ନନ୍ଦିଗ୍ରାମରୁ ନିର୍ବାଚନ ଲଢିବେ ମମତା । ଶୁଭେନ୍ଦୁ ଅଧିକାରୀଙ୍କ ସହ ହେବ ମୁହାଁମୁହିଁ ଟକ୍କର । ନଜର ପକାନ୍ତୁ, ଟିଏମସି ପାଇଁ କାହିଁକି ଗୁରୁତ୍ୱପୂର୍ଣ୍ଣ ଏହି ସିଟ୍…
କନକ ବ୍ୟୁରୋ: ପଶ୍ଚିମବଙ୍ଗର ନନ୍ଦିଗ୍ରାମରେ ହେବ ସବୁଠାରୁ ବଡ ଲଢେଇ । ଟିଏମସି ଛାଡି ବିଜେପିରେ ଯୋଗଦେଇଥିବା ଶୁଭେନ୍ଦୁ ଅଧିକାରୀଙ୍କ ଗଡରୁ ଲଢିବେ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏଥର ଭବାନୀପୁର ବଦଳରେ ନନ୍ଦିଗ୍ରାମରୁ ପ୍ରାର୍ଥୀ ହେବେ ମମତା । ଆସନ୍ତା ୧୦ ତାରିଖରେ ସେ ଏହି ଆସନରୁ ପ୍ରାର୍ଥୀପତ୍ର ଦାଖଲ କରିବେ । ଏହାସହ ମମତା ତାଙ୍କର ପାରମ୍ପରିକ ଆସନ ଭବାନୀପୁରରୁ ନିର୍ବାଚନ ଲଢିବେ ନାହିଁ । ପଶ୍ଚିମବଙ୍ଗ ନିର୍ବାଚନ ପାଇଁ ୨୯୧ ପ୍ରାର୍ଥୀଙ୍କ ତାଲିକା ଜାରି କରି ଏହି ଘୋଷଣା କରିଛି ତୃଣମୂଳ କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଅର୍ଥାତ ନନ୍ଦିଗ୍ରାମରେ ଶୁଭେନ୍ଦୁ ଅଧିକାରୀଙ୍କ ସହ ଏଥର ମମତା ବାନାର୍ଜୀଙ୍କ ମୁହାଁମୁହିଁ ଲଢେଇ ହେବ । ନନ୍ଦିଗ୍ରାମରୁ ବର୍ତ୍ତମାନ ଶୁଭେନ୍ଦୁ ଅଧିକାରୀ ବିଧାୟକ ଅଛନ୍ତି । ତେଣୁ ଏଠାରେ ମମତା-ଶୁଭେନ୍ଦୁଙ୍କ ମୁହାଁମୁହିଁ ଟକ୍କର ହେବା ସ୍ପଷ୍ଟ ହୋଇସାରିଛି । ପଶ୍ଚିମବଙ୍ଗରେ ଲଗାତାର ତୃତୀୟ ଥର ଲାଗି କ୍ଷମତାସୀନ ହେବାକୁ ଲକ୍ଷ୍ୟ ରଖିଥିବା ମମତା ବାନାର୍ଜୀ ଏଥର ନିଜ ରାଜନୈତିକ କ୍ୟାରିୟର ସବୁଠାରୁ ବଡ ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି । ବିଜେପି ମମତାଙ୍କ ତୃଣମୂଳ କଂଗ୍ରେସକୁ କଡା ଟକ୍କର ଦେଉଛି । ମମତା ବାନାର୍ଜୀଙ୍କ ସରକାରରେ ନମ୍ବର-୨ ଥିବା ମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସମେତ ଅନେକ ମନ୍ତ୍ରୀ ଓ ଟିଏମସି ବିଧାୟକ ଦଳ ଛାଡି ବିଜେପିରେ ସାମିଲ ହୋଇସାରିଛନ୍ତି । ପଶ୍ଚିମବଙ୍ଗ ବିଧାନସଭାର ନିର୍ବାଚନ ଫଳାଫଳ ମେ ୨ରେ ଘୋଷଣା ହେବ ।
ତେବେ ନନ୍ଦିଗ୍ରାମ ବିଧାନସଭା ଆସନ କାହିଁକି ଏତେ ଗୁରୁତ୍ୱପୂର୍ଣ୍ଣ । ତା ଉପରେ ନଜର ପକାନ୍ତୁ…
- ନନ୍ଦିଗ୍ରାମ ତୃଣମୂଳ କଂଗ୍ରେସର ଗଡ ଥିଲା
- ଶୁଭେନ୍ଦୁ ଅଧିକାରୀଙ୍କ କିନ୍ତୁ ନନ୍ଦିଗ୍ରାମରେ ଭଲ ପ୍ରଭାବ ରହିଛି
- ଶୁଭେନ୍ଦୁ ବିଜେପିକୁ ଯିବାପରେ ତୃଣମୂଳ କଂଗ୍ରେସର ଭୋଟ ବ୍ୟାଙ୍କ ପ୍ରଭାବିତ ହେବା ଆଶଙ୍କା
- ତେଣୁ ନନ୍ଦିଗ୍ରାମରେ ମମତା ଲଢିଲେ ତୃଣମୂଳକୁ ଅଧିକ ଭୋଟ ଯିବ ବୋଲି ଆକଳନ କରାଯାଉଛି
- ନନ୍ଦିଗ୍ରାମରେ ୩୦ ପ୍ରତିଶତ ସଂଖ୍ୟାଲଘୁ ଭୋଟ ରହିଛି
- ଏଥିସହ ଶୁଭେନ୍ଦୁ ନନ୍ଦିଗ୍ରାମରୁ ବିଜେପିକୁ ୩୫ ଆସନ ଦେବେ ବୋଲି ଦାବି କରୁଛନ୍ତି
- ଶୁଭେନ୍ଦୁଙ୍କୁ ଟକ୍କର ଦେବାକୁ ମମତା ନନ୍ଦିଗ୍ରାମରୁ ଲଢିବା ମାଷ୍ଟରଷ୍ଟ୍ରୋକ୍ ବୋଲି କୁହାଯାଉଛି