୩୦ ମିନିଟରୁ ଅଧିକ ସମୟ ସ୍ମାର୍ଟଫୋନ ବ୍ୟବହାର କରୁଥିବା ବ୍ୟକ୍ତିଙ୍କୁ ହୋଇପାରେ ବ୍ରେନ କ୍ୟାନସର ! ସର୍ତକ କଲେ ଆଇଆଇଟି ମୁମ୍ବାଇର ବୈଜ୍ଞାନିକ
ସ୍ମାର୍ଟଫୋନର ବ୍ୟବହାର ଦିନକୁ ଦିନ ବଢିବାରେ ଲାଗିଛି । ଛୋଟ ଛୁଆଙ୍କ ଠାରୁ ଆରମ୍ଭ କରି ବୟସ୍କ ବ୍ୟକ୍ତି ପର୍ଯ୍ୟନ୍ତ ସମସ୍ତେ ଏହାର ବ୍ୟବହାର କରୁଛନ୍ତି । ଅଧିକ ସମୟ ଧରି ସ୍ମାଟଫୋନ ବ୍ୟବହାର କରିବା ଦ୍ୱାରା ଏହା ଶରୀର ପାଇଁ କ୍ଷତିକାରକ ଜାଣିଥିଲେ ସୁଦ୍ଧା ଏହାକୁ କ୍ଷଣିକ ପାଇଁ ମଧ୍ୟ ପ୍ରସ୍ତୁତ ନୁହଁନ୍ତି ଆଜିକାଲିର ଯୁବପିଢୀ । ଏପରିକି ରାତି ରାତି ଅନିଦ୍ରା ରହି ସ୍ମାର୍ଟଫୋନର ବ୍ୟବହାର କରୁଛନ୍ତି ଯୁବଗୋଷ୍ଠୀ । କହିବାକୁ ଗଲେ ପୂରାପୁରି ଭାବେ ସ୍ମାର୍ଟଫୋନର ମୋହରେ ପଡି ଯାଇଛନ୍ତି ଆଜିକାଲିର ଯୁବକ ଓ ଯୁବତୀ ମାନେ । ତେବେ ଏହି ଅଭ୍ୟାସ ଶରୀର ପାଇଁ କେତେ କ୍ଷତିକାରକ ତାହା ଜାଣିଲେ ଆପଣ ଆଶ୍ଚର୍ଯ୍ୟ ହେବେ ।
Kanak News is now on WhatsApp
Join and get latest news updates delivered to you via WhatsApp
ଅଧିକ ସମୟ ଧରି ସ୍ମାର୍ଟଫୋନ ବ୍ୟବହାର କରୁଥିବା ଲୋକଙ୍କ ପାଇଁ ଆଇଆଇଟି ମୁମ୍ବାଇର ଜଣେ ବୈଜ୍ଞାନିକ ସର୍ତକ ସୂଚନା ଦେଇଛନ୍ତି । ଇଲେକ୍ଟ୍ରିକାଲ ଇଂଜିନିୟରିଙ୍ଗ ବିଭାଗର ପ୍ରଫେସର ଗିରୀଶ କୁମାର ସତର୍କ କରାଇଛନ୍ତି ଯେ ୩୦ ମିନିଟରୁ ଅଧିକ ସମୟ ସ୍ମାର୍ଟଫୋନ ବ୍ୟବହାର କରିବା ଶରୀର ପାଇଁ କ୍ଷତିକାରକ ।
ଅଲିଗଡ ମୁସଲିମ ବିଶ୍ୱବିଦ୍ୟାଳୟ ପକ୍ଷରୁ ଆୟୋଜିତ ଏକ ସେମିନାରରେ ପ୍ରଫେସର ଗିରୀଶ କହିଛନ୍ତି, ମେଡିକାଲ ଗବେଷଣାରୁ ଜଣାପଡିଛି ଲମ୍ବା ସମୟ ଧରି ସ୍ମାର୍ଟଫୋନର ବ୍ୟବହାର କରୁଥିବା ବ୍ୟକ୍ତିଙ୍କ କ୍ଷେତ୍ରରେ ବ୍ରେନ କ୍ୟାନସର ହେବାର ଆଶଙ୍କା ଦେଖାଯାଇଥାଏ । ସାଧାରଣ ଲୋକଙ୍କ ଅପେକ୍ଷା ସ୍ମାର୍ଟଫୋନ ବ୍ୟବହାର କରୁଥିବା ବ୍ୟକ୍ତିଙ୍କ କ୍ଷେତ୍ରରେ ବ୍ରେନ କ୍ୟାନସର ହେବାର ଆଶଙ୍କା ୪୦୦ ପ୍ରତିଶତ ଅଧିକ ରହିଥାଏ । ପ୍ରଫେସର କୁମାର ସ୍ମାର୍ଟଫୋନର ବିପଦକୁ ନେଇ ଭାରତ ସରକାରଙ୍କୁ ଏକ ରିପୋର୍ଟ ପ୍ରଦାନ କରିଛନ୍ତି । ଏଥିରେ ସେ ଦର୍ଶାଇଛନ୍ତି ଯେ, ଶିଶୁମାନଙ୍କ ପାଇଁ ସ୍ମାର୍ଟଫୋନର ବ୍ୟବହାର ସବୁଠାରୁ ଅଧିକ କ୍ଷତିକାରକ । କାରଣ ଶିଶୁ ମାନଙ୍କର ମସ୍ତିଷ୍କର ଉପରିଭାଗ ନରମ ଓ ପତଳା ହୋଇଥିବାରୁ ସ୍ମାର୍ଟଫୋନରୁ ବାହାରୁଥିବା ରେଡିଏସନର ପ୍ରଭାବ ଅଧିକ ଭାବେ ପଡିଥାଏ ।
ଏହାସହ କୁମାର କହିଥିଲେ ସେଲଫୋନରୁ ନିର୍ଗତ ହେଉଥିବା ରାଡିଆସନ ପଶୁ ଓ ଗଛ-ଲତାଙ୍କ ପାଇଁ ମଧ୍ୟ ମଧ୍ୟ ହାନିକାରକ । ଏହା ଶରୀରର ଡିଏନଏ ଉପରେ ଖରାପ ପ୍ରଭାବ ପକାଇଥାଏ । ଖାସକରି ଯୁବ ପିଢୀଙ୍କ ଉପରେ ଏହା ଅଧିକ ଖରାପ ପ୍ରଭାବ ପକାଇଥାଏ । ଅନିଦ୍ରା, ପାରକିନ୍ସନ ଓ ଅକାଳ ବାର୍ଦ୍ଧକ୍ୟ ଘଟାଉଥିବା ମସ୍ତିଷ୍କ ରୋଗର ଏହା ହେଉଛି ମୂଳ କାରଣ । ପ୍ରଫେସର କୁମାରଙ୍କ କହିବା ଅନୁଯାୟୀ, ଆଧୁନିକ ଜ୍ଞାନକୌଶଳ ଆମ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ । ଏହାକୁ ଅଧିକାଂଶ ଲୋକ ଆପଣାଇ ନେଲେଣି । ଏହାକୁ ଦୂରେଇବା ଏକ ପ୍ରକାର ଅସମ୍ଭବ ହୋଇଯାଇଛି । ଯଦି ସେଲଫୋନର ବ୍ୟବହାରକୁ ନେଇ ସମାଜରେ ସଚେତନ ସୃଷ୍ଟି ନକରାଯାଏ ତେବେ ଏହା ବହୁତ ବଡ କ୍ଷତି ପହଂଚାଇବ ।