28, 2021
ନନ୍ଦନକାନନର ସିମ୍ପାଞ୍ଜି ‘ରାକ୍ଷୀ’ ମା’ ହୋଇଛି। ନନ୍ଦନକାନନ ପ୍ରତିଷ୍ଠା ଦିବସର ଠିକ୍ ଦିନକ ପୂର୍ବରୁ ସେ ପ୍ରାଣୀ ଉଦ୍ୟାନକୁ ଏକ ମାଈ ଶାବକ ଭେଟି ଦେଇଛି । ରାକ୍ଷୀର ଏହା ନୂଆବର୍ଷ ଭେଟି ବୋଲି ଚର୍ଚ୍ଚା ହେଉଛି ଓ ଏନେଇ ଗତକାଲି ନନ୍ଦନକାନନ କର୍ମଚାରୀ ମହଲରେ ଖୁସି ଖେଳିଯାଇଛି । ଗତ ରାତିରୁ ରାକ୍ଷୀ ଛୁଆକୁ ଜନ୍ମ ଦେଇଥିଲା । ରାକ୍ଷୀ କୋଳରେ ଶାବକଟି ସ୍ତନ୍ୟପାନ କରି ଖେଳୁଥିବା ଦେଖି ଦାୟିତ୍ବରେ ଥିବା ଜନ୍ତୁରକ୍ଷକ କେଦାର ପାତ୍ର ଖୁସି ହୋଇଯାଇଥିଲେ ଓ ତୁରନ୍ତ କର୍ତ୍ତୃପକ୍ଷଙ୍କୁ ଖବର ଜଣାଇଥିଲେ । ଏହି ଖବର ପ୍ରଚାରିତ ହେବା ପରେ ପରେ ୬୦ ନମ୍ବର (କ) ଖୁଆଡ଼ ପାଖରେ ଭିଡ଼ ସୃଷ୍ଟି ହୋଇଥିଲା । ରାକ୍ଷୀର ଏହା ପ୍ରଥମ ଗର୍ଭ। ଅଣ୍ଡିରା ସିମ୍ପାଜି ଜୁଲୁ ସହ ମିଳନରୁ ଏହି ଶାବକଟି ଜନ୍ମ ନେଇଛି। ଏହି ଶାବକକୁ ମିଶାଇ ଏବେ ନନ୍ଦନକାନନର ସିମ୍ପାଞ୍ଜି ସଂଖ୍ୟା ୮ରେ ପହଁଚିଛି ।