ଏମିତି ଶିକ୍ଷକଙ୍କୁ ଶହେ ସଲାମ; ରିକ୍ସା ଚଲେଇ, କ୍ଷୀର ବିକ୍ରି କରି ହେଲେ ସ୍କୁଲ ଶିକ୍ଷକ । ଅବସର ସମୟରେ ସବୁ ଟଙ୍କା ଗରିବ ଛାତ୍ରଙ୍କୁ କରିଦେଲେ ଦାନ ।
କନକ ବ୍ୟୁରୋ: ପ୍ରଥମେ ରିକ୍ସା ଚଳେଇ ପାଠ ପଢିଲେ, ପରେ କ୍ଷୀର ବିକ୍ରି କରି ଶିକ୍ଷକ ହେଲେ । ଆଉ ଯେବେ ଶିକ୍ଷକତା ଶେଷ ହେଲା, ଅବସର ସମୟ ଆସିଲା ସେତେବେଳେ ଜଣେ ଶିକ୍ଷକ ଏମିତି କାମ କରିଛନ୍ତି ଯେ, ତାଙ୍କୁ ନେଇ ଏବେ ସବୁଠି ଚର୍ଚ୍ଚା ଆରମ୍ଭ ହୋଇଛି । ମଧ୍ୟପ୍ରଦେଶ ପନ୍ନା ଜିଲ୍ଲାର ଜଣେ ସରକାରୀ ପ୍ରାଥମିକ ସ୍କୁଲର ଶିକ୍ଷକ ଅବସର ନେବା ପରେ ତାଙ୍କର ସମସ୍ତ କର୍ମଚାରୀ ଭବିଷ୍ୟ ନିଧି ଟଙ୍କା ଓ ୪୦ ଲକ୍ଷ ଟଙ୍କାର ଗ୍ରାଚ୍ୟୁଇଟି ଟଙ୍କା ଗରିବ ଛାତ୍ରମାନଙ୍କୁ ଦାନ କରିଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜୟ କୁମାର ଚେନସୋରିୟା ନାମକ ଏହି ଶିକ୍ଷକ ଜଣକ ସୋମବାର ନିଜର ୩୯ ବର୍ଷର ଶିକ୍ଷକତା କ୍ୟାରିଅରରୁ ଅବସର ନେଇଥିଲେ । ତାଙ୍କ ଅବସର ହେତୁ ସ୍କୁଲରେ ଏକ ଛୋଟିଆ କାର୍ଯ୍ୟକ୍ରମର ଆୟୋଜନ ହୋଇଥିଲା । ଆଉ ଏହି କାର୍ଯ୍ୟକ୍ରମରେ ଶିକ୍ଷକ ଜଣକ ତାଙ୍କର ସମସ୍ତ ଟଙ୍କାକୁ ଗରିବ ପିଲାଙ୍କୁ ଦାନ କରିଦେଇଛନ୍ତି ।
ଗଣମାଧ୍ୟମକୁ ପ୍ରତିକ୍ରିୟା ରଖି ସେ କହିଛନ୍ତି, ତାଙ୍କ ପତ୍ନୀ ଓ ପିଲାଙ୍କ ସହମତିରେ ସେ ସମସ୍ତ ଟଙ୍କାକୁ ଗରିବ ପିଲାଙ୍କୁ ଦାନ କରିଛନ୍ତି । ଦୁନିଆରେ ଦୁଃଖକୁ କେହି କମ କରିପାରିବେ ନାହିଁ । ହେଲେ ଆମେ ଯାହା କରିବା ଉଚିତ୍, ତାହା କରିବା ବୋଲି ବିଜୟ କହିଛନ୍ତି । ତେବେ ପିଲାଦିନେ ମୁଁ ପାଠ ପଢିବାକୁ ବହୁତ ସଂଘର୍ଷ କରିଥିଲି । ପ୍ରଥମେ ରିକ୍ସା ଚଳାଇବା ସହିତ ପାଠ ପଢା ଶେଷ କରିବାକୁ ମୁଁ କ୍ଷୀର ବିକ୍ରି କରିଥିଲି ଆଉ ୧୯୮୩ରେ ମୁଁ ଶିକ୍ଷକ ହୋଇଥିଲି ବୋଲି ବିଜୟ କୁମାର ଚେନସୋରିୟା ସୂଚନା ଦେଇଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ତାଙ୍କର ଦୁଇଟି ପୁଅ କାମ କରୁଛନ୍ତି । ତାଙ୍କ ଝିଅର ବିବାହ ହୋଇସାରିଛି । ଏପରି ସ୍ଥିତିରେ ସେ ତାଙ୍କର ୪୦ ଲକ୍ଷ ଗ୍ରାଚ୍ୟୁଇଟି ଟଙ୍କା ଓ ଭବିଷ୍ୟ ନିଧି ଟଙ୍କାକୁ ଗରିବ ପିଲାଙ୍କ ପାଇଁ ଉତ୍ସର୍ଗୀକୃତ କରିଛନ୍ତି । ଯେଉଁଥିରେ ତାଙ୍କ ପରିବାର ତାଙ୍କୁ ପୂର୍ଣ୍ଣ ସମର୍ଥନ ଜଣାଇଛନ୍ତି ।