ମଣ୍ଡିରୁ ଧାନ ନ ଉଠିବା ନେଇ ଚାଷୀଙ୍କ ତୀବ୍ର ଅସନ୍ତୋଷ : ପ୍ରତିବାଦରେ ଗୋଲାମୁଣ୍ଡା-ସିନାପାଲି ମୁଖ୍ୟ ରାସ୍ତାରେ ଧାନ ବସ୍ତା ରଖି ରାସ୍ତାରୋକ
କନକ ବ୍ୟୁରୋ : ଚାଷୀ ଯେପରି ଶୋଷଣର ଶିକାର ନ ହୋଇ ଉଚିତ ମୂଲ୍ୟରେ ନିଜର ଅମଳ ଫସଲକୁ ବିକ୍ରି କରିପାରିବ ସେଥିପାଇଁ ବିଭିନ୍ନ ସ୍ଥାନରେ ଧାନମଣ୍ଡି ଖୋଲା ଯାଇଛି । ମଣ୍ଡିରେ ଅବ୍ୟବସ୍ଥା ସାଙ୍ଗକୁ ମିଲର୍ସଙ୍କ ମନମାନି ଯୋଗୁଁ ହନ୍ତସନ୍ତ ହେଉଛନ୍ତି ଚାଷୀ । ବିଭିନ୍ନ ଜିଲ୍ଲାରୁ ମଣ୍ଡି ସମସ୍ୟାକୁ ନେଇ ଚାଷୀଙ୍କ ଅଭିଯୋଗ ବୃଦ୍ଧି ପାଉଛି । ଧର୍ମଗଡରେ ମଣ୍ଡିରୁ ଧାନ ନ ଉଠିବା ନେଇ ନେଇ ତୀବ୍ର ଅସନ୍ତୋଷ ଜାହିର କରିଛନ୍ତି ଚାଷୀ । ପ୍ରତିବାଦରେ ଗୋଲାମୁଣ୍ଡା-ସିନାପାଲି ମୁଖ୍ୟ ରାସ୍ତାରେ ଧାନ ବସ୍ତା ରଖି ରାସ୍ତାରୋକ କରିଛନ୍ତି । ଫଳରେ ଗୋଲାମୁଣ୍ଡା-ସିନାପାଲି ରାସ୍ତାରେ ଗାଡି ଚଳାଚଳ ବନ୍ଦ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ବାଲେଶ୍ବର ଜିଲ୍ଲା ଔପଦା ବ୍ଲକ ବଡ଼ପୋଖରୀ ସମବାୟ ସମିତି ଆଗରେ ଚାଷୀମାନେ ଧାନରଖି ଶୀତ କାକରରେ ପଡିରହିଛନ୍ତି । ମିଲରଙ୍କ ମନମାନି ଯୋଗୁଁ ଚାଷୀମାନେ ରାତିରେ ଧାନ ଦେଇ ନପାରି ଆଣିଥିବା ଧାନକୁ ରାତି ସାରା ଜଗି ରହିଛନ୍ତି । ବଡ଼ପୋଖରୀ ସମବାୟ ସମିତିରେ ଧାନ ମଣ୍ଡିରେ ଧାନ କିଣାରେ ବ୍ୟାପକ ଅନିୟମିତତା ଅଭିଯୋଗ ଆସିଛି । ବୁଲା ଷଣ୍ଢ ଗୋରୁଙ୍କ ଦାଉରୁ ରକ୍ଷା ପାଇଁ ଚାଷି ତାର ଅମଳ ଧାନକୁ ଧରି ସାରାରାତି ଜଗିରହିଛି ।
ଅନ୍ୟପକ୍ଷରେ ରାୟଗଡା ଜିଲ୍ଲା ଗୁଣୁପୁର ବ୍ଲକ ଅନ୍ତର୍ଗତ ଡମ୍ବସରା ଧାନମଣ୍ଡିରେ ବହୁ ଚାଷୀ ନିଜର ଉତ୍ପାଦିତ ଧାନକୁ ମଣ୍ଡିରେ ବିକ୍ରି କରିବା ଧାନ ଆଣିଥିଲେ । କିନ୍ତୁ ଚାଷୀ ଦିନ ତମାମ ମଣ୍ଡିରେ ଜଗି ରହି ମଧ୍ୟ ନିଜ ଅମଳ ଧାନକୁ ବିକ୍ରି କରି ପାରିନଥିଲେ । ଲେମ୍ପ କର୍ତୁପକ୍ଷ ଟାର୍ଗେଟ ସରିବା ଆଳରେ ଚାଷୀଙ୍କ ଧାନ କିଣିବା ବନ୍ଦ କରିଦେବା ଫଳରେ ଅଧିକାଂଶ ଚାଷୀଙ୍କୁ ନିରାଶ ହୋଇ ଧାନବିକ୍ରି କରିପାରି ନଥିଲେ । ଅନେକ ଚାଷୀ ମାଣ୍ଡିକୁ ଆଣିଥିବା ଧାନ ଫେରାଇ ନପାରି ବାଧ୍ୟ ହୋଇ ରାତି ରାତି ଅନିଦ୍ରା ରହି ଭୋକ ଉପବାସରେ ନିଜର ଅମଳ ଧାନକୁ ଶୀତ କାକରରେ ଜଗି ରହିଥିଲେ । ଗୋଟେପଟେ ମିଲରସ ମନମାନି ଅନ୍ୟପଟେ ଲେମ୍ପ କର୍ତୁପକ୍ଷ ଓ ବିଭାଗୀୟ ଅଧିକାରୀଙ୍କ ଖାମଖିଆଲ ମନୋଭାବକୁ ଯୋଗୁଁ ଚାଷୀ ଶୋଷଣର ଶିକାର ହେବାକୁ ପଡୁଛି ବୋଲି ଚାଷୀ ଅଭିଯୋଗ କରିଛନ୍ତି ।