ନାଗରିକତା ସଂଶୋଧନ ବିଲକୁ ଖୋଲା ଚ୍ୟାଲେଞ୍ଜ ଦେଲେ ୫ଟି ରାଜ୍ୟର ମୁଖ୍ୟମନ୍ତ୍ରୀ । ଅନ୍ୟପଟେ ନବୀନଙ୍କ ଆଶ୍ୱସନା ଭୟଭୀତ ହେବାର କାରଣ ନାହିଁ ।
କନକ ବ୍ୟୁରୋ : ନାଗରିକତା ସଂଶୋଧନ ବିଲ ଆଇନରେ ପରିଣତ ହେବା ପରେ ଏହାକୁ ନେଇ ବିବାଦ ସୃଷ୍ଟି ହୋଇଛି । ୫ଟି ରାଜ୍ୟର ମୁଖ୍ୟମନ୍ତ୍ରୀ ସିଏବିକୁ ନିଜ ରାଜ୍ୟରେ ଲାଗୁ କରିବେ ନାହିଁ ବୋଲି ସ୍ପଷ୍ଟ କରିଦେଇଛନ୍ତି । ସେମାନେ ହେଲେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ, ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବଘେଲ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଲ ନାଥ, କେରଳ ମୁଖ୍ୟମନ୍ତ୍ରୀ ପିନରାଇ ବିଜୟନ ଓ ପଂଜାବ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂ । ଏହି ୫ ରାଜ୍ୟର ମୁଖ୍ୟମନ୍ତ୍ରୀ ନାଗରିକତା ସଂଶୋଧନ ବିଲ-୨୦୧୯କୁ ଅଣସାମ୍ବିଧାନିକ କହି ଲାଗୁ କରିବାକୁ ମନା କରିଛନ୍ତି । ସିଏବି ଆଇନର ରୁପ ନେବା ପରେ ସମ୍ବିଧାନ ଅନୁସାରେ ଏହା ଏବେ ସାରା ଦେଶରେ ଲାଗୁହେବା କଥା । ହେଲେ ୫ ରାଜ୍ୟର ମୁଖ୍ୟମନ୍ତ୍ରୀ ନାଗରିକତା ସଂଶୋଧନ ବିଲକୁ ବିରୋଧ କରିବାରୁ କେନ୍ଦ୍ର ଓ ରାଜ୍ୟ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହେବାର ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ମୋଦିଙ୍କ ଘୋର ବିରୋଧୀ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ଧର୍ମ ଅଧାରରେ ନାଗରିକତା କାହଁକି? ସେ ଏହି ବିଲକୁ ଗ୍ରହଣ କରିବେ ନାହିଁ ବୋଲି ରୋକଠୋକ ଶୁଣାଇଦେଇଛନ୍ତି ମମତା । ଗୁରୁବାର କେରଳ ମୁଖ୍ୟମନ୍ତ୍ରୀ ପିନରାଇ ବିଜୟନ କହିଛନ୍ତି, ଅଣସାମ୍ବିଧାନିକ ନାଗରିକତା ସଂଶୋଧନ ବିଲ-୨୦୧୯ର ସ୍ଥାନ କେରଳରେ ନାହିଁ । ସେହିପରି ପଂଜାବ ମୁଖ୍ୟମନ୍ତ୍ରୀ ଅମରିନ୍ଦର କହିଛନ୍ତି ନାଗରିକତା ସଂଶୋଧନ ବିଲ ଦେଶର ଧର୍ମନିରପେକ୍ଷ ଚରିତ୍ରର ବିରୋଧୀ । ତେଣୁ ପଂଜାବରେ ସିଏବି ଲାଗୁ ହେବ ନାହିଁ । ବିଧାନସଭାରେ ଯଥେଷ୍ଠ ସଂଖ୍ୟା ଥିବାରୁ ସିଏବିକୁ ବିରୋଧ କରିବେ କହିଛନ୍ତି ଅମରିନ୍ଦର । ଅନ୍ୟପଟେ ଏକ ଜାତୀୟ ଗଣମାଧ୍ୟମକୁ କେନ୍ଦ୍ର ଗୃହମନ୍ତ୍ରାଳୟର ଏକ ବରିଷ୍ଠ ଅଧିକାରୀ ପ୍ରତିକ୍ରିୟା ଦେଇ କହିଛନ୍ତି, ଆଇନରେ ପରିଣତ ହୋଇଥିବା ବିଲକୁ ବିରୋଧ କରିବା କ୍ଷମତା ରାଜ୍ୟ ସରକାରଙ୍କ ପାଖରେ ନାହିଁ ।
ଅନ୍ୟପଟେ ନାଗରିକତା ସଂଶୋଧନ ବିଲ ଆଇନରେ ପରିଣତ ହେବା ପରେ ଆଜି ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି ସଂଖ୍ୟାଲଘୁ ସଂପ୍ରଦାୟର ନେତା । ନୂଆ ଆଇନକୁ ନେଇ ସଂଖ୍ୟାଳଘୁ ସଂପ୍ରଦାୟ ମଧ୍ୟରେ ଅନେକ ଆଶା ଓ ଆଶଙ୍କା ସୃଷ୍ଟି ହୋଇଛି । ଏନେଇ ଭଦ୍ରକ, ବାଲେଶ୍ୱର ଓ ଯାଜପୁରର ମୁସଲମାନ ସଙ୍ଗଠନର ନେତା ମୁଖ୍ୟମନ୍ତ୍ରୀଙ୍କୁ ଭେଟି ସମ୍ଭାବ୍ୟ ସମସ୍ୟା ସମ୍ପର୍କରେ ଅବଗତ କରାଇଥିଲେ । ସିଏବି ଓ ଏନଆରସି ବିଲକୁ ନେଇ ଏହି ଆଲୋଚନା ହୋଇଥିଲା । ତେବେ ରାଜ୍ୟରେ ମୁସଲମାନଙ୍କ କୌଣସି ଅସୁବିଧା ହେବନାହିଁ ବୋଲି ନବୀନ ଆଶ୍ୱସନା ଦେଇଛନ୍ତି ।
ସଂସଦରେ ନାଗରିକତା ସଂଶୋଧନ ବିଲ ପାସ ହେବା ପରେ, ଆସାମ ଓ ଅନ୍ୟ ଉତରପୂର୍ବ ରାଜ୍ୟରେ ନିଆଁ ଜଳୁଥିବାବେଳେ ଏପଟେ ଓଡିଶାରେ ଏହି ବିଲକୁ ନେଇ ମୁସଲିମ ସଂପ୍ରଦାୟ ମଧ୍ୟରେ ଆଶଙ୍କା ବଢିଯାଇଛି । ଭଦ୍ରକ, ବାଲେଶ୍ୱର ଓ ଯାଜପୁରର ମୁସଲିମ ସଂପ୍ରଦାୟର ନେତାମାନେ ମୁଖ୍ୟମନ୍ତ୍ରୀଙ୍କୁ ଭେଟିଛନ୍ତି । ଭେଟିବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ନବୀନ ସବୁ ଶୁଣିଛନ୍ତି ଏବଂ ମୁସଲିମ ସଂପ୍ରଦାୟ ଭୟବିତ ନ ହେବାକୁ ଅଭୟବାଣୀ ଶୁଣାଇଛନ୍ତି ।
ସାକ୍ଷାତ ବେଳେ ନବୀନ ଏନଆରସି ବା ଜାତୀୟ ନାଗରିକତା ପଂଜିକରଣ ଓଡିଶାରେ ଲାଗୁ ହେବ ନାହିଁ ବୋଲି ଆଶ୍ୱାସନା ଦେଇଥିବା ମୁସଲିମ ନେତାମାନେ କହିଛନ୍ତି । କିନ୍ତୁ ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏଭଳି ସ୍ପଷ୍ଟୀକରଣ ଦିଆଯାଇନାହିଁ । ସଂସଦରେ ବିଜେଡି ନାଗରିକତା ସଂସୋଧନ ବିଲକୁ ସମର୍ଥନ କରିଛି । ଏହି ବିଲରେ ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନରୁ ଆସିଥିବା ଛଅଟି ଧର୍ମର ଶରଣାର୍ଥୀକୁ ନାଗରିକତା ଦିଆଯିବ । କିନ୍ତୁ ସେଥିରେ ମୁସଲମାନ ସଂପ୍ରଦାୟକୁ ବାଦ ଦିଆଯାଇଛି, ଯେଉଁଥିପାଇଁ ବିବାଦ ଦେଖାଦେଇଛି ।