ଭଙ୍ଗା କ୍ୟାବିନରେ ଜୀବନ । କରୋନା ଯୋଗୁଁ ରୋଜଗାର ନଥିବାରୁ ଦେଇ ପାରିଲେନି ଘରଭଡା । ଘର ଛାଡି କ୍ୟାବିନ ଭିତରେ ରହୁଛନ୍ତି ଭୂମିହୀନ ପରିବାରର ବାପା-ମାଆ ଓ ଝିଅ ।
- ଭଙ୍ଗା କ୍ୟାବିନରେ ଜୀବନ
- କାହା ପାଇଁ ସରକାରୀ ଯୋଜନା?
- କେଉଁ ଭଳି ବ୍ୟକ୍ତିଙ୍କୁ ମିଳୁଛି ସରକାରୀ ପକ୍କା ଘର?
Kanak News is now on WhatsApp
Join and get latest news updates delivered to you via WhatsApp
ଏମିତି କିଛି ପ୍ରଶ୍ନ ସହ କ୍ୟାବିନ ଭିତରେ ରହୁଛନ୍ତି କେନ୍ଦ୍ରାପଡା ରାଜକନିକା ବ୍ଲକ ନମତରା ଗାଁର ମଙ୍ଗୁଳି ଜେନାଙ୍କ ପରିବାର । ଭୂମିହୀନ ଏହି ପରିବାର ପାଇଁ ସରକାରଙ୍କ ସମସ୍ତ ଯୋଜନା ସତେ ଯେମିତି ସାତ ସପନ । ଦୀର୍ଘ ୧୩ ବର୍ଷ ହେବ କାମ ଧନ୍ଦା କରି ଭଡା ଘରେ ରହୁଥିଲେ ମଙ୍ଗୁଳିଙ୍କ ପରିବାର । ହେଲେ କରୋନା ଯୋଗୁଁ କାମ ଧନ୍ଦା ବନ୍ଦ ହେବାରୁ ଭଡା ଘର ଛାଡି ନମତରା ଇନ୍ଦିରା ଛକରେ ଥିବା ଏକ ଭଙ୍ଗା କ୍ୟାବିନରେ ରହୁଛନ୍ତି ମଙ୍ଗୁଳି, ତାଙ୍କ ସ୍ତ୍ରୀ ମିନତି ଜେନା ଓ ୯ ବର୍ଷର ଝିଅ ସରସ୍ୱତୀ ଜେନା । ଝିଅର ପାଠପଢା ବନ୍ଦ ହୋଇଯାଇଥିବା ବେଳେ ଦିନକୁ ଦୁଇ ଓଳି ଦାନା ଯୋଗାଡ କରିବା କଷ୍ଟକର ହୋଇପଡିଛି ।
ଭଙ୍ଗା କ୍ୟାବିନ ଭିତରେ ରୋଷେଇ, ଖିଆ-ପିଆ ସବୁ କିଛି ଆଉ ରାତିର ଭୟରେ ସେହି କ୍ୟାବିିନରେ ଶୁଅନ୍ତି ବାପା-ମାଆ ଓ ଝିଅ । ମଙ୍ଗୁଳି ଭୂମିହୀନ ହୋଇଥିବାରୁ ସରକାରୀ ଯୋଜନାରେ ଜମିପଟା ଖଣ୍ଡେ ପାଇଁ ବାରମ୍ବାର ତହସିଲରେ ଆବେଦନ କରିଛନ୍ତି । ହେଲେ କେହି ତାଙ୍କ କଥା ଶୁଣୁନାହାନ୍ତି । ତେଣୁ ମଙ୍ଗୁଳି ଜେନାଙ୍କୁ ତୁରନ୍ତ ଜାଗା ସହିତ ସରକାରୀ ଯୋଜନାରେ ପକ୍କା ଘର ଯୋଗାଇ ଦେବାକୁ ଦାବି କରିଛନ୍ତି ଗ୍ରାମବାସୀ ।