ବିଳମ୍ବରେ ଆସି ଓଡିଶାରୁ ସଅଳ ଉଭାନ ହୋଇଛି ମୌସୁମୀ ! କାଁ ଭାଁ ବର୍ଷାକୁ ଛାଡିଦେଲେ ରାଜ୍ୟରେ ପାଗ ଶୁଖିଲା
ପାଣିପାଗ କେନ୍ଦ୍ରର ଆକଳନ, ୫ ଦିନ ପରେ ଫେରିପାରେ ମୌସୁମୀ
କନକ ବ୍ୟୁରୋ: ସପ୍ତାହେ ବିଳମ୍ବରେ ଆସିଲା ମୌସୁମୀ, ମାତ୍ର ଦିନକ ପରେ ହୋଇଗଲା ଗାଏବ । ୧୨ ବର୍ଷର ରେକର୍ଡ ଭାଙ୍ଗି ଜୁନ୍ ୨୧ ତାରିଖରେ ଓଡ଼ିଶାର ମାଟି ଛୁଇଁଥିଲା ମୌସୁମୀ । ପ୍ରାୟ ୨୧ ଜିଲ୍ଲାରେ ସେଦିନ ଝିପି ଝିପି ବର୍ଷା ଆରମ୍ଭ ହୋଇଥିଲା । ପାଣିପାଗ ବିଭାଗ ମଧ୍ୟ ଆକଳନ କରିଥିଲା ଏଥର ସ୍ୱାଭାବିକ ବର୍ଷା ହେବ । କିନ୍ତୁ ବର୍ତମାନ ସଂପୂର୍ଣ୍ଣ ଓଲଟା ପାଣିପାଗ ଦେଖିବାକୁ ମିଳୁଛି । ମୌସୁମୀ ଛୁଇଁବାର ମାତ୍ର ୨୪ ଘଂଟା ପରେ ଓଡ଼ିଶାର ଅଧିକାଂଶ ଅଂଚଳରେ ଉଭାନ ହୋଇଯାଇଛି ବର୍ଷା । ସତେ ଯେମିତି ଓଡିଶାରୁ ଗାଏବ ହୋଇଯାଇଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟର କାଁ ଭାଁ କିଛି ଜାଗାରେ ବର୍ଷା ହେଉଛି ଆଉ ସବୁଠି ଶୁଖିଲା ପାଗ ସାଙ୍ଗକୁ ପ୍ରବଳ ଗୁଳୁଗୁଳି । ଆଗାମୀ ପାଂଚ ଦିନ ପର୍ଯ୍ୟନ୍ତ ବର୍ଷା ହେବାର ଅନୁକୁଳ ପାଗ ସୃଷ୍ଟି ହେବା ଆଶା ମଧ୍ୟ ନାହିଁ । ତେବେ ୫ ଦିନ ପରେ ମୈାସୁମୀ ସକ୍ରିୟ ହେବାର ସମ୍ଭାବନା ରହିଛି ବୋଲି କହିଛି ଆଂଚଳିକ ପାଣିପାଗ କେନ୍ଦ୍ର । ସେପଟେ ଆଜି ସକାଳ ୮ ସୁଦ୍ଧା ବାଲେଶ୍ୱର, କୋରାପୁଟ ଓ ମାଲକାନଗିରି ଜିଲ୍ଲାର ଗୋଟିଏ ଦୁଇଟି ସ୍ଥାନରେ ଘଡଘଡି, ବିଜୁଳି ସହ ବର୍ଷା ହେବା ସମ୍ଭାବନା ରହିଛି ବୋଲି ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି ।