ଦେଶରେ ବଢ଼ୁଛି କରୋନା ସଂକ୍ରମଣ, କିଛି ରାଜ୍ୟରେ ଦ୍ୱିତୀୟ ଲହର ଆଶଙ୍କା । ପ୍ରଧାନମନ୍ତ୍ରୀ କହିଲେ, ଲକଡାଉନ ନୁହେଁ ଛୋଟ କଂଟେନମେଣ୍ଟ ଜୋନ କରି ନିୟନ୍ତ୍ରଣ କର ସଂକ୍ରମଣ ।
କନକ ବ୍ୟୁରୋ: ଦେଶର ବିଭିନ୍ନ ରାଜ୍ୟରେ କରୋନାର ଦ୍ୱିତୀୟ ଲହର ଆଶଙ୍କା ଭିତରେ, ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦ୍ୱିତୀୟ ଲହର କିଭଳି ସାରାଦେଶକୁ ନବ୍ୟାପିବ, ସେଥିପାଇଁ ସତର୍କ କରିଛନ୍ତି ପ୍ରଧାନମନ୍ତ୍ରୀ । କହିଛନ୍ତି, ଏହି ଲହରକୁ ନରୋକିଲେ, ମୁକାବିଲା କରିବା କଷ୍ଟକର ହୋଇପଡିବ । ବିଶେଷ କରି କିଭଳି ଛୋଟ ସହର ଓ ଗାଁକୁ ଯେଭଳି ନବ୍ୟାପିବ, ସେଥପାଇଁ ପଦକ୍ଷେପ ନେବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ଗତ ମାସରେ କରୋନା ସଂକ୍ରମଣ ଟିକେ କମିବା ପରେ ଅଧିକାଂଶ ରାଜ୍ୟ ସରକାର ଟେଷ୍ଟିଂ, ଟ୍ରାକିଂ କମାଇ ଦେଇଥିଲେ । ପୂର୍ବ ଭଳି ଟେଷ୍ଟିଂ ଓ ଟ୍ରାକିଂକୁ ଆଉ ଗୁରୁତ୍ୱ ଦେଇନଥିଲେ । ହେଲେ, ଏହା ମହଙ୍ଗା ପଡିଛି । ମହାରାଷ୍ଟ୍ର ଭଳି ରାଜ୍ୟରେ କରୋନା ବ୍ୟାପିବାର ଏହା ଏକ ପ୍ରମୁଖ କାରଣ ବନିଯାଇଛି । ସେଥିପାଇଁ ଦ୍ୱିତୀୟ ଲହରକୁ ରୋକିବା ପାଇଁ ଟେଷ୍ଟିଂ, ଟ୍ରାକିଂ ଓ ଟ୍ରିଟମେଂଟକୁ ବଢ଼ାଇବା ଉପରେ ଗୁରୁତ୍ୱ ଦେଇଛନ୍ତି ପ୍ରଧାନମନ୍ତ୍ରୀ ।
ତେବେ କରୋନା ମୁକାବିଲା ପାଇଁ ଲକଡାଉନ ଭଳି କଠୋର କଟକଣା ନଲଗାଇବାକୁ ପରାମର୍ଶ ଦେଇଛନ୍ତି ମୋଦି । ଜନତାଙ୍କ ଭିତରେ ଭୟର ବାତାବରଣ ସୃଷ୍ଟି ନକରିବାକୁ କହିଛନ୍ତି । ପୁରୁଣା ଅନୁଭୂତିକୁ ଲଗାଇ ମୁକାବିଲା କରିବାକୁ କହିଛନ୍ତି । ଏଥିପାଇଁ ରାଜ୍ୟମାନଙ୍କୁ ପାଞ୍ଚଟି ମନ୍ତ୍ର ଦେଇଛନ୍ତି ପ୍ରଧାନମନ୍ତ୍ରୀ । କହିଛନ୍ତି..
– ଟିକା ସହ କଟକଣା ମାନିବାକୁ ପଡିବ
– ଆରଟିପିସିଆର ଟେଷ୍ଟକୁ ବଢ଼ାଇବାକୁ ପଡିବ
– ଛୋଟ ଛୋଟ କଂଟେନମେଂଟ ଜୋନ ବନାଇବା ଉପରେ ଗୁରୁତ୍ୱ
– ଟିକା ଦେବା ପାଇଁ ଅଧିକ କେନ୍ଦ୍ର ବ୍ୟବସ୍ଥା କରିବା
-ଟିକାର ଏକ୍ସପାଏରୀ ଡେଟକୁ ନଜରରେ ରଖିବା
ଗତ କିଛି ଦିନ ହେଲା ଦେଶରେ ଦୈନିକ ୨୦ ହଜାର ଉପରେ ନୂଆ ଆକ୍ରାନ୍ତ ଚିହ୍ନଟ ହେଉଛନ୍ତି । ଗତ ୨୪ ଘଂଟା ମଧ୍ୟରେ ୨୮ ହଜାର ୯୦୩ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହପରି ଗୋଟିଏ ଦିନରେ ୧୮୮ ଜଣଙ୍କ ମୃତ୍ୟୁ ହୋଇଛି । ବିଶେଷ କରି ମହାରାଷ୍ଟ୍ରରେ ଦୃତ ସଂକ୍ରମଣ ମୁଣ୍ଡ ବିନ୍ଧାର କାରଣ ପାଲଟିଛି । ସେହିପରି ପଞ୍ଜାବ, ଗୁଜୁରାଟ , କର୍ଣ୍ଣାଟକ, ତାମିଲନାଡୁ ଓ ମଧ୍ୟପ୍ରଦେଶରେ ଅଚାନକ କରୋନା ସଂକ୍ରମଣ ବୃଦ୍ଧି ଚିନ୍ତାର କାରଣ ହୋଇଛି ।