ନିର୍ବାଚନୀ ଋତୁରେ ଦିଲ୍ଲୀ ହଲଚଲ । ଖୋଲିବ ଭିଭିଆଇପି ହେଲିକପ୍ଟର ଦୁର୍ନୀତିର ଭାନୁମତି ପେଡି, ଭାରତରେ ପହଞ୍ଚିଲା ଅଗସ୍ତା ୱେଷ୍ଟଲାଣ୍ଡ ଲାଂଚ ମାମଲାର ଦଲାଲ
କନକ ବ୍ୟୁରୋ : ୩୬ ଶହ କୋଟିର ଭିଭିଆଇପି ଚପର ସ୍କାମର ମଧ୍ୟସ୍ଥତା କରିଥିବା ଖ୍ରିଷ୍ଟିଆନା ମିସେଲକୁ ଭାରତ ଅଣାଯାଇଛି । ୟୁଏଇ ସହ ପ୍ରତ୍ୟର୍ପଣ ଚୁକ୍ତି ବଳରେ ସରକାର ମିସେଲଙ୍କୁ ଦିଲ୍ଲୀ ଆଣିଛନ୍ତି । ଆଉ ଭାରତ ମାଟିରେ ପାଦ ଦେଉ ଦେଉ ତାକୁ ପଚରା ଉଚରା କରିଛି ସିବିଆଇ । ଫ୍ରାନ୍ସ ସହ ରାଫେଲ ଡିଲକୁ ନେଇ ମୋଦି ସରକାରଙ୍କୁ କଂଗ୍ରେସ ଘେରୁଥିବା ବେଳେ ଏବେ ନିର୍ବାଚନୀ ବର୍ଷରେ ୟୁପିଏ ସରକାର ଅମଳରେ ହୋଇଥିବା ଏହି ବହୁକୋଟି ଡିଲର ଗୁମର ଖୋଲିବା ନେଇ ସମ୍ଭାବନା ସୃଷ୍ଟି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ୩୬ ଶହ କୋଟିର ବହୁଚର୍ଚ୍ଚିତ ଅଗସ୍ତା ୱେଷ୍ଟଲାଣ୍ଡ ଡିଲ ଉପରୁ ପରଦା ହଟିବା ଲାଗି ଫିଟିଛି ବାଟ । ସଫଳ ହୋଇଛି ଭାରତ ସରକାରଙ୍କ ମିଶନ୍ ‘ୟୁନିକର୍ଣ୍ଣ’ । ଭାରତ ମାଟିରେ ପାଦ ଥାପିଛି ଏହି ବହୁକୋଟି ଦୁର୍ନୀତିର ଦଲାଲ । ଅଗସ୍ତା ୱେଷ୍ଟଲାଣ୍ଡ ଭିଭିଆଇପି ହେଲିକପ୍ଟଲ ଡିଲ ପାଇଁ ଲାଂଚ ମାମଲାରେ ମଧ୍ୟସ୍ଥତା କରିଥିବା ଖ୍ରୀଷ୍ଟିୟାନା ମିସେଲକୁ ଭାରତ ଆଣିବାରେ ସଫଳତା ମିଳିଛି । ୟୁଏଇ ସହ ପ୍ରତ୍ୟର୍ପଣ ଚୁକ୍ତି ବଳରେ ଦିଲ୍ଲୀରେ ପହଂଚିଛି ମିସେଲ । ଦୁବାଇରୁ ଗଲ୍ଫଷ୍ଟ୍ରିମର ଏକ ସ୍ୱତନ୍ତ୍ର ବିମାନରେ ତାକୁ ଦିଲ୍ଲୀ ଅଣାଯାଇଛି । ଦିଲ୍ଲୀ ଇନ୍ଦିରାଗାନ୍ଧି ଅନ୍ତର୍ଜାତୀୟ ବିମାନ ବନ୍ଦରରେ ପହଂଚିବା ପରେ ମିସେଲକୁ ସିଧା ସିବିଆଇ ମୁଖ୍ୟାଳୟକୁ ନେଇ ପଚରା ଉଚରା କରାଯାଇଛି ।
ଭାରତ ସରକାରଙ୍କ ସହ ଅଗସ୍ତା ୱେଷ୍ଟଲାଣ୍ଡ ହେଲିକପ୍ଟର ଡିଲ ଫାଇନାଲ କରିବାକୁ ଏହି ଆଂଗ୍ଲୋ-ଇଟାଲିୟାନ ଫାର୍ମ ମଧ୍ୟସ୍ଥି ଖ୍ରୀଷ୍ଟିୟାନ ମିସେଲକୁ ନିଯୁକ୍ତ କରିଥିବା ଅଭିଯୋଗ ରହିଛି । ତତକାଳୀନ ୟୁପିଏ ସରକାରଙ୍କ ସହ ବାୟୁସେନା ଅଧିକାରୀମାନଙ୍କୁ ପ୍ରଭାବିତ କରିବା ଲାଗି ମିସେଲକୁ ବ୍ୟବହାର କରିଥିଲା ଫିନମେକାନିକା କମ୍ପାନି । ପ୍ରାୟ ୩୬ଶହ କୋଟି ଟଙ୍କାର ଚୁକ୍ତିରେ ଭାରତୀୟ ବାୟୁସେନାକୁ ୧୨ଟି ଅଗସ୍ତା ୱେଷ୍ଟଲାଣ୍ଡ ହେଲିକପ୍ଟର ଯୋଗାଇ ଦେଇଥାନ୍ତା ଫିନମେକାନିକା କମ୍ପାନି । ଦେଶର ରାଷ୍ଟ୍ରପତି, ପ୍ରଧାନମନ୍ତ୍ରୀ ଓ ପୂର୍ବତନ ପ୍ରଧାନମନ୍ତ୍ରୀଙ୍କ ସହ ଅନ୍ୟାନ୍ୟ ଭିଆଇପି ମାନଙ୍କ ଗସ୍ତ ଲାଗି ବ୍ୟବହାର ହୋଇଥାନ୍ତା ଏହି ହେଲିକପ୍ଟର । ହେଲେ ଏହି ଡିଲକୁ ଚୂଡାନ୍ତ କରିବା ଲାଗି ବଡଧରଣ ଲାଂଚ କାରବାର ହୋଇଥିଲା । ଡିଲକୁ ପାରିତ କରିଇବା ଲାଗି ତିନିଜଣ ମଧ୍ୟସ୍ଥିଙ୍କୁ ମୋଟ୍ ୩୫୦ କୋଟି ଟଙ୍କା ଲାଂଚ ଦେଇଥିଲା ଇଟାଲିୟ କମ୍ପାନି । କେବଳ ଖ୍ରୀଷ୍ଟିୟାନା ମିସେଲକୁ ୨୨୫ କୋଟି ଟଙ୍କା ଦିଆଯାଇଥିବା ଅଭିଯୋଗ ରହିଛି । ଏହି ମାମଲାରେ ଅନ୍ୟ ଦୁଇ ମଧ୍ୟସ୍ଥି ହେଉଛନ୍ତି ଗୁଇଡୋ ହେସକେ ଓ କାର୍ଲୋ ଗେରରୋସା ।
– ୨୫ ନଭେମ୍ବର ୨୦୧୫ରେ ମିସେଲ ବିରୋଧରେ ଇଂଟରପୋଲ ରେଡ୍ ନୋଟିସ ଜାରି କରିଥିଲା
– ଭାରତ ସରକାରଙ୍କ ଅନୁରୋଧରେ ୨୦୧୭ରେ ଖ୍ରୀଷ୍ଟିୟାନା ମିସେଲକୁ ଗିରଫ କରିଥିଲେ ୟୁଏଇ ସରକାର
– ଏହାପରେ ଭାରତକୁ ପ୍ରତ୍ୟର୍ପଣ ପାଇଁ ବାରମ୍ବାର ଉଦ୍ୟମ ଜାରି ରଖିଥିଲେ ସିବିଆଇ ଓ ପ୍ରବର୍ତନ ନିର୍ଦ୍ଦେଶାଳୟ
– ଜଣେ ବ୍ରିଟିସ ନାଗରିକ ହୋଇଥିବାରୁ ଗତ ଅଗଷ୍ଟ ୨୬ରେ ଭାରତକୁ ପ୍ରତ୍ୟର୍ପଣ ପାଇଁ କୋର୍ଟଙ୍କ ଅନୁମତି ଲୋଡିଥିଲେ ଦୁବାଇ ପ୍ରଶାସନ
– ଏବେ ଦୁବାଇ ଗସ୍ତରେ ଥିବା ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କ ଉଦ୍ୟମରେ ସମ୍ଭବ ହୋଇଥିଲା ପ୍ରତ୍ୟର୍ପଣ
ଫ୍ରାନ୍ସ ସହ ରାଫେଲ ଡିଲକୁ ନେଇ କେନ୍ଦ୍ରରେ ମୋଦି ସରକାରଙ୍କ ଉପରେ ବାରମ୍ବାର ରାଜନୈତିକ ଆକ୍ରମଣ କରିଆସୁଛି କଂଗ୍ରେସ । ଆଉ ନିର୍ବାଚନୀ ବର୍ଷରେ ୟୁପିଏ ସରକାର ଅମଳରେ ହୋଇଥିବା ଏହି ବହୁକୋଟି ଡିଲର ଗୁମର ଖୋଲିବା ନେଇ ସମ୍ଭାବନା ସୃଷ୍ଟି ହୋଇଥିବାରୁ ଉତ୍ସାହିତ ବିଜେପି ଶିବିର । ମୋଦି ସରକାରଙ୍କ ଇସାରାରେ ସିବିଆଇ ଓ ପ୍ରବର୍ତନ ନିର୍ଦ୍ଦେଶାଳୟ ସକ୍ରିୟ ହୋଇ ମାମଲାର ମୂଳରେ ପହଂଚିବାକୁ ପ୍ରୟାସ ଜୋରଦାର କରିଥିବା କୁହାଯାଉଛି । ହେଉଥିବା କିକବ୍ୟାକ ଅଭିଯୋଗ ସାବ୍ୟସ୍ତ ହେଲେ କଂଗ୍ରେସକୁ ଘେରିବା ଲାଗି ବିଜେପିକୁ ବଡ ମୌକା ମିଳିଯିବା ସମ୍ଭାବନା ରହିଛି ।