ଶିକ୍ଷା ବ୍ୟବସ୍ଥାର ବିକଳ ଚିତ୍ର ! ମଧ୍ୟାହ୍ନ ଭୋଜନ ଖାଇ ଶତାଧିକ ଛାତ୍ରଛାତ୍ରୀ ଅସୁସ୍ଥ, ୨ଗୁରୁତର
କନକ ବ୍ୟୁରୋ : ମଧ୍ୟାହ୍ନ ଭୋଜନ ନା ବିଷ । ରାଜ୍ୟର ବିପର୍ଯ୍ୟସ୍ଥ ଶିକ୍ଷା ବ୍ୟବସ୍ଥାକୁ ନେଇ ଗତକାଲି ବିଧାନସଭା ହୁଲୁସ୍ତୁଲ ହେଉଥିବା ବେଳେ ନଜରକୁ ଆସିଥିଲା ଏଭଳି ଖବର ଯାହା ଖୁବ୍ ସାଂଘାତିକ୍ । ସ୍କୁଲରେ ମଧ୍ୟାହ୍ନ ଭୋଜନ ଖାଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି ଶତାଧିକ ଛାତ୍ରଛାତ୍ରୀ । ସୂଚନା ଅନୁସାରେ ଗଜପତି ଓ କଳାହାଣ୍ଡି ଜିଲ୍ଲାର ୬ଟି ବିଦ୍ୟାଳୟରେ ମଧ୍ୟାହ୍ନ ଭୋଜନ ଖାଇ ଅନ୍ୟୂନ ୨୩୦ ଛାତ୍ରଛାତ୍ରୀ ଅସୁସ୍ଥ ହୋଇପଡ଼ିବା ଘଟଣା ସବୁଆଡ଼େ ଆଲୋଡ଼ନ ଖେଳାଇ ଦେଇଛି । ଏହି ଛାତ୍ରଛାତ୍ରୀଙ୍କ ମଧ୍ୟରୁ ୨୦୦ରୁ ଅଧିକ ପିଲାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗଜପତି ଜିଲ୍ଲା ଗୁମ୍ମା ବ୍ଲକ୍ ଅନ୍ତର୍ଗତ ବଡ଼କଳାବଟ ଆଶ୍ରମ ବିଦ୍ୟାଳୟକୁ ପ୍ରିୟଙ୍କା ସ୍ୱୟଂ ସହାୟିକା ଗୋଷ୍ଠୀ ପକ୍ଷରୁ ମଧ୍ୟାହ୍ନ ଭୋଜନ ଯୋଗାଣ ହେଉଛି । ଗୁରୁବାର ବିଦ୍ୟାଳୟରେ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ଖାଇବାକୁ ଦିଆଯିବା ସହ ଅପରାହ୍ନରେ ବିସ୍କୁଟ ଖାଇବାକୁ ଦିଆଯାଇଥିଲା । ଏହାପରେ କିଛି ଛାତ୍ରଛାତ୍ରୀ ବାନ୍ତି କରିବା ସହ ସେମାନଙ୍କର ମୁଣ୍ଡ ବୁଲାଇଥିଲା । ସଂଗେ ସଂଗେ ସେମାନଙ୍କୁ ଗୁମ୍ମା ମେଡିକାଲକୁ ନିଆଯାଇଥିଲା । ଖବର ଲେଖା ହେଲା ସୁଦ୍ଧା ଗୁମ୍ମା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ୮୦ ଜଣ ଭର୍ତ୍ତି ହୋଇଛନ୍ତି । ଖାଦ୍ୟ ବିଷାକ୍ତ ହେବା କାରଣରୁ ଏଭଳି ଘଟିଥିବା ଆଶଙ୍କା କରିଛନ୍ତି ପ୍ରଧାନଶିକ୍ଷକ ଲକ୍ଷ୍ମୀଧର ସାମନ୍ତରା । ଅନ୍ୟପକ୍ଷରେ, ସ୍ଥିତି ଅନୁଧ୍ୟାନ କରିବାକୁ ମେଡିକାଲର ଏକ ସ୍ୱତନ୍ତ୍ର ଦଳ ବିଦ୍ୟାଳୟରେ ପହଞ୍ଚିଛନ୍ତି । ସେହିପରି କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ୍ର ୫ଟି ସ୍କୁଲର ୧୩୦ରୁ ଅଧିକ ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଖାଇ ଅସୁସ୍ଥ ହୋଇ ପଡ଼ିଛନ୍ତି। ସେମାନଙ୍କ ମଧ୍ୟରୁ ୨ ଜଣ ଛାତ୍ରଛାତ୍ରୀ ଗୁରୁତର ଥିବା ଜଣାଯାଇଛି।
ସୂଚନା ଅନୁସାରେ ଆଜିକି ବହୁ ବର୍ଷ ହେଲା ମାନ୍ନାଟ୍ରଷ୍ଟ ବ୍ଲକର ୧୭୪ଟି ସ୍କୁଲର ୧୩ ହଜାରରୁ ଅଧିକ
ପିଲାଙ୍କୁ ମଧ୍ୟାହ୍ନ ଭୋଜନ ଯୋଗାଇ ଆସୁଛି । ହେଲେ ମାନ୍ନାଟ୍ରଷ୍ଟର ଏହି ରନ୍ଧାଖାଦ୍ୟକୁ ଛାତ୍ରଛାତ୍ରୀ, ଶିକ୍ଷକ ଓ ଅବିଭାବକ ଖାଦ୍ୟ ରୁଚିକର ହେଉନଥିବାରୁ ବାରମ୍ବାର ଅଭିଯୋଗ କରୁଥିଲେ । ଗୁରୁବାର ସକାଳ ୧୧ଟାରେ ବନ୍ଧପାରି ପଞ୍ଚାୟତର ଲୁମା, ଡଙ୍ଗରୀ, ବନ୍ଧପାରୀ ସ୍କୁଲରେ ମାନ୍ନାଟ୍ରଷ୍ଟର ମଧ୍ୟାହ୍ନ ଭୋଜନ ଗାଡ଼ି ପହଞ୍ଚିଥିଲା । ଦିନ ୧ଟାରେ ପିଲାମାନଙ୍କୁ ଖାଇବାକୁ ଦିଆଯାଇଥିଲା । ଖାଇସାରିଲା ପରେ ମୁଣ୍ଡ ବୁଲାଇବାରୁ ଛାତ୍ରଛାତ୍ରୀ ତଳେପଡ଼ି ଯାଇଥିଲେ । ଏହାପରେ ବାନ୍ତି କରିଥିଲେ । ଛାତ୍ରଛାତ୍ରୀଙ୍କୁ ଆମ୍ବୁଲାନ୍ସ ଯୋଗେ ବିଶ୍ୱନାଥପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ବନ୍ଧପାରି ସ୍କୁଲର ଗୀତାଞ୍ଜଳି ମାଝୀ ଓ ରଞ୍ଜିତା ମାଝୀଙ୍କ ଅବସ୍ଥା ଗୁରୁତର ହେବାରୁ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା ।
ଏ ନେଇ ମାନ୍ନାଟ୍ରଷ୍ଟର ମାନ୍ନାଟ୍ରଷ୍ଟର ମ୍ୟାନେଜର ସୁନୀଲ କୁମାର ସିଂଙ୍କୁ ପଚାରିବାରୁ ସେ ଅଫିସ କାମରେ ଭବାନୀପାଟଣା ଯାଇଥିବାରୁ ଘଟଣା ସଂପର୍କରେ କହିପାରିବେ ନାହିଁ ବୋଲି କହିଥିଲେ । ତେବେ ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ ନାଗଙ୍କୁ ପଚାରିବାରୁ ଏ ଘଟଣା କିଛି ନିର୍ଦ୍ଦିଷ୍ଟ ସ୍କୁଲରେ ଘଟିଛି। ସେଥିପାଇଁ କିଛି କହି ହେଉ ନାହିଁ । ସେ ସ୍କୁଲକୁ କେଉଁ ଗାଡ଼ି ଯାଉଛି ସେ ବିଷୟରେ ମାନ୍ନାଟ୍ରଷ୍ଟ କର୍ତ୍ତୃପକ୍ଷଙ୍କୁ ପଚାରି ବୁଝିବୁ ଓ ଖାଦ୍ୟର ଯାଞ୍ଚ ପାଇଁ ପଠାଇଲା ପରେ ସବୁ ତଥ୍ୟ ଜଣାପଡ଼ିବ ବୋଲି ପ୍ରକାଶ କରିଛନ୍ତି ।
ସୂଚନାଥାଉ କି, ମାନ୍ନାଟ୍ରଷ୍ଟର ଖାଦ୍ୟର ମାନକୁ ନେଇ ଲାଞ୍ଜିଗଡ଼ ପ୍ରାଥମିକ ଶିକ୍ଷକ ସଂଘ ପକ୍ଷରୁ ପୂର୍ବରୁ ତତ୍କାଳୀନ ଜିଲ୍ଲାପାଳ ଡ. ବୃନ୍ଦା ଡି.ଙ୍କ ଠାରେ ଅଭିଯୋଗ କରାଯାଇଥିଲା । ହେଲେ ଏପଯ୍ୟର୍ନ୍ତ କୌଣସି କାର୍ଯ୍ୟାନୁଷ୍ଠାନ ନେଇନଥିବା ଅଭିଯୋଗ କରିଛନ୍ତି ଲାଞ୍ଜିଗଡ଼ ପ୍ରାଥମିକ ଶିକ୍ଷକ ସଂଘ ସଭାପତି ଦେବେନ୍ଦ୍ର ବିଶ୍ୱାଳ ।